Peteĩ lívro oúramo Ñandejáragui katuete ñahaʼarõta upe lívro iporã ha ndaijojahái, ha upeichaite hína la Biblia. ¿Mbaʼérepa jaʼe upéva? Ko lívro ningo ojetradusi ha oñeimprimíma hetaiterei idiómape. Umi mbaʼe omboʼéva la Biblia ohechauka mbaʼeichaitépa iñarandu Ijapohare, ha ikatu ñanepytyvõ jaiko porãve hag̃ua. (Elee 1 Tesalonicenses 2:13 ha 2 Timoteo 3:16.)

Ndaipóri ningo ni peteĩ yvypóra ojasertapaite vaʼerã mbaʼépa oikóta tenonderãme. Péro ikatu jajerovia la Biblia ouha Ñandejáragui, pórke hesakuaitépe oñekumpli umi mbaʼe heʼíva guive oikotaha. Por ehémplo, pe lívro de Isaías, ojetopa vaʼekue mar Muerto ypýpe ha ojehai vaʼekue 100 áñorupi Jesús onase mboyve, heʼi vaʼekue voi Babilonia opytataha itapere. Ha upe profesía oñekumpli heta áño Jesús omano rire. (Elee Isaías 13:19, 20 ha 2 Pedro 1:20, 21.)

La Biblia ohai 40 kuimbaʼérupi, 1.600 áño pukukuére. Haʼekuéra osegi peteĩ téma meménte ha ndojoavýi ni michĩmi, hiʼarive oiko vaʼekue diferénte tiémpope hikuái. ¿Mbaʼéicha rupípa ikatu ojejapo upéicha? Ñandejára voi ogia rupi chupekuéra. (Elee 2 Samuel 23:2.)

Ñandejára oñeʼẽmi vaʼekue umi kuimbaʼépe umi ánhel rupive, peteĩ visiónpe térã iképe, heʼi hag̃ua chupekuéra mbaʼépa ohai vaʼerã. Péro hetave vése haʼe voi omoĩ chupekuéra peteĩ idéa iñakãme ha haʼekuéra oskrivi upéva iñeʼẽtépe. (Elee Apocalipsis 1:1; 21:3-5.)