Antonio: ¿Mbaʼeteko Luis?

Luis: Trankílo, ¿ha nde?

Antonio: Trankilopa avei. Agueru ndéve hína koʼã rrevísta Ñemañaha ha ¡Despertad! ko mespegua. Katuete ndegustáta koʼã téma osẽva pype.

Luis: Aagradese ndéve chamígo. Avyʼa la reju haguére pórke oĩ hína peteĩ mbaʼe aporanduséva ndéve.

Antonio: Añetéiko, ndaipóri provléma.

Luis: Pe ótro día roñemongeta hína peteĩ che kompañéro de traváho ndive ha amombeʼu chupe chegustaitereiha koʼã rrevísta reguerúva jepi chéve. Péro haʼe osẽ heʼi chéve anive hag̃ua alee koʼãva, pórke peẽ ndapejeroviaiha Jesús rehe. ¿Añete piko upéva? Che haʼe kuri chupe aporandutaha ndéve.

Antonio: Aagradese ndéve la reporandu haguére chéve, pórke heta oĩ ogueroviántemava ojeʼéva chupe ha noñanimáiva oporandu añetépa.

Luis: Upéva voi che la haʼéva avei.

Antonio: Ore testígo de Jehová ningo rojerovia Jesús rehe. Ha roikuaa avei jajeroviámante vaʼerãha hese jajesalva hag̃ua.

Luis: Heẽ, che haʼe voi kuri upéva, péro pe che kompañéro de traváho heʼívo chéve peẽ ndaupeichaiha, adudaʼimi kuri. Ñande ningo nañañemongetáiti voi ko témare chéverõ g̃uarã.

Antonio: No nañañeʼẽiti upévare. Mbaʼépa ere jahechárõ koʼág̃a umi téxto heʼíva iñimportanteha jajerovia Jesús rehe. Koʼã téxto ningo ore testígo de Jehová rolee jepi umi ore rapichápe ropredika jave chupekuéra. Aleemíta ndéve.

Luis: Dále, ñahendu katu.

Antonio: Jahechamína mbaʼépa Jesús voi heʼi vaʼekue Juan 14:6-pe oñemongetárõ guare ijapostolkuéra ndive. Koʼápe heʼi: “Che hína pe tape, pe añetegua, ha pe jeikove. Che rupive añoite ikatu oñeg̃uahẽ pe Túva rendápe”. Ohechaukaháicha ko téxto, ¿máva rupive añoitépa ikatu ñañemoag̃ui pe Túva rehe?

Luis: Ha Jesús rupive añoite.

Antonio: Upeichaite. Ha ore testígo de Jehová roguerovia ko téxto heʼíva. Por ehémplo, ore roñemboʼe jave Ñandejárape, siémpre roñemboʼe chupe Jesús rérape.

Luis: ¿Añetéiko? Iporã jaikuaa upéva.

Antonio: Ikatu jahecha avei mbaʼépa heʼi Juan 3:16. Ko téxto iñimportanteterei, pórke omombeʼu porã mbaʼéicha rupípa Jesús ou vaʼekue ko yvy ape ári ha maʼerãpa. ¿Ikatúiko ndete voi relee ñandéve ko téxto?

Luis: Si, ndaipóri provléma. Koʼápe heʼi: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva”.

 Antonio: Nde oiméne reikuaa voi ko téxto heʼíva, ¿ajépa?

Luis: Si, ahendúmava voi péva tupaópe.

Antonio: Añetehápe ikonosído kóva ko téxto. Péro emañami jeýna Jesús heʼi vaʼekuére, haʼe heʼi Ñandejára ñanderayhuetereígui omeʼẽ hague ñandéve pe esperánsa jaikovévo opa árare. Péro ¿mbaʼépa jajapo vaʼerã jahupyty hag̃ua upéva?

Luis: Jajerovia vaʼerã Jesús rehe.

Antonio: Upeichaite. Koʼápe heʼi porã jajerovia vaʼerãha Ñandejára Raʼy peteĩete rehe. Ko Ñemañaháme, páhina 2-pe, peteĩ párte heʼi voi ko rrevísta omokyreʼỹha umi héntepe ojerovia hag̃ua upe ogovernátavare Ñandejára Rréinope, upe omano vaʼekue ñanderehehápe, ikatu hag̃uáicha jaikove opa árare.

Luis: ¡Eʼa nde! Pende rrevístape voi heʼi raʼe peẽ pejeroviaha Jesús rehe.

Antonio: Heẽ, upeichaite.

Luis: ¿Péro mbaʼére piko upéicharõ umi hénte heʼi peẽ ndapejeroviaiha hese?

Antonio: Oime vaʼerã ningo umi hénte opensa upéicha, ohendúgui ótro heʼiha upéva orerehe. Térã ikatu voi oime umi omoakãva irrelihión omboʼe chupekuéra upéva.

Luis: Che apensa ojeʼeneha penderehe upéicha pórke peñehenói testígo de Jehová, ha ndahaʼéi testígo de Jesús.

Antonio: Heẽ, ikatu avei umívagui añete.

Luis: Nde, ¿ha mbaʼéreiko peẽ peñeʼẽte la Jehováre?

Antonio: Primero pórke Ñandejára héra Jehová, ha Itaʼýra voi ohechauka vaʼekue iñimportanteha jaiporu héra. Tahechaukamína ndéve mbaʼépa Jesús voi heʼi vaʼekue peteĩ jey oñemboʼérõ guare Itúvape. Eleemína ko heʼíva Juan 17:26.

Luis: Vuéno. Koʼápe heʼi: “Che aikuaauka chupekuéra nde réra ha aikuaaukáta gueteri, ikatu hag̃uáicha haʼekuéra oporohayhu nde cherayhu haguéicha ha che aime hag̃ua hendivekuéra”.

Antonio: Rehechakuaápa Jesús voi omombeʼu hague umi héntepe Ñandejára réra. ¿Mbaʼérepa nde ere ojapo hague upéicha?

Luis: Eeeh... ndaikuaái mbaʼépa haʼéta ndéve.

Antonio: Ikatu jahecha ótro téxto omyesakãvéva upéva. Ikatu jahecha Hechos 2:21. Ápe heʼi: “Ha opavave ohenóiva Jehová réra ojesalváta”. Ko téxto ohechauka porã tekotevẽha jaikuaauka ha jaiporu Jehová réra jajesalva hag̃ua, ha Jesús oikuaa avei upéva.

Luis: Si, katueteíngo upéva.

Antonio: Upévare Jesús oipota idisipulokuéra oikuaa Ñandejára réra ha oiporu meme upe téra. Haʼe oikuaa porã upéicharõmante ikatutaha jajesalva. Ha upéicha rupi avei, ore siémpre roñeʼẽ ore rapichakuérape Ñandejára Jehová rehe. Oréve g̃uarã iñimportanteterei umi hénte oikuaa chupe ha ohenói avei Ñandejárape hérarupi.

Luis: Péro umi hénte ndoikuaáiramo jepe Ñandejára réra, oikuaa hína mávarepa ñañeʼẽ chupekuéra jaʼéramo Ñandejára.

Antonio: Heẽ ikatu. Péro haʼe voi ningo omombeʼu ñandéve mbaʼéichapa héra, ha jaikuaávo upéva ndahasyive ñandéve ñanemoag̃ui hag̃ua hese.

Luis: ¿Ndépa ere?

Antonio: Epensamínte ko mbaʼére: ñande jaikuaa oĩ hague peteĩ kuimbaʼe ombojaʼo vaʼekue pe mar Rojo ha orresivi vaʼekue umi Diez Mandamiénto. Jaikuaa avei oĩ hague peteĩ kuimbaʼe ojapo vaʼekue pe árka ojesalva hag̃ua haʼe, ifamiliakuéra ha umi animál. Avei jaikuaa peteĩ kuimbaʼe  ou hague yvágagui ha omano ñanderehehápe ñaneguenohẽ hag̃ua pekádo poguýgui. ¿Mbaʼépa oiko vaʼerãmoʼã ndajaikuaáirire herakuéra?

Luis: Ha... mbaʼeve.

Antonio: ¡Ajépa! Péro Ñandejára omombeʼu ñandéve umi kuimbaʼe heraha Moisés, Noé ha Jesús. Ha ndajaikuaáiramo jepe chupekuéra personálmente, jaikuaávo herakuéra, haʼete jagueroviavéva añetehápe oexisti hague koʼã kuimbaʼe.

Luis: Napensaimíva upévare, péro siertoite la eréva.

Antonio: Upévare avei ore testígo de Jehová roiporu meme Ñandejára réra. Ore roipytyvõse ore rapichakuérape ojerovia hag̃ua Ñandejára Jehováre, ohecha hag̃ua chupe peteĩ persónaicha ha oiko hag̃ua iñamígoramo. Upéicha avei siémpre romombeʼu ore rapichakuérape iñimportanteha jajerovia Jesús rehe jajesalva hag̃ua. Ikatu jahechave peteĩ téxto ohechaukáva upéva.

Luis: Jahecha katu.

Antonio: Ajeʼi jaleéma kuri Juan 14:6-pe Jesús heʼi hague ijehe haʼeha “pe tape, pe añetegua, ha pe jeikove”. Jahechamína mbaʼépa haʼe heʼi raʼe upe mboyve. Jaleemi koʼág̃a Juan 14:1. ¿Ikatúiko elee ñandéve mbaʼépa heʼi ko téxto opakuetévo?

Luis: Oĩma. Koʼápe heʼi: “Pejerovia Ñandejárare ha pejerovia avei cherehe”.

Antonio: ¿Ikatúpa jaʼe upéicharõ ikatuha jaiporavo mávarepa jajeroviáta? ¿Jesús rehe térãpa Jehováre?

Luis: Nahániri. Jesús heʼi jajerovia vaʼerãha mokõivévare.

Antonio: Upeichaite. Oiméne nde repensa avei ndahaʼéi vaʼerãha jaʼénteva jajeroviaha Ñandejára ha Jesús rehe, síno jahechauka vaʼerãha upéva.

Luis: Heẽ, añete upéva.

Antonio: ¿Péro mbaʼéichapa ikatu jahechauka añetehápe jajeroviaha Ñandejára ha Jesús rehe? Ikatu ñañeʼẽve upévare ótro ajúvape. ¿Mbaʼépa ere? *

Luis: Oĩ porã chamígo, rohaʼarõta.