Ñandejára ojapo mboyve yvyporakuérape, ojapóma vaʼekue hetaiterei ánhelpe (Job 38:4, 7). Koʼã ánhel ipoderosoitéva oservi Ñandejárape. Sapyʼánte haʼe oipuru chupekuéra ogia ha oñangareko hag̃ua umi hénte iñeʼẽrendúvape (Salmo 91:10, 11). Koʼág̃arupi umi ánhel oipytyvõ umi omoirũvape Crístope, omog̃uahẽ hag̃ua umi hénte ipyʼaporãvape umi notísia porã oúva Ñandejáragui. (Elee Apocalipsis 14:6, 7.)

¿Oĩ porãpa upéicharõ ñañemboʼe umi ánhelpe ñanepytyvõ hag̃ua? Nahániri, ñañemboʼévo jaadora avei, ha ñande ningo Ñandejárape añoite jaadora vaʼerã (Apocalipsis 19:10). Umi ánhel oservi Ñandejárape ha ojapo haʼe omandáva chupekuéra, ndahaʼéi yvypóra omandáva. Upévare, ñañemboʼe jave Ñandejárape, jajapo vaʼerã Jesús rupive. (Elee Salmo 103:20, 21 ha Mateo 26:53.)

Yvyporakuéraicha avei, umi ánhel oreko pe liverta odesidívo ojapótapa iporãva térã ivaíva. Ha ñambyasýramo jepe, oĩ vaʼekue heta ánhel naiñeʼẽrendúiva Ñandejárape (2 Pedro 2:4). Pe primer ánhel ojerrevela vaʼekue haʼe Satanás, ha oĩ hetave ánhel osegíva chupe, umívagui oiko demónio. Ndaʼareiete oñemosẽ hague Satanás ha idemoniokuérape yvágagui ha ojeity chupekuéra ko yvy ape ári. (Elee Apocalipsis 12:7-9.)

Áño 1914 guive hetaitereivéntema oĩ pe violénsia ha umi mbaʼe vai. Koʼã mbaʼe ohechauka og̃uahẽmbotaitemaha pe tiémpo oñehundívo Satanás ha idemoniokuérape. Oñekumpli vove upéva, ko yvýgui oikóta peteĩ hardín neporãmba jepéva. (Elee Apocalipsis 12:12 ha 21:3, 4.)