Jairo onasérema voi oreko peteĩ enfermeda hérava kuadriplehía espástika, haʼéva peteĩ parálisis serevrál. * Upévare haʼe ndaikatúi okontrola la ojapóva hete. Pe enfermeda oafekta rupi iserévro ndaikatúi omonguʼe imuskulokuéra haʼe oipotaháicha, ha upévare ipo ha ipy ojepokapa chugui. Sapyʼánte ningo Jairo ojetyvyro vaipa, ha umícha jave oñelastima jepi haʼe voi, térã olastima umi oĩvape ijypýpe, upéicha rupi heta vése roñapytĩ hetyma ha ijyva isílla de rruédare. Rombyasyeterei ningo, péro rojapómante upéva pono oñelastimave ni olastima ótrope.

Jairo heta anga osufri okakuaa aja. Orekópe tres mésente oñepyrũma ijatáke ha okonvulsiona, ha umícha jave opytáma inkonsiénte. Heta vése che sy oguerahámi chupe ijyva ári pyaʼe porã ospitálpe, oimoʼãgui omanomaha.

Imuskulokuéra oñetensionapa rupi chugui, umi ikangue oñepyrũ oñedeforma. Upéi orekópe 16 áño opẽ ikadéra, ha upéva oaprovlema avei chugui ikangue orekóva ikuártope ha ótro ikangue orekóva ikadéra ypýpe, upévare ojeoperámante chupe umívagui. Ha ojerrekupera aja iñoperasióngui, lomímonte osegi osufri. Koʼág̃a peve chemanduʼa mbaʼéichapa Jairo ipyahẽ ha osapukái anga pyharekue hasyetereígui chupe.

Che ermáno ningo ndaikatúi ojevale ijehe, upévare oĩmante vaʼerã álgien oipytyvõva chupe okaru, oñemonde ha oñeno hag̃ua. Papa ha mama la oñatendevéva hese. Péro haʼekuéra siémpre omomanduʼa Jáirope ke oĩramo jepe oipytyvõva chupe, Ñandejára oñangarekoha hese.

Che sy ha che túva ningo testígo de Jehová, ha oĩ segúro ke Ñandejára haʼéramo ñane amígo javyʼaiteve. Haʼekuéra oikuaa avei Jairo hete kangypáramo jepe ha ndaikatúi okontrola umi mbaʼe ojapóva, ikatuha oreko peteĩ esperánsa amo gotyove g̃uarã. Upévare Jairo onase guive, haʼekuéra olee jepi chupe umi istória oĩva la Bíbliape, péro ndoikuaái kuri haʼépa ontende la oñemboʼéva chupe.

Peteĩ díape, Jairo imitãʼírõ guaréiti, papa heʼi chupe: “¡Che raʼy, eñeʼẽmíntena chéve por favór!  Cherayhúramo, reñeʼẽta chéve”. Jairo hesaypororopaite anga, heʼiseterei mbaʼéichapa oñeñandu péro ndaikatúi, ongululupa reínte. Papa oñeñandu vaieterei omyasẽ haguére Jáirope. Péro upéicha rupiete avei opilla ke Jairo ndaikatúiramo jepe oñeʼẽ, ontendeha la heʼíva chupe.

Tiémpo riremi, papa ha mama ohechakuaa sapyʼánte Jairo pyaʼeterei omonguʼeha hesa, haʼete heʼiséva chupekuéra mbaʼépa opensa térã mbaʼéichapa oñeñandu. Ha ojedesespera haʼekuéra nontendéi jave chupe. Péro upéi ontende mbaʼéramo hikuái la heʼiséva ha omeʼẽ chupe haʼe oipotáva, ijuruvy rei opuka, haʼete heʼíva chupekuéra “grásiamante”.

Peteĩ doktóra heʼi oréve mbaʼéichapa ikatu roñekomunika porãve che ermánondi. Heʼi oréve rojapo hag̃ua chupe umi pregúnta ikatútava okontesta si o no, ha romoĩ hag̃ua henondépe ore po. Upéicharõ Jairo omañáramo ore po deréchare heʼise si, ha omañáramo ore po iskiérdare heʼise no.

Umi testígo de Jehová ningo oreko jepi 3 vése al áño peteĩ rreunión guasu, ohohápe hetaiterei hénte ohendu hag̃ua umi enseñánsa vívlika. Jairo siémpre ovyʼaiterei ohendu jave pe diskúrso ojejapóva umi ojevautisátavape g̃uarã. Ha peteĩ díape, Jairo orekórõ guare 16 áñorupi, papa oporandu chupe: “¿Nde piko rejevautisase avei che raʼy?”. Haʼe pyaʼe voi omaña papa po deréchare. Upémarõ oporandu jey chupe: “¿Ha reñemboʼéma piko repromete hag̃ua Ñandejárape reservitaha chupe tóda la vída?”. Jairo pyaʼe porã jey omaña ipo deréchare. Upépe rohechakuaa haʼe oñemeʼẽma hague Jehovápe ojapo hag̃ua ivolunta.

Upe rire ojejapo chupe hetave pregúnta la Bíbliagui, ha ojekuaa Jairo añetehápe ontendeha mbaʼeichaitépa iñimportánte la vautísmo. Upévare áño 2004-pe oñeporandu chupe peteĩ mbaʼe iñimportantetereíva: “¿Reñemeʼẽmapa Ñandejárape rejapo hag̃ua ivolunta?”. Jairo omaña yvate gotyo, pórke péicha heʼi chupe hikuái ojapo hag̃ua okontestaséramo si. Upémarõ, orekópe 17 áño che ermáno ojevautisa ha oiko chugui testígo de Jehová.

Áño 2011-pe, Jairo orekóma peteĩ komputadóra ikatúva okontrola hesápente, ha osegíva hesa movimiénto. Omboty ha oavrívo hesa térã omaña aréramo peteĩ pártepe, haʼete ojapóva klik ha oikéma upépe. Ojeprepara voi chupe pe pantállape heta símbolo ikatúva oelehi oñekomunika hag̃ua. Káda símbolo orrepresenta peteĩ palávra térã fráse. Haʼe  omaña haguénte peteĩ símbolore, oñehendúma peteĩ vos pe komputadóragui heʼíva Jairo heʼiséva.

Amáske oaprende ohóvo la Biblia omboʼéva, Jairo omombeʼuséma avei ótrope umi mbaʼe oaprendéva. Ha rostudiávo la Biblia en família, Jairo omaña jepi cherehe ha upéi ikomputadórare heta vése. Upéicharõ haʼe oipota hína askrivi ikomputadórape ikomentariorã. Upéi roñerreuni jave kongregasiónpe ha ojejapo umi pregúnta, haʼe okontesta upéva.

Jairo okomenta hag̃ua rreunionhápe, mbeguekatúpe oheka pe símbolo oĩháme ikomentário, ha upéi oike upépe entéro ohendu hag̃ua pe vos osẽva pe komputadóragui. Jairo opukavy jepi okomentapa rire, oikuaágui ikomentário omokyreʼỹha umi ermánope. Peteĩ iñamígo hérava Alex heʼi voi: “Opokoiterei cherehe umi mbaʼe heʼíva Jairo okomenta jave”.

Jairo oipuru avei hesa omombeʼu hag̃ua la héntepe umi mbaʼe oikuaáva la Bíbliagui. ¿Mbaʼéichapa ojapo upéva? Haʼe omaña ikomputadórape peteĩ simboloʼi orekóva peteĩ hardín raʼanga, oĩháme umi animál ha persóna oparupigua oikóva oñondivepa pyʼaguapýpe. Ha upépe pe vos osẽva pe komputadóragui heʼi: “La Biblia opromete jaikotaha peteĩ hardín neporãvape ko yvy ape ári, ha upépe ndaiporimoʼãvéima hasýva ni omanóva. Upéva oĩ Apocalipsis 21:4-pe”. Upéi pe persóna oikuaasevéramo, Jairo omaña jey pe komputadórare ha oñehendu pe vos heʼíva: “¿Restudiasépa la Biblia chendive?”. Ni ndorogueroviaséi che avuélo oasepta hague ostudia hendive. Rovyʼaiterei ningo rohechávo Jairo ha ótro Testígope omboʼérõ la Biblia che avuélope. Upéi che avuélo ojevautisa agosto del 2014-pe, peteĩ aty guasúpe ojejapo vaʼekue Madrídpe. ¡Orembovyʼaiterei ningo upéva!

Pe koléhio Jairo oikehápe, entéronte ohechakuaa mbaʼéichapa ojerovia mbarete Ñandejárare. Peteĩ terapéuta ombaʼapóva upépe, hérava Rosario, heʼi voi: “Algúna ves adesidíramo aike peteĩ rrelihiónpe, aelehíta umi testígo de Jehovápe. Che ahechakuaa Jairo ojerovia mbarete rupi Ñandejárare noñamargaiha, síno oagradese ikatu haguére oikove, ijetuʼúramo jepe isituasión”.

Jairo ovyʼaiterei alee jave chupe ko promésa oĩva Isaías 35:6-pe: ‘Ndoguatáiva guasúicha odiparáta, ha iñeʼẽngúva vyʼágui osapukáita’. Sapyʼánte ningo oñedesanima avei, péro hetave vése hory. Haʼe ovyʼa oipurúvo itiémpo oipytyvõ hag̃ua umi héntepe oikuaa hag̃ua Ñandejárape, ha avei ohasávo tiémpo iñamigokuérandi. Upéva oipytyvõ chupe ani hag̃ua omboguapyeterei ijehe iñenfermeda. Jairo ehémplo ohechauka porãiterei ikatuha javyʼa jaservíramo Jehovápe, jahasáramo jepe umi situasión ijetuʼúva.