María: Mbaʼéichapa Lucía. Avyʼaiterei reho haguére pe semána pasáda Konmemorasionhápe. * ¿Ndegusta piko raʼe?

Lucía: Si, chegustaiterei. Péro oĩ heta mbaʼe nantendeporãi vaʼekue. Che aikuaa la majoríape g̃uarã iñimportanteha ofesteha Jesús nasimiénto Navidápe, péro nantendeporãinte mbaʼérepa iñimportantete jagueromanduʼa haʼe omano hague ára. Ha ojexplikárõ jepe akokuehe, lomímonte nantendeporãi.

María: Iporã jaikuaa upéva, ¿ajépa? Heta hénte ningo omombaʼeterei añete pe Navidad, péro oĩ heta mbaʼe ore roguerekóva enkuénta rogueromanduʼa hag̃ua Jesús omano hague ára. Ha netiempoʼimíramo ikatu aexplika ndéve sapyʼaite.

Lucía: Oĩ porã, koʼag̃aite ndahaʼéi la cherembiapoitereíva hína.

María: Ke kalida. Primeroite voi, ore rogueromanduʼa Jesús omano hague ára pórke haʼe voi ojerure ojejapo hag̃ua upéva. Jahechamína mbaʼépa oiko raʼe pe pyhare Jesús omano mboyve. Oiméne nemanduʼa upérõ haʼe ojapo hague peteĩ séna espesiál idisipulokuérandi.

Lucía: Si, pe Última Séna, ¿ajépa?

María: Upeichaite. Oñehenói avei chupe Séna del Señór. Ha Jesús osenárõ guare idisipulokuérandi omeʼẽ chupekuéra peteĩ mandáto. Jahechamína upéva la Bíbliape, oĩ hína Lucas 22:19-pe. ¿Ikatúpa ndete voi relee?

Lucía: Vuéno. Koʼápe heʼi: “Avei ojagarra peteĩ pan, oagradese Ñandejárape, ombojaʼo ha ombohasa chupekuéra, heʼívo: ‘Kóva orrepresenta che rete, oñemeʼẽtava penderehehápe. Pesegíkena pejapo kóva penemanduʼávo cherehe’”.

María: ¿Rehechápa mbaʼépa heʼi Jesús ko versíkulo opakuévo? “Pesegíkena pejapo kóva penemanduʼávo cherehe.” Ha upe mboyvemi heʼi chupekuéra mbaʼépa la ogueromanduʼa vaʼerã hikuái. Haʼe heʼi omeʼẽtaha hete térã hekove idisipulokuéra rehehápe. Ha Mateo 20:28-pe heʼi upéicha lénto avei. Emañamína mbaʼépa heʼi koʼápe: “Péicha avei pe Yvypóra Raʼy ndoúi oporojokuái hag̃ua, ou guei oiko tembiguáiramo, ha omeʼẽ hekove, opaga ha oguenohẽ hag̃ua hetápe pekádo poguýgui”. Ore rogueromanduʼávo Jesús omano hague ára, rohechauka hína romombaʼeha pe sakrifísio ojapo vaʼekue ñandesalva hag̃ua. Haʼe omano rupi ñanderehehápe ikatu jajesalva, péro upearã ñaneñeʼẽrendu vaʼerã.

Lucía: Che ahendúva Jesús omano hague ñandesalva hag̃ua. Péro nantendeporãi mbaʼéguipa la ñandesalva.

María: Oĩ heta ndoikuaáiva upéva, ha ijetuʼuʼi voi ñantende hag̃ua. Péro iñimportánte jaikuaa pórke upéva haʼe peteĩ enseñánsa iporãitereíva oĩva la Bíbliape. ¿Netiempoʼimípa gueteri ñañemongetave hag̃ua?

Lucía: Si, trankílo.

María: Vuéno, ndaʼaréi alee hague peteĩ informasión oñeʼẽva ko témare ha añehaʼãta aexplika ndéve isensilloveháicha.

Lucía: Oĩ porã.

María: Primeroite voi ñantende vaʼerã mbaʼépa oiko raʼe Adán ha Eva opekárõ guare hardín de Edénpe. Upearã ikatu jaleemi Romanos 6:23. ¿Ikatúpa eleemi jey ñandéve?

Lucía: Si. Koʼápe heʼi: “¿Mbaʼéicha opaga ñandéve pe pekádo? Pekádo káusare ñamano. Péro Ñandejára orregala jeikove opaveʼỹva ñande Ruvicha Cristo Jesús rupive”.

María: Grásiamante. Ko téxto heʼi porã ñandéve pe pekádo káusare ñamanoha, ha Ñandejára voi omoĩ ko léi. Péro, jaikuaaháicha, iñepyrũme Adán ha Eva ndahaʼéi vaʼekue pekadór. Ñandejára ojapo vaʼekue chupekuéra perfékto, ha ifamília onase vaʼerãmoʼã avei pekadoʼỹre ha avave nomanói vaʼerãmoʼã kuri. Adán, Eva ha ifamiliakuéra oikove vaʼerãmoʼã vyʼápe pára siémpre. Péro, ¿nemanduʼa mbaʼépa oiko raʼe upérõ?

Lucía: Si, haʼekuéra hoʼu pe frúto proivído.

María: Siérto, ha upérõ haʼekuéra opeka. Ha odesovedese rupi Ñandejárape operde pe perfeksión. Haʼekuéra odesidi vai ha péicha ojeperhudika ijupe voi ha avei operhudika ifamíliape.

Lucía: ¿Ha mbaʼe kúlpa piko ñande jareko haʼekuéra odesidi vai haguére?

María: Ñantende hag̃ua ñamoĩkuaa peteĩ ehémplo. ¿Ndépa rejapómava pan?

Lucía: Si, ajapo jepi sapyʼánte.

María: Vuéno, epensamína rejoguaha peteĩ mbaʼyru pyahu rejapo hag̃ua pan, ha reipurúta jave primera ves, hoʼa ndehegui ha opytaitéma hese peteĩ márka. ¿Mbaʼéichapa osẽta umi pan rejapóva pe mbaʼyrúpe? ¿Orekótapa avei pe márka?

Lucía: Katuete ningo.

María: ¿Ajépa? Upeichaite avei oiko Adán ha Évare, haʼekuéra ndojapóirõ guare Ñandejára heʼíva orekóma pe márka del pekádo. Ha opeka rupi hikuái ifamília mboyve, enterovetéva ñanaséma imperfékto ha jarekóma avei pe márka del pekádo. Jaʼe porãsérõ g̃uarã ñandéve ñandestirave voínte jajapo pe ivaíva. Ha la Biblia oñeʼẽ jave pe pekádore ojerreferi avei upe deséore, ndahaʼéi katuete umi mbaʼe vai la hénte ojapóvare. Upévare, ñande ndajaguerekóiramo jepe la kúlpa Adán ha Eva ojapo vaʼekuére, haʼekuéra ombohasáma ñandéve pe pekádo ha ñande ñanaséma voi pekadór. Ha jalee haguéicha Romanos 6:23-pe, pe “pekádo káusare ñamano”.

Lucía: Péro upéva ningo peteĩ inhustísia. ¿Mbaʼére piko ñande avei ñañekondena siéndo ke Adán ha Eva la opeka vaʼekue?

María: Haʼetévaicha peteĩ inhustísia, ¿ajépa? Péro oĩ hetave mbaʼe jareko vaʼerã enkuénta. Ñandejára ningo ihústo ha upévare odesidi Adán ha Eva omano vaʼerãha opeka haguére. Upéicharõ jepe, Ñandejára ndohejareíri yvyporakuérape, síno omeʼẽ ñandéve esperánsa Jesús sakrifísio rupive. Jahechami jeýna Romanos 6:23, upépe heʼipa rire pekádo káusare ñamanoha, heʼive: “Péro Ñandejára orregala jeikove opaveʼỹva ñande Ruvicha Cristo Jesús rupive”.  Upéicharõ, Jesús sakrifísio rupive ikatu jajei pekádo ha ñemano poguýgui. *

María: Oĩve peteĩ mbaʼe ko téxtogui ikatúva ñaanalisa avei, ¿mbaʼépa ere jahechárõ?

Lucía: Dále, jahecha katu.

María: Koʼápe ningo heʼi ‘Ñandejára orregala hague jeikove opaveʼỹva ñande Ruvicha Cristo Jesús rupive’. Péro, ¿mbaʼére ndeʼíri koʼápe ‘Jesús orregala hague jeikove opaveʼỹva’, siéndo ke haʼe la osufri ha omano vaʼekue ñanderehehápe? *

Lucía: Eh... Ndaikuaái legálmente.

María: Adán ha Eva odesovedesérõ guare opeka Ikreadór kóntrape. Katuete upéva hasyetereíne raʼe Ñandejárape. Péro haʼe pyaʼe voi ohecháma mbaʼépa ojapóta osolusiona hag̃ua pe situasión. Upévare ombou kuri ko yvy ape ári Itaʼýrape onase hag̃ua peteĩ umáno perféktoicha ha omeʼẽ hag̃ua hekove osalva hag̃ua yvyporakuérape. * Ko mbaʼe ningo peteĩ rregálo iporãitereíva omeʼẽva ñandéve Ñandejára. Péro, ¿ndépa repensámava mbaʼéichapa oiméne oñeñandu raʼe Ñandejára ojejukárõ guare Itaʼýrape?

Lucía: Legálmente núnka napensáiva upévare.

María: Ahecha ningo koʼápe oĩha heta hugéte. ¿Nde piko ereko mitã?

Lucía: Si, mokõi chememby, peteĩ mitãʼi ha peteĩ mitãkuñaʼi.

María: Ha nde kómo sy ikatu reñeimahina mbaʼéichapa oñeñandúne raʼe Ñandejára ohechávo Itaʼýrape omano. Haʼe ningo ohechapaite yvága guive ojejagarrárõ guare Jesúspe, umi hénte oñembohorýrõ guare hese ha oñenupã vaipaitérõ guare chupe. Epensamína mbaʼeichaitépa oiméne hasy raʼe Ñandejárape ohechávo Itaʼýra hetaite anga osufri omano meve pe yvyráre.

Lucía: Legálmente ijetuʼúne raʼe chupe. Núnka napensáiva kuri upéicha.

María: Ndajaikuaáiramo jepe mbaʼeichaitépa añete oñeñandu raʼe Ñandejára, la Biblia ohechauka porã mbaʼépa omomýi chupe opermiti hag̃ua Itaʼýra osufri omano meve. Juan 3:16-pe oñemombeʼu upéva. ¿Ikatu piko releemi?

Lucía: Si. Koʼápe heʼi: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva”.

María: Grásiamante. Koʼápe jahecha porã “Ñandejára ohayhuetereígui pe múndo” ombou hague Itaʼýra. Jaʼe porãsérõ g̃uarã, ñanderayhuetereígui ñandéve ombou Jesúspe omano hag̃ua ñanderehehápe. ¿Rentendépa koʼág̃a mbaʼérepa ore testígo de Jehová rogueromanduʼa káda áño Jesús omano hague ára?

Lucía: Si, koʼág̃a antendéma ha aagradeseterei ndéve rexplika haguére chéve.