Che anase vaʼekue peteĩ várrio héravape Paddington (Londres, Inglaterra). Areko mbohapy ermána majór ha roikopámi oñondivepa mamándi. Papa katu ikaʼu vaʼekue, sapyʼánte ou oiko orendive, péro upéi orereja rei jey.

Chemitãkuñaʼíme che sy heʼími vaʼerã chéve añemboʼe vaʼerãha káda pyhare. Che areko vaʼekue peteĩ Biblia michĩʼíva oĩháme umi Salmo ha ainventámi umi músika apurahéi hag̃ua umíva. Chemanduʼa alee hague peteĩ lívrope peteĩ fráse chemopensáva: “Algún día nañanekoʼẽmoʼãvéima”. Upéva ndaikatúi aipeʼa che akãgui, apensámi tódo el pyhare mbaʼépa oikóta tenonderãme. Ha haʼémi: “Ndaikatúingo kóvante la ñande rekove. ¿Maʼerãpa oime vaʼerã jaikove?”. ¡Namanoseieterei vaʼekue!

Oñepyrũ chegusta pe espiritísmo. Upévare atantea añeʼẽ umi omano vaʼekuéndi, ha che kompañerokuéra de eskuélandi rohómi umi sementériore. Avei roñembyatypámi rohecha hag̃ua umi pelíkula de terrór. Opa umi mbaʼe oremongyhyjeterei vaʼekue, péro oregustaiterei avei.

Che desastretéma vaʼekue arekópe 10 áñonte. Añepyrũ apita, ha sapyʼaitépe añenvisiaitéma voi. Upéi atanteáma avei mariguána. Arekópe 11 áño añepyrũma avei amokõ, ha ndahéiramo jepe chéve la vevída, chegusta vaʼekue la añeñandu lája akaʼu jave. Chegustaiterei la músika ha ajerokyseterei vaʼekue, upévare ija vovénte chéve aha jeýma fiestahápe ha umi diskotékare. Pyharekue ajeskapámi che rógagui ha ag̃uahẽ jey koʼẽmbotávo, avave opillaʼỹre. Umícha jave chekaneʼõiterei, upévare afaltántema eskuélape. Ha la aháramo katu, aaprovecha amokõ hag̃ua opa rire peteĩ kláse ha oñepyrũ mboyve pe ótro.

Pe último áño eskuélape desástre la che nóta. Che sy ningo ndoikuaaporãi vaʼekue mbaʼeichaitépa ajeporta vai hína kuri, upévare ohechávo la che nóta oñeñandu vai ha ipochyeterei chendive. Tuicha rojodiskuti, ha amo ipahápe asẽ aha ógagui. Por un tiémpo aiko che chíko Tónyndi. Haʼe ningo oporomonda, ovende dróga ha iviolentoiterei  vaʼekue. Un tiémpo riremínte cheryeguasúma, ha chememby arekópe 16 áñonte.

Upéi umi autorida okonsegi chéve aha hag̃ua aiko peteĩ alvérgepe, oĩháme umi mádre soltéra imembykuérandi. Mokõi kuñakarai Testígo siémpre ohómi ovisita unas kuánta oikóvape upépe. Peteĩ día aha ahendu la heʼíva hikuái ha añemongeta hendivekuéra. Che ahechaukasénte kuri tuicha ojavyha hikuái, péro amo ipahápe chesorprende mbaʼéichapa oipuru hikuái la Biblia orresponde hag̃ua chéve aporandúva guive. Chegustaiterei ningo mbaʼéichapa haʼekuéra iñamávle ha isensíllo la omboʼe lája. Upémarõ añepyrũ astudia hendivekuéra la Biblia.

Upe riremínte aaprende peteĩ mbaʼe okambiaitéva che rekove. Chemitãkuñaʼi guive che namanoseieterei vaʼekue. Péro upéi aju aikuaa Jesús heʼi hague oikove jeytaha umi omano vaʼekue (Juan 5:28, 29). Avei aaprende Ñandejára ojepyʼapyha cherehe (1 Pedro 5:7). Ha aguerovia ikatuha aiko pára siémpre ko yvy ape ári peteĩ hardín neporãvape (Salmo 37:29). Opokoiterei avei cherehe la heʼíva Jeremías 29:11, upépe heʼi: “Che aikuaa porã pe pensamiénto aguerekóva che pyʼapýpe penderehe, heʼi pende Ruete, che akãme aguereko pyʼaguapy, ha ndahaʼéi pyʼaro, ameʼẽ jey hag̃ua peẽme umi mbaʼe pehaʼarõva ha peiko hag̃ua pyʼaguapýpe” (Ñande Ruete Ñeʼẽ Bíblia [ÑÑB]).

Umi testígo de Jehová ikalidaiterei vaʼekue chendive. Primera ves ahárõ guare rreunionhápe ahechakuaa mbaʼéichapa entéronte hory, cherresivi porã ha iñamávle chendive (Juan 13:34, 35). ¡Ndapeichaiete chetrata vaʼekue pe iglésia aha haguépe yma! Umi Testígo ndachehusgái, oñemotiémpo guei chéve g̃uarã, ohechauka ojepyʼapyha cherehe ha chepytyvõ aikotevẽve jave. Añeñandu voi aimerõguáicha peteĩ família tuicháva ha cherayhúvape.

Amáske astudia la Biblia ahechakuaa akambia vaʼerãha heta mbaʼépe ambovyʼa hag̃ua Ñandejárape. Ijetuʼueterei vaʼekue chéve aheja hag̃ua la sigarríllo. Ha ahechakuaa oĩha umi músika haʼetéva voi chemboligáva apita hag̃ua mariguána, upévare nahenduveiete umíva ha añepyrũ ahendu ótro músika. Ndahaveiete avei fiestahápe ni umi diskotékare, pórke aikuaa upépe amokõsetaha. Ha avei añepyrũ aheka che amigorã umi persóna chepytyvõtava asegi hag̃ua amehora (Proverbios 13:20).

Upe tiémpope Tony ostudia avei oikóvo la Biblia umi testígo de Jehovándi. Ha ohechakuaa umi mbaʼe oaprendéva siertoha, pórke oñekontesta chupe la Biblia rupive umi mbaʼe oporandúva guive. Haʼe tuichaiterei ou okambia, por ehémplo ndojeheʼavéi umi iñamígo iviolentoitévare, noporomondavéi ha ohejaite pe mariguána. Ore ningo rojapose kuri entéro mbaʼe Jehová ojeruréva orehegui, upévare romenda áño 1982-pe ha ikatúma avei upéicha romongakuaa porãve ore família.

Aikuaa oĩha heta persóna ohasa vaʼekue umi mbaʼe che ahasáva ha ojapo kuri umi kámbio che ajaposéva avei. Iñexperiensiakuéra oñeguenohẽ jepi rrevísta Ñemañaha ha ¡Despertad!-pe, * upévare che siémpre ahekámi koʼã artíkulo alee hag̃ua. Umíva ningo chemokyreʼỹeterei asegi hag̃ua añehaʼã ha pono añentrega. Siémpre avei ajerurémi Jehovápe ipasiensiami hag̃ua cherehe. Upéi, julio de 1982-pe, Tony ha che rojevautisa ha oikóma orehegui testígo de Jehová.

Jehová ningo che amigoite, ha ikatu haʼe upéva chesalva hague. Tony ha che rohechakuaa mbaʼéichapa haʼe orepytyvõ roikotevẽve jave. Ha rohasáramo peteĩ situasión ijetuʼúva, roikuaa rojeroviánte vaʼerãha hese ha haʼe katuete orepytyvõtaha. Ha siémpre roñandu mbaʼéichapa haʼe okuida orerehe ha ore famíliare (Salmo 55:22).

Che membykuña ha che membykuimbaʼe ningo Jehová amigoite avei, ha ore rovyʼaiterei roipytyvõ haguére chupekuéra upearã. Ha koʼág̃a ahechávo che nietokuéra oikuaa porãveha ohóvo Jehovápe, chembovyʼaiterei avei.

Koʼág̃a ndakyhyjevéima amanórõ g̃uarã ni ndachepyʼapyvéima mbaʼépa oikóta tenonderãme. Tony ha che hetaiterei orerembiapo. Káda semána roho rovisita umi testígo de Jehová kongregasión ha romokyreʼỹ chupekuéra. Ha enterovéva oñondivepa roho romboʼe umi héntepe ikatuha oiko pára siémpre peteĩ paraísope, ojeroviáramo Jesús rehe.