La Bíbliape pyʼỹi oñehenói Jesúspe “Ñandejára Raʼy” (Juan 1:49). Oñehenóivo chupe “Ñandejára Raʼy” ohechauka Ñandejára haʼeha pe Kreadór ha omeʼẽha la vída enterovépe, umíva apytépe Jesúspe avei (Salmo 36:9; Apocalipsis 4:11). Péro la Biblia ndeʼíri ni peteĩ hendápe Ñandejára ojoguaha umi tuakuéra umánope, haʼe idiferentete hína.

 Ñandejára Ñeʼẽme oñehenói avei umi ánhelpe “Ñandejára raʼykuéra” (Job 1:6, nóta). Ha ótro hendápe ojeʼe Adán rehe “Ñandejára raʼy” (Lucas 3:38). Upéicharamo jepe avave ndaikatúi oñekompara Jesús rehe pórke chupe raẽvete Ñandejára okrea vaʼekue. Ha avei avave noipytyvõi vaʼekue Ñandejárape okrea hag̃ua Jesúspe. La Biblia ohechauka porã Jesús haʼeha Ñandejára Raʼy iñimportantevéva.

•  ¿Oikópa rakaʼe Jesús yvágape ou mboyve ko yvy ape ári?

•  ¿Mbaʼépa ojapo vaʼekue Jesús ou mboyve ko yvy ape ári?

 Si, Jesús haʼe vaʼekue peteĩ ánhel onase mboyve ko yvy ape ári peteĩ umánoicha. Haʼe heʼi vaʼekue: “Che aguejy yvágagui” (Juan 6:38; 8:23).

 Ñandejára okrea vaʼekue Jesúspe raẽvete. La Biblia heʼi Jesús rehe:

•   “Haʼe [...] ojejapo vaʼekue opaite mbaʼe mboyve” (Colosenses 1:15).

•   Haʼe hína “Ñandejára kreasión ypykue” (Apocalipsis 3:14).

 Jesús okumpli pe profesía heʼíva “haʼe hína pe oĩva ymaite guive, pe oexistíva iñepyrũ guive” (Miqueas 5:2; Mateo 2:4-6).

 Haʼe oreko vaʼekue peteĩ puésto iñimportánteva yvágape. Jesús imanduʼa vaʼekue upévare oñemboʼérõ guare Itúape: “Ehejána chéve [...] tareko jey pe autorida areko vaʼekue yma, aĩrõ guare nde ykére ko múndo oexisti mboyve” (Juan 17:5).

 Haʼe oipytyvõ Itúape okrea hag̃ua entéro mbaʼe. Jesús ombaʼapo vaʼekue Ñandejára ykére “peteĩ konstruktór ivaletereívaicha” (Proverbios 8:30). La Biblia heʼi Jesús rehe: “Ñandejára ojevale hese ojapo hag̃ua entéro mbaʼe oĩva yvágape ha yvy ape ári” (Colosenses 1:16).

 Ñandejára ombaʼapo Jesús ndive ojapo hag̃ua entéro mbaʼe. Por ehémplo umi ótro ánhelpe ha opa mbaʼe oĩva ko univérsope (Apocalipsis 5:11). Ñandejára ha Jesús ombaʼapo lája oñondive ikatu ñakompara peteĩ arkitékto ha peteĩ konstruktór rehe. Pe arkitékto ojapo umi diseñokuéra ha pe konstruktór katu omopuʼã pe konstruksión oñediseña vaʼekue.

 Haʼe vaʼekue pe Ñeʼẽ. La Bíbliape oñeʼẽ jave Jesúsre ou mboyve ko yvy ape ári oñehenói chupe pe Ñeʼẽ (Juan 1:1). Upéva heʼise Ñandejára ojevale hague Itaʼýra rehe omeʼẽ hag̃ua informasión térã instruksión umi anhelkuérape.

 Amalisia Ñandejára ojevale avei Jesús rehe omeʼẽ hag̃ua imensáhe yvyporakuérape. Oiméne ojevale rakaʼe hese oñeʼẽ hag̃ua Adán ha Évape pe hardín de Edénpe (Génesis 2:16, 17). Ikatu jaʼe avei Jesús haʼe hague pe ánhel ogiáva umi israelítape pe desiértore. Ojeʼe vaʼekue umi israelítape iñeʼẽrendu hag̃ua chupe (Éxodo 23:20-23). a