Pe espíritu sánto haʼe Ñandejára podér, térã pe fuérsa oipurúva ojapo hag̃ua ojaposéva (Miqueas 3:8; Lucas 1:35). Ñandejára omeʼẽ térã omondo ijespíritu térã enerhía oimeha lugárpe oñekumpli hag̃ua ivolunta (Salmo 104:30; 139:7).

 La Bíbliape pe palávra ojetradusíva “espíritu”, hebréope haʼe rúaj ha griégope pnéuma. Ha pyʼỹinte ojepuru koʼã palávra oñeñeʼẽ hag̃ua Ñandejára fuérsare térã ijespíritu sántore (Génesis 1:2). Upéicharõ jepe la Bíbliape ojepuru avei koʼã palávra oñeñeʼẽ hag̃ua ótra kósare, por ehémplo:

•   Pytu térã rrespirasión (Habacuc 2:19; Apocalipsis 13:15).

•   Yvytu (Génesis 8:1; Juan 3:8).

•   Pe fuérsa de vída orekóva umi persóna térã animál (Job 34:14, 15).

•   Peteĩ persóna aktitu térã opensa lája (Números 14:24).

•   Ñandejára ha umi ánhel (1 Reyes 22:21; Juan 4:24).

 Upéicharõ, ni peteĩva koʼã mbaʼe ndaikatúi jahecha, péro si ikatu jahecha pe rresultádo térã efékto oguerekóva. Upéicha avei Ñandejára espíritu “ojogua pe yvytúpe, ndaikatúi jahecha ni japoko hese, péro ipoderóso” (Diccionario expositivo de palabras del Antiguo y del Nuevo Testamento exhaustivo, de William E. Vine).

 Pyʼỹinte la Bíbliape oñeñeʼẽ jave Ñandejára espíriture ojeʼe voi haʼeha “ipo” térã ‘ikuã’ (Salmo 8:3, nóta; 19:1, nóta; Lucas 11:20, nóta; ekompara Mateo 12:28 heʼívare). Umi artesáno vale ningo oipuru ipo ha ikuã ojapo hag̃ua umi traváho neporãva, upéicha avei Ñandejára oipuru ijespíritu ojapo hag̃ua koʼã mbaʼe:

•   Pe univérso (Salmo 33:6; Isaías 66:1, 2).

•   La Biblia (2 Pedro 1:20, 21).

•   Isiervokuéra yma guare ojapo hag̃ua milágro ha opredika hag̃ua (Lucas 4:18; Hechos 1:8; 1 Corintios 12:4-11).

•   Oipytyvõ isiervokuérape ohechauka hag̃ua umi kualida porã oúva chugui (Gálatas 5:22, 23).

Pe espíritu sánto ndahaʼéi peteĩ persóna

 Ikatu jaʼe pe espíritu sánto ndahaʼeiha peteĩ persóna pórke la Bíbliape oñeñeʼẽ jave hese ojeʼe haʼeha Ñandejára po, ikuã térã ipytu (Éxodo 15:8, 10). Peteĩ artesáno ojapo jave itraváho umi ipo ndaikatúi ojapo mbaʼeve ijehegui reínte. Upéicha avei Ñandejára oipuru ijespíritu sánto ojapo hag̃ua haʼe oipotáva, pe espíritu ndaikatúi ojapo mbaʼeve ijehegui reínte (Lucas 11:13). La Bíbliape oñekompara avei Ñandejára espíritu pe ýre, ha ohechauka avei heta mbaʼépe ojoguaha pe jerovia ha entendimiéntope. Entéro koʼã komparasión ñanepytyvõ ñantende hag̃ua pe espíritu sánto ndahaʼeiha peteĩ persóna (Isaías 44:3; Hechos 6:5; 2 Corintios 6:6).

 La Biblia heʼi Ñandejára heraha Jehová, ha Itaʼýra heraha Jesucristo, péro ni peteĩ hendápe ndeʼíri pe espíritu sánto orekoha héra tee (Isaías 42:8; Lucas 1:31). Disípulo Esteban omano mboyvemi ohecha vaʼekue peteĩ visiónpe pe yvága, ha upérõ haʼe heʼi ohecha hague mokõi persónapente, ndeʼíri oĩ hague mbohapy. La Biblia heʼi voi: “Haʼe katu henyhẽ espíritu sántogui, omaña pe yvágare ha ohecha Ñandejára podér ojajái ha omimbipáva hína, ha Jesúspe oñemboʼyha Ñandejára deréchape” (Hechos 7:55). Ñandejára oipuru vaʼekue ijespíritu sánto ohechauka hag̃ua Estébanpe upe visión.

 Ojeʼéva jepi: Pe espíritu sánto haʼe peteĩ párte oĩva pe Trinidápe, ohechaukaháicha Mateo 28:19, 20.

 La verda: Mateo 28:19, 20-pe oñemensiona ‘pe Túa, pe Taʼýra ha pe espíritu sántope’ oñondivepa, ha upévare oĩ opensáva haʼeha peteĩ trinida. Péro eleemína ndete voi umi versíkulo, ¿añetehápe piko pe téxto heʼi mbohapyvéva haʼeha peteĩ dios añónte? ¿Heʼi piko upépe mbohapyvéva ikatuha oiko pára siémpre, orekoha la mísma autorida ha peteĩcha ipoderóso ha iñaranduha? No, pe téxto ndeʼíri upéva. Oĩ hetave téxto oñeʼẽva mbohapyvévare, péro upeichaiténte avei ñantendekuaa umíva.

 Ojeʼéva jepi: Pe espíritu sánto ojapo heta mbaʼe ojapóva jepi umi persóna, upévare jaʼekuaa haʼeha peteĩ persóna.

 La verda: Añetehápe la Biblia heʼi jepi pe espíritu sánto ojapoha heta mbaʼe peteĩ persónaicha. Por ehémplo Jesús heʼi vaʼekue pe espíritu sánto haʼeha peteĩ ajudánte ha haʼe ikatuha ñandegia, oñeʼẽ, ohendu, omombeʼu oikuaáva, omombaʼeguasu ha ojapo hetave mbaʼe (Juan 16:7-15). Péro upéva ndeʼiséi katuete haʼeha peteĩ persóna, pórke ótra párte la Bíbliape oñeñeʼẽ avei upéicha pe arandúre, ñemano ha pekádore (Proverbios 1:20; Romanos 5:17, 21). Por ehémplo heʼi pe arandu ‘oñemoĩha pe siuda rokẽme ha hatã oñeʼẽha’, ha ótra pártepe heʼi avei pe ñemano ‘oñesorprendeha’ (Proverbios 8:3; Isaías 14:9).

 Ojeʼéva jepi: Pe vautísmo ojejapo vaʼerã pe espíritu sánto rérape, upéva ohechauka haʼeha peteĩ persóna.

 La verda: La Bíbliape ojeʼe jave ojejapoha peteĩ mbaʼe ótro rérape, heʼise orresivi hague pe podér térã autorida ojapo hag̃ua upéva (Deuteronomio 18:19-22; Ester 8:10). Upéicha avei, ñahendu jepi ojeʼeha ojejapoha heta mbaʼe “en el nómbre de la léi”, péro upéva ndeʼiséi pe léi haʼeha peteĩ persóna. Upéicharõ, peteĩ persóna ojevautisáramo pe espíritu sánto rérape, heʼise orrekonoseha mbaʼéicha Ñandejára oipuru ijespíritu sánto okumpli hag̃ua ivolunta (Mateo 28:19).

 Ojeʼéva jepi: Jesús apostolkuéra ha umi kristiáno ypykue oguerovia vaʼekue pe espíritu sánto haʼeha peteĩ persóna.

 La verda: La Biblia ha pe istória ohechauka upéva ndasiertoiha. Pe Encyclopædia Britannica heʼi ‘áño 381 después de Crístope ae ojeʼe hague pe Espíritu Sánto haʼeha peteĩ Dios, ha upéva oñepyrũ pe Concilio de Constantinóplape’. Ha ko mbaʼe ningo oiko mas de 250 áño pe último apóstol omano rire.