Ore testígo de Jehová ningo roipytyvõ ore famíliape, ha avei ótro famíliape ojogueraha porã ha ovyʼa hag̃ua. Ha rojapo upéva rorrekonoségui Ñandejára omoñepyrũ hague pe família (Génesis 2:​21-​24; Efesios 3:​14, 15). La Biblia rupive, Ñandejára omeʼẽ heta konsého oipytyvõmava hetaiterei héntepe ko yvy tuichakuére omombarete hag̃ua imatrimónio ha ovyʼa hag̃ua.

 La Bíbliape oĩ konsého ména, tembireko, ha tuvakuérape g̃uarã. Ha ore roñehaʼãmbaite rupi romoĩ en práktika umíva, orepytyvõ rokumpli porã hag̃ua ore rresponsavilida (Proverbios 31:10-31; Efesios 5:22–6:4; 1 Timoteo 5:8). La Biblia avei oipytyvõ umi família naentéroi orekóvape la mísma rrelihión ojogueraha porã hag̃ua (1 Pedro 3:​1, 2). Eleemína mbaʼépa heʼi koʼã persóna orekóva iména térã hembireko haʼéva testígo de Jehová:

•   “Romenda ramóme, mbaʼeve nosẽi oréve rohaʼarõ haguéicha ha pyʼỹi roiko vai. Ha seis áñore rosegi upéicha, péro upéi che rembirekógui oiko testígo de Jehová. Upe guive Ivete iñamorósa ha ipasiensiave. Haʼe nokambiáirire, ore matrimónio ymáma oñehundi vaʼerãmoʼã.” (Clauir, peteĩ karai oikóva Brasílpe)

•   “Che apensa vaʼekue umi testígo de Jehová ombyaiha umi família. Upévare che ména Chansa oñepyrũrõ guare ostudia la Biblia hendivekuéra, añemoĩ mbarete vaʼekue hese. Péro upéi ahechakuaa umi konsého oĩva la Bíbliape ideprovechoiterei hague oréve romombarete hag̃ua ore matrimónio.” (Agness, peteĩ kuñakarai oikóva Zámbiape)

 Rosẽ jave ropredika, ore testígo de Jehová rohechauka ore rapichakuérape mbaʼéichapa umi konsého oĩva la Bíbliape ikatu oipytyvõ chupekuéra koʼã mbaʼépe:

•   Odesidi porã hag̃ua mávarepa omendáta

•   Osolusionakuaa hag̃ua umi provléma oñepresentáva pe matrimóniope

•   Ojogueraha porã hag̃ua isuegrokuérandi

•   Oipuru porã hag̃ua pe pláta

•   Ani hag̃ua ojodiskutive

•   Oñoperdonakuaa hag̃ua

•   Ohekomboʼe porã hag̃ua ifamíliape

 Sapyʼánte ikatu oĩ mimi. Áño 1998-pe, peteĩ emprésa hérava Sofres ojapo vaʼekue peteĩ enkuésta 20 matrimónio oĩhápe ména térã tembireko oiko vaʼekue chugui testígo de Jehová, ha otopa ke peteĩnte umíva apytégui iprovléma heta hague.

 Jesús heʼi vaʼekue idisipulokuérape ikatuha iprovléma hogapýpe osegi rupi chupe (Mateo 10:32-​36). Pe istoriadór Will Durant omombeʼu yma Rómape ojeʼe hague ‘umi kristiáno káusare ojeseparaha umi família’. a Ha péicha ojeʼe jepi avei koʼág̃arupi umi testígo de Jehováre. Péro, ¿siértopa upéva?

 Ojeakusárõ guare umi testígo de Jehovápe oseparaha umi família, pe Tribunal Europeo de Derechos Humanos osẽ ifavorpekuéra. Ko trivunál heʼi heta vése oĩha provléma peteĩ famíliape, umi ndahaʼéiva Testígo “ndorrespetái rupi pe derécho orekóva káda uno odesidívo mbaʼe rrelihiónpa osegíta”. Ha heʼi avei “koʼãichagua provléma oĩnteha voi umi família naentéroi orekóvape la mísma rrelihión, ndahaʼéi katuete oĩ rupi peteĩ haʼéva testígo de Jehová”. b Péro oĩramo jepe ore família apytépe oñemoĩva orerehe, ore testígo de Jehová roñehaʼãmbaite rosegi ko konsého oĩva la Bíbliape: “Ani pemyengovia avavépe ivaíva ivaívape [...]. Peñehaʼãmbaitékena peiko pyʼaguapýpe enterove pende rapichakuéra ndive” (Romanos 12:17, 18).

 Ore testígo de Jehová rosegi pe mandáto oĩva la Bíbliape heʼíva romenda vaʼerãha ‘peteĩ ojeroviávare Ñandejárare añoite’, upévare romenda peteĩ ore rrelihionguárente, roguereko rupi la mísma kreénsia (1 Corintios 7:​39). Ko mandáto omeʼẽva Ñandejára orepytyvõ rovyʼa ha rojogueraha porã hag̃ua. Áño 2010-pe, peteĩ rrevísta hérava Journal of Marriage and Family, heʼi vaʼekue voi peteĩ artíkulope “umi omendáva orekóramo la mísma rrelihión, tradisión ha kostúmbre rrelihiósa” ojogueraha porãveha. c

 Upéicharõ jepe, ore testígo de Jehová noromokyreʼỹi avavépe ojopoi hag̃ua iména térã hembirekógui ndahaʼéi rupi Testígo, síno rokumpli avei ko mandáto oĩva la Bíbliape: “Peteĩ ermáno orekóramo hembireko ojeroviaʼỹva Ñandejárare, péro hembireko opytase hendive, ani oheja chupe. Peteĩ ermána orekóramo iména ojeroviaʼỹva Ñandejárare, péro iména opytase hendive, ani oheja chupe” (1 Corintios 7:​12, 13).