Ore testígo de Jehová ningo roipuru heta traduksión de la Biblia rostudia hag̃ua. Oĩ heta idióma orekómava pe Traducción del Nuevo Mundo de las Santas Escrituras, ha upéva romombaʼe ha roipuruve orekógui Ñandejára réra, ha avei ojetradusi rupi hekópe ha oñentende hag̃uáicha.

•   Oreko Ñandejára réra. Heta Bíbliape noñemoĩri upe oskrivika vaʼekue réra ha omombaʼeve oimeraẽvape. Por ehémplo, peteĩ Bíbliape ojeagradese mas de 70 persónape oipytyvõ haguére ojejapo hag̃ua upe traduksión ha oñemoĩ voi káda uno réra, péro ni peteĩ hendápe noñemoĩri upe oskrivika vaʼekue réra: Jehová.

   Péro pe Traducción del Nuevo Mundo omoĩmbaite jey Ñandejára réra umi kuatiañeʼẽ ypykuépe oĩ hagueichaite, ha ni peteĩ hendápe noñemoĩri umi otradusi vaʼekue réra.

•   Ojetradusi hekópe. Heta traduksiónpe noñemoĩri umi mbaʼe iñimportánteva omboʼéva la Biblia ha oñemoĩ ótra kósa. Por ehémplo, Mateo 7:13-pe oĩ Biblia heʼíva: “Peike pe okẽ ipoʼívarupi, ipégui pe okẽ ha pe tape ohóva infiérnope”. Péro pe kuatiañeʼẽ ojehai ypy vaʼekue ndeʼíri infiérno, síno “ñehundi”. Heta otradusíva la Biblia omoĩntema “infiérno”, ogueroviágui umi heko añáva ohotaha osufri opa árare tatarendýpe, térã infiérnope. Péro la Biblia ndeʼíri upéva. Upéicha rupi pe Traducción del Nuevo Mundo otradusi upe téxto kóicha: “Peikékena pe okẽ ipoʼívarupi; cháke tuicha hína pe tape oporogueraháva ñehundípe”.

•   Ndahasýi oñentende hag̃ua. Umi Biblia ojetradusi porãva, ndahaʼéi ojetradusínteva hekópe, síno avei isensíllo ha ndahasýi vaʼerã oñentende hag̃ua. Por ehémplo, heta Biblia otradusi Mateo 5:3 kóicha: “Ovyʼa vaʼerã umi ohechakuaáva imboriahuha ipyʼapýpe”. Péro noñentendeporãi rupi, pe Traducción del Nuevo Mundo otradusi ko téxto isensilloveháicha ha oñentende porã hag̃ua: “Ovyʼa umi ohechakuaáva oikotevẽha Ñandejárare”.

 Jahechaháicha, pe Traducción del Nuevo Mundo oreko Ñandejára réra, ojetradusi hekópe ha ndahasýi oñentende hag̃ua. Péro ndahaʼéi upéva añónte, ko Biblia noñevendéi ha oĩ heta idiómape. Upéicha rupi heta hénte ikatu olee iñeʼẽtépe ha imboriahúva jepe ikatu oreko peteĩ Biblia.