Jehová omee yandeve metei regalo ikavi ete vae: kuae ko Biblia jare oime güɨnoi 66 tembikuatía reta. Ipuere ko reparandu ndeyeupe: “¿Kia güi pa ou Biblia? ¿Kia iyemongeta reta pa?”. Yamboyevɨ vaerä kuae, yaecha kërai ñanoi Tumpa iñee yandeara rupi.

1. Yepe tëi kuimbae reta oikuatía Biblia, ¿kërai pa yaikuaa Tumpa iñee ko?

40 kuimbae reta —jókuae kuimbae reta oyoavɨ iparavɨkɨ reta jare ketɨ ketɨ güi metei ñavo— oikuatía Biblia. Oyemboɨpɨ oyekuatía año 1513 ndei Jesús oa ɨvɨ pe mbove jare opa oyekuatía año 98 yandeara rupi. Yepe tëi oyemboɨpɨ güive oasa 1.600 año oyekuatía vae, Biblia mbaetɨ oyoavɨ. ¿Maera pa mbaetɨ oyoavɨ? Echa Tumpa iñee ko (emongeta 1 Tesalonicenses 2:13). Kuae kuimbae reta mbaetɨ oikuatía iyemongeta retaño. Ërei, “espíritu santo etei omombeu chupe reta jei reta vaerä Tumpa iñee” (2 Pedro 1:21). a Espíritu santo rupi, Tumpa omombeu kuae kuimbae reta pe oikuatía vaerä jae iyemongeta reta (2 Timoteo 3:16).

2. ¿Kia reta peguarä pa oyekuatía Biblia?

Biblia ipuere omborɨ kia reta “opaete tëtaguasu reta pe, ñemuña reta, ñee ambuae mbuae reta pe jare tëta reta pe” (emongeta Apocalipsis 14:6). Tumpa jemimbota ramo oyemboasa jeta ñee reta pe. Jare mbaetɨ oime ïru tembikuatía Biblia rami. Yepe tëi matɨ oiko jare ambuaeyee iñee, kia reta ipuere oikuaa Biblia jei vae.

3. ¿Kërai pa Jehová oyangareko Biblia re?

Oyekuatía vaerä Biblia oiporu reta mɨmba ipire jare ɨvɨra rokɨ papiro jee vae, yavaimbae oikomegua vae. Ërei kuimbae reta oaɨu ramo Biblia oyapo reta jeta copia ipo pe etei. Kia reta mbaepuere güɨnoi vae oipota tëi omboai Biblia, ërei oime kia reta oyangareko Biblia re oaɨu ramo yepe tëi yavai. Mbaetɨ kia ave ipuere oyopia Jehová omombeu yandeve vae. Biblia jei: “ñaneTumpa iñee oiko jekuae avei” (Isaías 40:8).

 YAIKUAA KATU VAERÄ

5. Yepe tëi oipota omboai reta Biblia jekuaeño oiko yandeara rupi

 6. Tembikuatía opaete peguarä

Biblia jeta yeyé oyemboasa ïru ñee reta pe jare jeta yeyé oñemoai ïru tembikuatía güi. Pemongeta Hechos 10:34, 35 jare peyemongeta jese:

• ¿Maera pa Tumpa oipota opaete ɨvɨ rupi omongeta iñee ae pe?

• ¿Mbae pa nemopɨakañɨ Biblia re?

 YAYEMBOE MA VAE

Biblia Tumpa iñee ko, jáeramo opaete kia reta ipuere omongeta iñee ae pe.

Emoësaka

• ¿Mbae pa oipota jei Tumpa omombeu kuimbae reta pe oikuatía vaerä Biblia?

• Reyemboe ma yave kuae yemboe pe, ¿mbae pa má ikavi ndeveguarä Biblia regua?

• ¿Kërai pa reñemosiente reikuaa yave Tumpa oipota ko remongeta iñee?