Bibliape ciencia wamintikwaimpurap tør waminchipik køn científicos pørik kømuinkucha. Møimpe ashchap Biblia chi kusrenanikwan. Ilan pørøp uras misakmera ciertonik kui køremuinkucha møya científicosmera Bibliayu eshkaikpe ciertonik kui kenamarik køn.

•   Srømpalasrøwanpa Pirøwanpa ellmarilø kuik køn (Génesis 1:1). Inchentø metrapsrø møiløpe Pirøwanpa srømpalasrøwanpa maik køpash ka yantøkutri pølpasrik køn cha chipelø køn. Inchen Babiloniosmerape nu piyu par tiusesmera kal-lapelø ketriku chi køpikwan marik køn tan. Inchen møiløpe chi køpikpe kan latrø nu srukyukutri kal-laik køn tan.

•   Yu Pirau chikøpen puraipikpe kape chikøpen mara pønsrailøpe maik køntrapikwan mømaytø pøntrøntrapikwan tamara pønsrailø køn (Job 38:33; Jeremías 33:25). Inchen møiløpe treek isupelø køn misakmeran chikøpen trømpøik pureipasan cha yu Pirau warainuk tru tiusesmera ka nømuimpuraptø isupelø.

•   Ik Pirøpe chikucha kemørimíik pasrapik køn (Job 26:7). Inchen metrapsrømpe møiløpe treek isupelø kuik køn. Kan nu ushawai pala pasran cha kan búfalo kape kan tortuga.

•   Pikapmera pimaymerape tru sre puinukkutri kal-lapelø køn (Job 36:27, 28; Eclesiastés 1:7; Isaías 55:10; Amós 9:6). Inchen griegosmerape tru pikapmera kape pimaymerape tru nu piyukutri kape marsrønkutri pirø umpuwan piya yantø pirøsrø we kal-lawa, trencha ik pimera kal-lapelø køn cha isupelø kuik køn, siglo 18srønkatik treek isupelø kuik køn.

•   Tunmerape pirø umpukutri wetrua nøtrørap kape mermap ampupelø køn (Salmo 104:6, 8). Inchen møiløpe pi umpu pøntrøwa møin kenamisrøp amtrupelø køn. Inchen møiløpe isupelø køn tunmerane tru tiusesmera nøm aship mara pønsraik køn cha øyeek pøntrøntrai.

•   Chishelø kømikpe kuantrøkar kømik purukupik køn. Jeupa israelitasmeran karuik køn kan kuapikwan katerawa tasikwan kinamik køn cha. Nentraptø kuantrømera tøkakuape 40 kualømmera nøørømarik tsumik køncha, chap pølape kasramik kuik køn cha (Levítico 11:28; 13:1-5; Deuteronomio 23:13). Inchen metrapsrø egipciosmerape misak pøiwantøwai køtrintinuk srølamik marøpelø kuik køn.

 Møiløpe trenchipelø køn científicosmera Bibliaimpurap wetøasikpe isa kusrenanilø tøkaik kui. Inchentø Biblia kusrenanikwan tap trawashene treek kømui kenamarøpik køn. Ashkun científicosmera chipurap isa wamintikwan.

 Isa wamintik: Bibliape trenchipik køn tan pirøwanpa srømpalasrøwanpa 6 kualømmerayutø marik køn tan cha.

 Ciertonpe maik kui: Bibliape trenchipik køn: “Ke srøtø chigucha chigaaben, Tiusbe srømbalameranba, pirøwanba mara pasrik køn” (Génesis 1:1). Katøkanpurappe eshkamøn Génesis capítulo 1yu eshkapikpe kan kualøm tru 24 urasyutø marik kømui. Génesis 2:4 kenamarøpik køn pirøwanpa srømpalawanpa tru Tiuswaimpe marøppe kan kualømyu lataiktø marik kui.

 Isa wamintik: Bibliape trenchipik køn tan srøtø marøppe pøsrwan kømø tru tusrmeranmetrik mara pasrik kui (Génesis 1:11, 16).

 Ciertonpe maik kui: Bibliape trenchipik køn Tiuspe chine tusrwan marmuatø srømpalasrø chi køpikwan marik køn cha incha truyupe tru pøsrwanpa (Génesis 1:1). Pølpasrøpyutø pøsr pasrainkucha ik pirøpe katøkucha tap asamkeik pasraik køn inchen yantø pøn kualøm purayaisrømpe yantø pirø maik kuikwan asamtik kuik køn (Génesis 1:3-5, 12, 13). Trukutri yanayupe yantø tusrmerakucha yantø kal-lap nøtrørap mentik køn kakentø pøsrpe yantø kenapasraik køn (Génesis 1:16).

 Isa wamintik: Bibliape trenchipik køn tan pøsrpe Pirø pøtøpurap llirapik køn cha.

 Ciertonpe maik kui: Eclesiastés 1:5 trenchipik køn: ‘‘El sol sale y el sol se pone; entonces regresa rápidamente al lugar por donde vuelve a salir’’. Bibliayu tru eshkappe tru misakmera yu pirau warapelø pøsrwan maik asikwantø eshkapik køn. Kakentø misakmerape ashippe tru pøsr neeship katøle køtraipik kui asan. Inchentø Pirø køn tru pøsr pøtøkatan llirapikpe.

 Isa wamintik: Bibliape tru Pirø ka chamaitø køn tan chipelø køn.

 Ciertonpe maik kui: Tru Biblia pirø mupa kuimpurap purø yapsrø tøkaik køn tainkucha, tru Pirøpe ørøpa chatø køn chimøn incha tru patsapik tøkaik køn chimøn. Tru Biblia 4 extremos de la tierra chippe pirøwaimpurap tapchik waminchan trentan. Biblia øyeek lataitøwai chipik køn kaken pøsr kal-lapkatøsrønkutrielø køpen pøsr kepipkatøsrønkutrielø køpen ampøkutrielø køpen ikutrielø køpen chippe (Isaías 11:12; Lucas 13:29).