Øø, treekwain køn. Tiuspe nui misakmeran tarømisrmø ampupelan, nøm kuantrø warøpen, isui inchipik køn. Trupurap Bibliape trenchipik køn: “Nui misakmeran kuantrø warøpen Jeupa untaktøka purukupik køn” (Salmo 41:3). Mø maramka kuantrø warøpen ik pønkatø eshkapik namun purukuntrun:

1.   Jeupawan “fuerzas trantra cha” miamik køn. “Tius tru chi isumgaig tab købig chi isuilan purab nuibe” namun purukuntrun chikucha isumø pøntrømøntrap trektøwai namun fuerzas trantrun nam metraptø amtrai (Filipenses 4:6, 7).

2.   Tapikwantø isumik køn. Bibliape trenchipik køn tru nam kasrakelø køpene latrø tap mø mutsik lataik køn, inchen pusrkuai isui wapikpe nui fuerzaswanken patsøkøntrun (Proverbios 17:22). Chikøpen puintøkucha kasrak putrøpene namun purukuntrun isuintelø putrainkucha trektøwai kuantrø misrmøntrai.

3.   Tapik attrapikwan kasrak muniramik køn. Nam kuantrø kuinkucha tapik attrapikwan munirapene namun purukuntrun kasrak amtrai (Romanos 12:12). Tiuswai Wampe namun trenchipik køn: Wentøsrø “muken ‘kuantrø tsur’ chimøntrun cha” (Isaías 33:24). Tiuspe kuantrømeran patsøkøntrun, møkelø kaimaiwan. Bibliape trenchipik køn køllielø mantø katøle urektelø misrtrap kui: “Que su carne se vuelva más fresca que cuando era joven; que él tenga otra vez el vigor de su juventud” (Job 33:25, Pulø wammay).

 Pititø pørik: Jeupawaiwan waminchipeløpe Tius purukuikwan confiapelø ker, inchen namun kuantrø misren mø marøpelan lapelø ker (Marcos 2:17). Inchentø, mø maramikwan obligamelø ker kakentø kan kan nøm isua martraimpe.