Ñi internet manejapik kuikkutrimpe pornografíape chu uraskøpen wepatrupik køn. Kan srusrø 17 añosik Hayley munchi trentaik køn: “Møimpe pornografían lamuintøkucha trurø kenamisrøpik køn”.

 Hasta møikkøpen pornografían ashmøntrap mur isua pøntraintøkucha inchippa kenamisrene ashchap inchun. Kan matsinø 18 añosik tøkaik Greg munchi trentaik køn: “Manaken pornografíape ashmumøntrurmap isua unik køn, inchentø kan kualøm kenamisren asik køn, nan øyeekpe puraimøntrun chippe isumøta”.

 Møin kualømwane mas pornografíape trurø kenamisrøpik køn, sexteotøkape mas møiløpe marøp truilan trurø nerøpelø køn.

 ¿Ikpe namun chi isunanønkarup pasra? Møimpe pornografía kenamisrmøntrai intamikpe latrø murik køn, ñimui møskalø, awelumera urektelø køpensrømpe øyeek kenamisrmelø kuik køn. ¿Møimpe nampe chi martrap? ¿Wentøpasramik mur køntrauta? (Salmo 97:10).

 Kak, kaimamtik kømøn inchentø srøtø nepua asamik køn chinchakutri pornografía asamik latrø kaik kuikwan. Ashkun møilø misakmera chi isupelø kuikwan pornografíapurap.

 Misakmera isuilø: Møilø misakmera isupelø køn pornografíape chinchimíik kui.

 Maik kuikwan: Pornografía asamikpe køntsø kesrup lataitøwain køn pulmoneswan mintishimøtø ñui isupikwan mintishipik køn. Pornografía asamikpe sexowaimpurap pekmaytø isunanønkarupik køn. Tius sexon marøppe kasharaik umpu tøkakøntrai marik køn, mas kanpalatø amøñintrap isuntrai (Génesis 2:24). Pornografía ashipeløpe kalø kuikwan tapelø kui aship mentapelø køn. Por ejemplo, nøtrø kusrepelø trenchipelø køn møkelø pornografía ashipeløpe ishumpurwan kutra kutsamikpe kalø kømíik kui isupelø køncha.

 Bibliape møilø misakmeraimpurap waminchipik køn yantø chi kørikken kar misrikkutrimpunøpe yantø kaik maramikwantø martrap kepaampupelø køn (Efesios 4:19). Ik misakmerape nømui isup kepachipik yantø eshkamíik tøkar kua, kalø maramikwane chi kømui lataik ashipelø køncha.

 Misakmera isuilø: Møilø misakmera trenchipelø køn pornografía asamikpe sexualidadwaimpurap mas kusrenanøpik køn chip.

 Maik kuikwan: Pornografía asikpe katøkanelø tøkakuikwan mas chull ashchai purukupik køn. Tøkakuiktøkatø kasrak uñmøntrai, sexotø tøkakøntraptø isunanønkaruntrun ñuin chull kuikwan purørtrap. Katøkanpurappe, møiløpe nu kusrepelø trenchipelø køn: “Pornografía ashipeløpe kasharaik umpupe kasrak amøñimelø køn cha”.

 Biblia trenchipik køn Cristoi wentautø amtrupeløpe ikwan wentøpasramik køn: “Ishukpa møkpa trømpøik kaik marikwan, chikøpen trømpøik martrap køpa isupikwan, parø intamikwanpa, tru parø intikpe Tius mara tøkakui lataik køn” cha (Colosenses 3:5, TNM). ¿Ilø kømuita namun mas kepasrøn karupik pornografíape?

 Misakmera isuilø: Møilø misakmera trenchipelø køn pornografía asamik latrø kørik kui inchipelø køn cha, hasta møilaimpe wamintamkeik køn cha.

 Maik kuikwan: Misakmera pornografían ashmøntrap wentøpasrøpeløpe sexowaimpurap tap isupelø køn maik kuikwan, kasharawarwai asimpe sexope Tius latrø tap ketikchik køn, nømuyasik nøm mas kanpalatø pøntrøntrai. Trukutri kasharawar umpupe relaciones sexuales tøkakuinuk tap kui mørtrun. Trune pornografía ashipeløpe sí treek kui mørøramelø køn.

 Bibliape sexowaimpurap chikucha sørømø waminchipik køn. Por ejemplo, møkelø kasharawarwan trenchipik køn, unøpatø srai laikpa kasrak uñ chipik køn incha chu urastøkucha untak kenamarik ñun mas untak nurantrain cha (Proverbios 5:18, 19).

 ¿Inchen ñun pornografía asamik wentøpasramkeik køpene? Ik lutø kilkayu wetøtrantrun chi maramikwaimpurap “Cómo rechazar la pornografía yu”.

 Chi isumøta, pornografía asamikwan wentøpasramikpe murik kømøn. Inchen inchippa aship uñape, mas ashmøntrap ñune purukuntrun. Kullaramøta ikyukutri wepintrun.

 Kan matsinø Calvin munchi 13 años pilakutri pornografía aship mentik køn, nøpe trentaik køn: “Nape tørtø nepua ashipik kuik køn marøp unikpe kalø kui. Inchentø natøpe kaima unik køn, chap asha wepippe køtrø kalø mørørapik kuik køn naasiktøwai, inchentø kan kualøm nai møskai, aship wapen nan asik køn, ikpe nan latrø nu purukun truyukutri wepiamik”.

 Calvinpe møya pornografíape ashmíik køn. Nøtøwai trentaik køn: “Pornografía aship pølpasrik latrø kalø marøprain køn, møya katøkucha truyu asikwan kanmay nai turyu atrupik køn, katøyu ashchap intinkucha peku isuntrap inchipik kur, por ejemplo, latrø kasrak unik møya pornografía ashmø trukutri Jeupapa trak linchipik kui isur. Katøkanpurappe wentøsrø latrø tap pirøchiku tsumiku isumik latrø nu purukupik køn”.