KUSRENANIK 02

Bibliape nam kasrak waramtik kui eshkan

REPRODUCIR EN

Pirø mupa kuimpurap yam misakmeran trømpøik pup mentikkutri, latrø isuintelø pusrkuai amøñipelø køn. ¿Ñikan øyeeku puraya køtitru? Ñun kuantrø misren kape kan yawik kuapen isuintik unintre. Trømpøik purep pasrøpen ñi paya mørintre: “¿Manakøpen tamisrtrap kø chinta?” cha. Ikpurap Bibliayu eshkaikpe, nam mentra isui inchimøntrai purukupik køn.

1. ¿Wentøsrøwai Bibliape chi tap wammera eshkapik kø?

Yu Pirau trømpøik purep pasrapikwan Bibliape tør marøpik køn. Katøkan tap wam tranøppe, yu Pirau trømpøik purep pasrapikwan Tius pinishintrap køncha eshkapik køn. Bibliayutøwai martrap misrik pøntrapelø “wentøsrøwai tapikwantø muniramik purukupik [køn]” (leu Jeremías 29:11, 12). Møya ik martrap misrilø, namun trømpøik puinkucha awantap melamik, tapik puntraitamap muniramik purukupik køn. Trektøwai nam manakatik kasrak waramtik køntrap kui tørtø kenamarøpik køn.

2. ¿Bibliape wentøsrø maik køntrapikwan mantø eshkapik kø?

Bibliape eshkapik køn wentøsrø “yandø kwamig kawei, kisamig kawei, wamab trasamig kawei, pusrkwabig kawein kønrrun” cha (leu Apocalipsis 21:4). Møya misakmeran trømpøik purainkarupikpe, waacha kømikpa, tap marmeløpa, kuantrømerapa, kuamikpa; iløpe wentøsrø yantø kaantrun. Yu Pirau misakmera Latrø Tap Pirøchiku kasraktø manakatik warøntrap kui, Bibliape martrap misrik køn.

3. ¿Biblia martrap misrikwan treek køntrap kui chintimpa kørewa pasrøku?

Yam misakmera trømpøik purep pasrapikwan tamisrtrai munirap kuinkucha, cierton puntrap kui nepua ashchap kaima køn. Inchentø Bibliape treek kømøn, masken nam Biblia “pørigwan chi køtashchab maig køtashchab” tsøntatø tsøntatø nepua ashene, nø chitø martrap misrilan køremtik køntrun (Hechos 17:11). Biblian kusrep yainuk, wentøsrø nø chitø martrap misriløwaimpurø ñitøwainken køremtik kui nepua ashchun.

MAS NEPUA KUSREU

Bibliayu wentøsrøwai martrap misrilan, trektøwai tru martrap misrilø misakmeran maik purukup pasraikwan ashchap.

4. Bibliape nam manakatik øsik waramikyu isuintelø amøñimøntrai martrap misrik køn

Ñiken ash Bibliayu latrø yam martrap misrilø pøntrapelan. ¿Møikwan mas tap kui ashku? ¿Chincha?

Versículosmera pulu pørik pøntrapelan martrap misriløwaimpurap ley, yu leinuk pinaku paílan waminchap:

Wentøsrø tapik puntraitamap munirap kømik, ¿ik versículosmera purukuntraptik kø chinta? ¿Ñui yawelan, ñui linchipelanpa purukuntraptik kuitamap isua køtitru?

Ñiken isu yu Pirau latrø tapchiku waramikwan:

TRUYUPE MUKUCHA. . .	TRUYUPE MUNTØKUCHA. . .
... kishmøwai, kølliramøwai, kuamøntrun (Isaías 25:8).	... ñui yaumpuilø kuapelan katøle ashchun (Juan 5:28, 29).
... kuantrø kawai, mur kuantrø misra kønøntrap kaimapeløpe kaantrun (Isaías 33:24; 35:5, 6).	... manaken kuantrø misrmø, urektelø latawai uñchun (Job 33:25).
... kalø marøpelø kaantrun (Isaías 32:16, 17).	... mamik latrø nu køp, tap ya køp, trektøwai ñi kuallip uninuk tap kui unamtik køntrun (Salmo 72:16; Isaías 65:21, 22).
... pek misakmerape katøkan pek misakmerapa kuayailø kaantrun (Salmo 46:9).	... pishintø chi isumø uñchun (Salmo 37:11).
... latrø pusrkuantelø purayaikkutri pusrkuap isupiku køtrømisrøpelø kaantrun (Isaías 65:17).	... manakatik kasraktø uñchun (Salmo 37:29).

5. Bibliayu martrap misriløpe nam kasraktø amøñintrai purukupik køn

Yam misakmera trømpøik purep pasraikkutri, kullaraik namik kuilø amøñipelø køn. Møiløpe trømpøik puilan tamartrap trantrapelø køn. Bibliayu trømpøik purep pasraikwan pinishintrap køncha eshkaikpe, møya misakmeran mantø purukupik kuikwan ash. VIDEUN asay, yu videu asinuk pinaku paílan waminchap:

VIDEU: Mayelan lata ashchai mur trantrik køn (4:07)

Videu kenamarinuk, ¿Rafika chi kalø marikwan tamartrap intik kø?
Kalø marilan tamarmuinkucha, ¿Biblia nune mantø purukuik kø?

Bibliayu wentøsrøwai martrap misriløpe, namun chi trømpøik atrinkucha kullaramø kasraktø amønamik purukupik køn. Ley Proverbios 17:22 incha Romanos 12:12, yu leinuk pinaku paílan waminchap:

¿Bibliayu wentøsrøwai martrap misriløpe, møya ñui øsik uninuk mas tammisren karuntraptik kø chinta? ¿Chincha?

MØILØPE TREEK ISUPELØ KØN: “Bibliayu martrap misriløpe cierton treek kømuintrun” cha.

¿Chintimpatre tap kø ñiasiktøwai Bibliayu martrap misrilø cierton køtashchap nepua ashchap intamik?

¿CHI KUSREKU?

Bibliayu martrap misrikpe wentøsrø tap kasraktø amønamtik køntrun. Ikkutri namun tapikwan muniramik kullaramø kasraktø amønamtik køntrai purukupik køn.