KUSRENANIK 16

¿Jesús yu Pirau uñip uras chitø marik kø?

REPRODUCIR EN

Misakmera Jesúswaimpurap isuppe treek isupelø køn: kan lamø unøtø lataik kui, kape Tiuswaiwan eshkapiktø kui, kape kan møk kuantrap atrupiktø kui. Inchentø Jesús yu Pirau uñip uras chitø marikwan ashene, nø maik kuikwan tap nepua ashchun. Ik kusrenaniku, nepua ashchun Jesús yu Pirau uñip uras chitø marilan incha ñun mantø purukuntraptik kuikwan.

1. ¿Jesús yu Pirau uñip uras chiwan mas marik kø?

Mas marøppe, tru misakmeran “Tius nø ashib karub pasrainuguigwei tabig srøigwan eshkab” kusrenanik køn (leu Lucas 4:43). Jesús eshkaik køn, Tius Nø Aship Karup Waikpe yu Pirau karup pølpasren latrø trømpøik pup pasrapikwan tamartrap kui. a Jesúspe pøn pilai tøpøpa ik tap srø wammeran misakmeran kusrenanøp unik køn (Mateo 9:35).

2. ¿Jesús marampurap mariløtøka chi kenamarik kø?

Bibliape treek eshkapik køn, tru “maramburab mariitøgaba, kwaara asha kønrrai” marik køncha, Tius Jesúspa pasraik kenamarik køn (Hechos 2:22). Tius marampurap traniktøka, Jesúspe pi latøkuship atrupikwan kenømøntrai wasrønchik marøp, kuantrelan tamarøp, tru kuapelan katøle øsiranøp intik køn (Mateo 8:23-27; 14:15-21; Marcos 6:56; Lucas 7:11-17). Jesús marampurap mariløtøka kenamarik køn, Tius nun yu Piraumay ørik kui trektøwai Jeupa trømpøik pup pasrapikwan tamartrap kui.

3. ¿Jesús maik uñipik kuikpe namun chi kusrenana?

Jesúspe Jeupawan chu uratøkucha møra marik køn (leu Juan 8:29). Nun søtøkatinkucha nui Møskai maik taikwan tarømisrmø kuamnekatik møra marik køn. Treek mariktøka kenamarik køn, tru mur kualømmera puinkucha Jeupawan tarømisrmø møra maramtik kui. Øyamaytøwai, Jesúspe nui wentautø ampupelan “nøm maig uñibig køben,” nøm “treetøwei asha kusrenrrain kuig køn, [nøm] truwandøwei amøñibelø” køntrai (1 Pedro 2:21).

MAS NEPUA KUSREU

Ashkun Jesús mantø tap srø wammeran kusrenanøp unikwan incha marampurap marilan mantø marikwan.

4. Jesúspe tap srø wammera eshkaik køn

Purø trømpø usrø kutrap maypurap Jesúspe latrø yapsrø ipik kuik køn, tru tap srø wammeran misakmeran waminchip. Ley Lucas 8:1, yu leinuk pinaku paílan waminchap:

¿Jesúspe nun mørtrap kemallipelantø kusrenanik kø chinta?
¿Jesús misakmeran tap srø wammeran waminchap chi marik kø?

Tiuspe eshkaik køpik køn tru Mesíaspe tap srø wammera waminchap kui. Ley Isaías 61:1, 2, yu leinuk pinaku paílan waminchap:

¿Øyeek chap eshkaikwan Jesúspe nepuntrai chi marik kø?
¿Møin kualøm misakmerakucha tap srø wammera møramik palailø kø chintera?

5. Jesús latrø tapikwan kusrenanik køn

Jesúspe Tiuswai tap srø wammerantø kusrenanmøtø, misakmeran tap amtraikucha kusrenanik køn. Ashkun Tap Wammera Nu Tunyu Wamisra Jesús kusrenanikwan. Ley Mateo 6:14, 34 incha 7:12, yu leinuk pinaku paílan waminchap:

¿Ik versículosmerayu Jesús chi tap wammera ketik kø?
¿Ik tap wammera møin kualøm misakmeran purukupsru chintera?

6. Jesús marampurap marik køn

Jeupa marampurap martrai traniktøka Jesúspe køremkeilø marik køn. Kan ejemplo ashchap, ley Marcos 5:25-34 kape VIDEUN asay. Yu videu asinuk pinaku paílan waminchap:

VIDEU: Kan ishukwan trømpø kuantrø tøkaikwan tamarik køn (5:10)

¿Videu kenamarimpala ishukpe chi tørtø isua pasraik kø?
¿Ik køremkeik marikukutri chi mas kustata?

Ley Juan 5:36, yu leinuk pinaku paíkwan waminchap:

¿Jesús øyeek marampurap marikpe chi kenamara?

¿Nepua asha køtitru?

Jesúswaimpurap Bibliayu nepua asinuk Mateo, Marcos, Lucas, Juan namun kusrenanik køn Jesús nø øsik unikwan. Mateo, Marcos, Lucas, Juan pekmaytø pørik køn. Inchentø Jesúswai øsik unikwan pipelø wamintik tørtø kenamaran.

MATEO

primero pørik køn. Jesúswai øsik unikwaimpurø nø mas pørøppe, Jesús kusrenanikwan, nø chi wamintikwan Tius Nø Aship Karup Waimpurap pørik køn.
MARCOS

mas lamøtø pørik kuincha latrø tapchik køn.
LUCAS

mas waminchippe Tiuspa wamintik latrø nuik kui, incha Jesús ishukmisakmeran latrø nu untak kørikpala ashipik kuikwan wamintik køn.
JUAN

Jesús maik kuikwan latrø nu pørøppe, tru Jesús linchipeløpa katøkan misakmerapakucha chi wamintikwan pørik køn.