KUSRENANIK 22

¿Ñipe mantø waminchipsruku Tiuswai tap srø wamwan?

REPRODUCIR EN

Ciertonikwan tør nepua ashape ñipe isuntrun: “¡Mayelø ikwan nepua asamik køn!”. Treek kuin køn mayelø nepua asamik køn. Inchentø ñune kørik kuintrun ñi kusrep pasraikwan wamintamik. Nepua ashkun chi maramikwan kørik kui inchimumikwan katøkan misakmeran tap srø wammera kusreikwan. Bibliayukutri waminchen tap kui mørtrun.

1. ¿Ñui asilan ñipe mantø waminchipsruku ñi kusreikwan?

Jesús kusrenanøp pera unilan trenchipelø køn: “Nam ashib, nam mørøb indigwane nambe elachimø, wamindamønrrun—chibelø køn” (Hechos 4:20). Jesús kusrenanikwan latrø untakelø kuik køn inchakutri nømpe munkøpen waminchipelø kuik køn. ¿Ñikucha trektøwai untarapik køtitru? Ñikucha trektøwai chi ñi kusreikwan katøpurø ñui yawelanpa ñui linchipelan øyamay tammay wamintamik køn (leu Colosenses 4:6).

Waminchap pølpasrtrappe mantø maramikwan

Ñi Bibliatøka waminchap atrik ñui yawelan øyamay waminchun: “Møi truan kusrenanikwan latrø tapik kusrer”.
Ñui linchipik kuantrø tsupen kape isuintik wapen ñipe Bibliatøka wamintamik køn tap kui mørtrai.
Ñi kuallip uninuk ñui lintikwan Bibliayukutri mantø kusreikwan tuluntsunikyu mantø kusreikwan.
Ñipe wamintamikwan ñui linchipelan internetyu jw.org yu, ñipe truyu kenamaramik køn.
Biblian kusrep wapikwan kusrenantra katøkan “lincha cha” eshkantrik kape jw.org purap mantø Biblian kusremikwan miantrai eshkantrik.

2. ¿Ñipe kungrekasiunyuiløpa Tiuswai Wamwan wamintamik chincha tapik kø?

Jesús pera uniløpe srø wamwan maya misakwan wamintik køn. Jesús nui pera unilan srø wamwan waminchap “pagatø pueblosmørig katøganbalømerasrø nø yamsrømay nui merrab” ørik køn (Lucas 10:1). Treek marape, latrø nu misakmera treekwan latrø tap srø wammeran mørik køn. Jesús pera uniløpe Tiuswai srø wamwan waminchip kasrak amøñipelø kuik køn (Lucas 10:17). ¿Kungrekasiunyuiløpa Bibliayukutri waminchap yamik ñunkan kustantrauta?

MAS NEPUA KUSREU

Ashkun nam mantø kørmø wamintamikwan Bibliayukutri. Trektøwai srø wamwan waminchap mantø kasraktø amønamikwan.

3. Jeupa ñipa pasrøntrun

Møiløpe Tiuswai Wamwan kusrenantrap amtrap isupen, chikøpen chintraitamap kørik kui møran.

¿Ñunkan Tiuswai Wamwan waminchap yamik kørik kui mørøpsruku? ¿Chincha?

VIDEUN asay, yu videu asinuk pinaku paíkwan waminchap:

VIDEU: Na chikucha kørmøntrap Jeupawan miaik køn (4:05)

¿Urektelø videu kenamarinuk kørmø wamintamikwan mantø purukuik kø?

Ley Isaías 41:10, yu leinuk pinaku paíkwan waminchap:

¿Kusrenanøp ampinuk kørmøntrap Jeupawan chincha miamik kø?

¿Nepua asha køtitru?

Latrø nu Jeupawaiwan waminchipeløpe metrapsrø Jeupawai Wamwan waminchap kaimamuitamap isupelø kuik køn. Por ejemplo, kan møk Sergio taikma chikucha servimíik kui lataik isui. Katøkaneløpa wamintamikwan kørik kui mørik køn. Pero, kan kualøm isuik køn chincha nø kusrentrap pølpasrik køn Bibliayukutri nui kørik køpikwan waminchap. “Kørik køpentø katøkan misakmeran wamintik køn na chi kusreikwan. Treekkutri, na cuenta penik køn ciertonikpe nan nu purukuntrapik kui, nai mantrau Bibliayu kusreikwan tøkapasraik køn”.

4. Tammay waminchi

Nam munkøpen Tiuswai Wamwan waminchaptø, nam mantø wamintamikwan mømay tamikwan isu. Ley 2 Timoteo 2:24 incha 1 Pedro 3:15, yu leinuk pinaku paílan waminchap:

¿Versículoyu kenamarimpala Bibliatøka mantø waminchap?
¿Møikkøpen namui yawelø kape namui linchipelø Bibliayukutri kusrek kømui inchene nampe mømay martrap? ¿Nampe chiwan marmøntrap?
Nøm chi køreikwan chimøtø masken tammay tsøntatø wamintamik, ¿ikwan chincha tapik kera?

5. Tiuswai tap srø wamwan waminchene namun kasrak køpik køn

Jeupape karua pasrik køn Jesúswan latrø tap wammera waminchai. ¿Jesúspe chi isuik kø? Ley Juan 4:34, yu leinuk pinaku paílan waminchap:

Nam tapik mamik map putraikpe kasraktø amønamik tranik køn. ¿Jesúspe chincha trentaik kø: “Nam Tius maik taikwan møra maramik kan mamik map lataik kui”, truikpe Tiuswai Wamwan wamintik køn?
¿Nam katøkanelan Tiuswai srø wamwan waminchene chi utøntrera latrø tapelø?

Nampe waminchappe mantø wamintik

Tøpø truneyu tuluntsunik yau mantø waminchap kusrenanikwan ash.
Ñui kusrenanøpikwan tøpø truneyu tuluntsuninuk mayelai metrap kenamartrap chi maramikwan paya mørtrik. Øyeek metrap kenamariløpe ñun katøkanelan ñi kusreikwan kørmø waminchai purukuntrun.
“Møiløpe treek isupelø køn” incha “Møiløpe treek payipelø køn” secciónyu ashchi. Tru misakmeran mørøk kømui inchen kape namui paya mørilan mantø løtamik purukuntrun.

MØILØPE TREEK PAYIPELØ KØN: “¿Ñipe ka untitru kuantrø kømø? cha”.