Jeupape ángelesmera mailø kuikwan nepua ashchai isup wan kakentø ángelesmerape nui yawelø kuikkutri. Nømune “Tiuswei nusrkalø” køn cha wamapelø køn (Génesis 6:2; Job 38:7). ¿Bibliape ángeleswaimpurø chi kusrenana? ¿Ángelesmerape chi marøpelø kø? ¿Maya ángelesmera Jeupawai yawelø kø chinta?

1. ¿Ángelesmerape mumera kera?

Jeupape ik Pirøwan marmuatø ángelesmeran marik køn. Jeupa latawai nøm srømpalasrø warap, espíritumera kuikkutri nampe nepua ashchap kaimapelø ker (Hebreos 1:14). Trupa nøtrø ángelesmera pøntrapeløpe kan kan pekmayelø køn (Apocalipsis 5:11). Nømpe “Jeupa maik taikwan, maik karuikwan marøpelø” køn (Salmo 103:20). Metrapsrø, Jeupape ángelesmeran ørøpik kuik køn tru wam sruamtrai trektøwai nui misakmeran purukuntrai. Møya, ángelesmerape Jeupawai misakmeran Tiuswaimpurap kusrek kui inchipelan wetøtrantrai purukupelø køn.

2. ¿Satanáspa kuaimantsikmerapa mumera kera?

Ángelesmera møiløpe Jeupawan wentøpasrik køn. Srøtø ángel Jeupawan wentøpasrøpikpe tru “nugwaimandzig cha wamamba, Satanás cha wamamba indigwan, tru pirau maya misagwan” kekøtrøsrkøpik (Apocalipsis 12:9). Satanás katøkanelan nø karuntrap isuikkutri, srøtø misakmeran Jeupawan wentøpasrtrai marik køn. Yanayutø katøkan ángelesmerankucha trektøwai marik køn. Tru ángelesmeran kuaimantsikmera wamapelø køn. Jeupa nømun srømpalasrønkutri pinøpusrik køn, incha nømun pinishintrap køn (leu Apocalipsis 12:9, 12).

3. ¿Satanáspa nui kuaimantsikmerapa namun mantø kekøtrøsrkøntrap inchipelø kø?

Satanáspa nui kuaimantsikmerapa misakmeran nømui trømpøik mariløtøka kekøtrøsrkøntrap inchipelø køn, nømuimay kemallchai isua. Por ejemplo, møiløma horóscopon lepelø, astrologían ashipelø, piimailø, pishimarilø, misak putrønna kuaimantsikmeraimpurap marilan lapelø køn. Katøkaneløpe kuantrøwan tamartrai mørøpelaisrø ampupelø køn. Trektøwai, møilane kuapeløpa wamintamtik kui køresrkøpelø køn. Pero Jeupape tør eshkapik køn: “Tru kuapeløpa waminchipeløpa chipelaisrø ammøwai, mørøpelaisrø ammøwai intamik køncha” (Levítico 19:31). Jeupape treeløyukutri purømisrtrap isupik køn kakentø Satanáspa nui kuaimantsikmerapa namun kekøtrøsrkøntrap inchipelø kuikkutri.

 MAS NEPUA KUSREU

6. Satanáswan kanamtik køn

Satanáspe nui kuaimantsikmeran karup pasran. Inchentø sølwan marøpelø ángelesmerane arcángel Miguel, tru Jesústøwai, aship karup pasrapik køn. ¿Miguelwai marampurap marikpe maik kø? Ley Apocalipsis 12:7-9, yu leinuk pinaku paíkwan waminchap:

• ¿Mu kera mas marampurap marøpikpe, Miguel nui ángelesmerapa kape Satanás nui kuaimantsikmerapa?

• ¿Cristoi wentautø ampupeløpe Satanáswan nui kuaimantsikmeranpa kørik kui intamik kø chinta?

Ñipe Satanáswan nui kuaimantsikmeranpa kanamtik køntrun. Ley Santiago 4:7, yu leinuk pinaku paíkwan waminchap:

• ¿Satanáspa nui kuaimantsikmerapa ñun kepenøsrkømøntrai chi martrap?

 ¿CHI KUSREKU?

Tap ángelesmerape namun purukupelø køn. Satanás nui kuaimantsikmerapape Jeupawan ashik kømui inchipelø køn, incha nøm trømpøik mariløtøka misakmeran kekøtrøsrkøntrap inchipelø køn.

Kusreikwan katøle isuntrap

• ¿Tap ángelesmerape misakmeran Tiuswan nepua ashchai mantø purukupelø kø?

• ¿Satanás nui kuaimantsikmerapape mumera kø?

• ¿Chincha tap kømø ñi kuaimantsikmeraimpurap marilan lamik?