KUSRENANIK 41
¿Sexopurap Bibliape manchipik kø?
Misakmerape sexopurap wamintamik tap kømui mørøpelø køn. Inchentø, Tiuswai Wampe sexopurap waminchippe kørikpala tørtø waminchipik køn. Jeupa namui Ellmarøpik kuikkutri nøpe namuyasik chi tapik køntrap kuikwan nepua ashipik køn. Tru Biblia nuinukkutri atrupik kuik køppe, sexopurap wamintikpe namun purukupik køn. Nø kasraktø wantrai nam chi maramikwan, trektøwai manakatik kasraktø amøñintrap chi maramikwan kenamaran.
1. ¿Jeupape sexopurap maik isupik kø?
Ishukpa møkpa kashararwarmerayasik Jeupape sexon keta tranik køn. Øyeek marøppe kasharawarmera urek tøkakøntraintø kømø, pailø untak kenamarøp tap puraamtrai marik køn. Inchawai Tiuswai Wampe trenchipik køn: “Ñi matsinø kua ñui srai kasharaikpatø tap puraintrai” cha (Proverbios 5:18, 19). Jeupape kasharawarmera ampukutri ikkutri itølulmøtø warøntrai isun. Treekkutri Cristoi wentautø ampupeløpe manaken itølulmumik køn (leu Hebreos 13:4).
2. ¿Sexo chishik kømíikpe maik kø?
Biblia trenchipik køn “møguelø lata, ishumburmera lata trømbøig marøbelø[pe], […] tru Tius nø ashib karub waigwan truiløbe ketig utømønrrab kui” (1 Corintios 6:9, 10). Metrapsrø Biblian pørøpeløpe, sexo chishik kømuikwan pørøppe griegomaype pornéia pørik køn. Porneíape ilø køn: 1) ishuk køntrun møk køntrun kasharamíik munkøpenwan pera kipen køn a, 2) møkeløpe møkeløasiyaiktø, ishumpurmerape ishumpurmeraasiyaiktø trømpøik marøpelø, 3) misakmerapa ushamerapa trømpøik marilø. Øyeek trømpøik mariløyu kekøtrap pøntrømøntrap mur trantrøpene, Jeupa kasraktø wantrai marøp latrø tapeløtø utøntrun (1 Tesalonicenses 4:3).
MAS NEPUA KUSREU
Sexo chishik kømíikyu kepeñip pasrømøntrap chi maramikwan, incha ñi øyeeløyu kepeñmø chischik uñene chi tapeløtø utøntrap kuikwan ashkun.
3. Ishumpurpa møkeløpa trømpøik marinukkutrimpe welul
José Tiuswan møra marøpik trømpøiku kepeñmøntrap mur trantrik køn. Ley Génesis 39:1-12, yu leinuk pinaku paílan waminchap:
-
¿Josépe chincha welula lulik kø? (Ash versículo 9n).
-
¿Ñi isuinukpe José øyeek marikpe tap isua marik kø chinta? ¿Chincha?
¿Ishumpurmerapa møkeløpa trømpøik marinukkutri urekteløpe José latawai mantø tarømisrtrap? VIDEUN asay.
Jeupape mayeløpa øyeek trømpøikwan wentøpasrtrai isun. Ley 1 Corintios 6:18, yu leinuk pinaku paílan waminchap:
-
¿Chimeratøtre øyeek trømpøikyu kepenamik sruaintrera?
-
¿Ishumpurpa møkeløpa trømpøik marinukkutrimpe ñipe mantø welultrap?
4. Ñipe øyeek trømpøikupe kepeñmøntrun
Trømpøiku kepeñmøntrap mur trantrapelø ker, ¿inchentø kepeñchai lataik chimeratøtre mur martrera? VIDEUN asay, yu videu asinuk pinaku paílan waminchap:
-
Nui isuilø mariløpa, nui srawan itølultrai sruaintraptik kui kuenta peñape, ¿nunekpe chi marik kø?
Jeupawan tarømisrmø melapeløken nømui isuilø chish køntrai mur trantrapelø køn, ¿øyeek trømpøiløyutø isumøntrap chi martrap? Ley Filipenses 4:8, yu leinuk pinaku paílan waminchap:
-
Trupe, ¿chimerayutø isumik kø?
-
¿Ñi isuinukpe Biblian leikpe, Jeupawayelan marikpe trømpøikyu kepeñmøntrap purukuntrauta? ¿Chincha?
5. Jeupa maik karuilan marene namuintøwai tap køntrun
Jeupape ashipik køn namuyasik chi tapik køntrap kui. Inchawai trenchipik køn, namui isupikwanpa nam chitø marilanpa namui asrwanpa mantø chish tøkakømikwan, incha chish tøkakuikkutri chi tapik puntrap kuikwan. Ley Proverbios 7:7-27 incha VIDEUN asay, yu videu asinuk pinaku paílan waminchap:
-
¿Maik køtrømisrik kø ik matsinøpe latrø trømpøiku kepeñape? (Ash Proverbios 7:8, 9).
-
Proverbios 7:23, 26 taimpala, ¿ishumpurpa møkeløpa trømpøik mariløyukutri chinetø trømpøik puntrapik køn, ik trømpøiløyu kekøtrømupene chi kalø pumøntrera?
-
¿Namui asrwanpa, isupikwanpa, chi tap marilanpa chish tøkakuikpe, manasrønkatik øsik kømikwan tøkakømik mantø purukuntrera?
Møiløpe treek isupelø køn, tru Bibliayu møkeløpe møkeløasiyaiktø, ishumpurmerape ishumpurmeraasiyaiktø trømpøik marilaimpurap pørik pasrapikpe untak kenamarmíik køncha. Inchentø Jeupa Tius untakik kuik køppe, maya misakmeran manakatik kasraktø warøntrai isupik køn. Manakatik øsik warøntrappe, Jeupa maik martrai karuilan møra marøpelø kømik køn. Ley 1 Corintios 6:9-11, yu leinuk pinaku paíkwan waminchap:
-
Møkeløpe møkeløasiyaiktø, ishumpurmerape ishumpurmeraasiyaiktø trømpøik martrap isuiløtøtre, ¿Tiuswaimpe kalø kø chintera?
Tius tapik kui ashchaimpe namui øsik amønaikwan yunømaramik køn, ¿treek marikpe tapik køntrauta? Ley Salmo 19:8, 11, yu leinuk pinaku paílan waminchap:
-
¿Namui øsik amønainuk Jeupa maik karuiløpe nepua maramtik kø chintera? ¿Chincha øyeek isuku?
Jeupa latrø nu misakmeran nømui øsik amønainuk nø maik martrai karuilan møra martrai purukupik køn, ñunkucha trektøwai purukuntrun.
MØILØPE TREEK ISUPELØ KØN: “Untarapik kuikkutri pera kiaikpe chikucha kalø kømøn cha”.
-
¿Ñipe manchipsruku?
¿CHI KUSREKU?
Ishuk møkpa kashararwarmerayasik Jeupape sexon keta tranik køn.
Kusreikwan katøle isuntrap
-
¿Sexo chishik kømíikpe maik kø?
-
¿Sexo chishik kømíiku kekøtrømøntraimpe namun chi purukuntrera?
-
¿Namui øsik amønainuk Jeupa maik karuilan møra marene namun mantø purukuntrera?
MAS NEPUA ASH
Nepua ash chincha Tius isupik kera kan ishukpa møkpa pailø warøntrappe kasharamik kui.
“¿Bibliape manchipik kø kasharamøtø pailø lincha waraimpurap?” (jw.org yu pørilø)
Bibliape eshkan, møkeløpe møkeløasayaiktø, ishumpurmerape ishumpurmeraasiyaiktø nøm marikpe kalø kui. Inchentø tsalø ashchaimpe kusrenanmíik køn.
Bibliayukutri sexoimpurap maik karuilan nam møra marene mantø purukuntrap kuikwan leu.
Kan møk møkeløasiyaiktø trømpøik marøpik, Tius maik taikwan møra martrap, ¿chincha nui øsik unikwan yunømarik kø? “Nan tammay utik kuik køn”
“Tiuswai Wampe nømui øsik amønaikwan yunømartrai purukuik køn” (Asha Eshkapik, 1 abril 2011wai)
a Misakmera ilaimpurap wamintamik tap kømui mørøpelø køn. Inchentø trupurap tør wamintamik køn, tru mayeløpa Jeupa chi martrai karuilan tør nepua ashipelø køntrai. Jeupa trømpøik kui asik ilø køn: kasharamøtø pera kiaik, katøkan kullak asrwan triktøka katerawa trømpøik marik, pøikørøpurap trømpøik marik, katøkanwai kullak asrwan katerawa trømpøik marik.
