Namui nuchaløpa lincha putrainuk, David latawai isupelø ker. Nøma trentaik køn: “¡Nuneløpa nuchaløpa kanpalatø purø tap lincha pøntraikkutri, latrø tap køn [cha]!” (Salmo 133:1). Tap lincha pøntraikpe kaakatø kømøn. Masken kan kan kanpalatø lincha pøntrøntrap tap marøp kuikkutrin køn.

1. ¿Tiuswai misakmerape chi tapelø kenamarøpelø kø?

Ñi kan kungrekasiun pek pirausrømay ipen, nøm wamintilan mørmuinkucha tap kui mørtrun. ¿Chincha? Kakentø chuiløtøkucha, Jeupawaiwan waminchipelai Biblian kusremik pørin kilkamerape truiløtøwain køn. Katøkanpurappe, ampukutri ikutri untak kenamarøpelø ker. Pek pirausrø warapelø kuintøkucha, nampe Jeupawan “kanpalatø” adorantrap inchipelø ker (Sofonías 3:9, pititø pørik).

2. ¿Kungrekasiunyu kanpalatø pøntrøntrap ñipe chi martrap?

“Kangurrin kangurri manrraugurri newan isua undaaramburab undaaray” (1 Pedro 1:22). ¿Treekwan mantø møra martrap? Katøkanelø nøm tapelø tøkakuilantø ash, nømui tap kømelan kømø. Ñi asiiløpatø kømø, masken chuiløkøpenpa pek culturasrelø køpenpa linchipelø lau. Trektøwai, pek pek misakmeran nøørø martrap isumøtø (leu 1 Pedro 2:17). a

3. ¿Kan nuchakpa kape kan nunekpa tap kømui pasrøwape ñipe chi marøpsruku?

Nampe kanpalatø pøntrer; inchentø kanmaywane sølkantelø kømuikkutri, pusrkuamtelø marøp kape chikøpen tainapelø ker. Treekkutri Bibliape trenchipik køn: “Kanikkurri kanikkurri chi ulø paymø, pesannab”. Jeupa “ñimun ulø paymø, mandø pesannaig køben, ñimbe treetøwei maray” (leu Colosenses 3:13). Namma Jeupawan kualømmørik pursrkuankarupelø kuintøkucha, nøpe namune ulø paymø pesannapik køn. Inchawai nøpe namui nuchalankucha ulø paymø pesannantrai muniran. Trupe kan nunekwan kape kan nuchakwan ñui wamintiløtøka, mariløtøka pursrkuamtelø taik kuenta peñape, ñimetrik “perdonatruntrik cha” miamik køn (leu Mateo 5:23, 24). b

 MAS NEPUA KUSREU

4. Møikwantøkucha lata ash

Namui nuchalan untak kenamarøpelø kuinkucha, kanmaywan maik køsrønelane untak kenamaramik mur køpik køn. ¿Treek pupen nømunkucha untak kenamartrap chi purukuntrera? Ley Hechos 10:34, 35, yu leinuk pinaku paílan waminchap:

• Chu pirausrelantøkucha misakmeran nuimpurap waminchipelø køntrai Jeupa tap utapik køn. Treek kui nepua ashape, ¿pek misakmeran ñi maik asamik kø?

• Ñi tsuinuk, ¿misakmerape katøkanelan tap nepua ashmuikkutri chi tap kømui isupelø kø? ¿Chincha øyeek isumumik kø?

Ley 2 Corintios 6:11-13, yu leinuk pinaku paíkwan waminchap:

• ¿Nuchalan nunelan lata mas katøkuchi untarantrap ñipe chi martrap?

5. Chi ulø paymø pesannap tap køtrømisrtrap lau

Nam Jeupawan manaken perdonamik kømuinkucha, nøpe namui kalø marilane sí, ulø paymø pesannapik køn. Ley Salmo 86:5, yu leinuk pinaku paílan waminchap:

• ¿Ik versículo chi kusrenana Jeupa namui kalø marilan ulø paymø pesannapik kui?

• ¿Jeupa ulø paymø pesannapik kuikwan unkua chipik køtitru? ¿Chincha?

• ¿Namune chimerayutre katøkaneløpa tap amønamik mur køpsruera?

¿Namui nuchaløpa kanpalatø lincha pøntrøntrap Jeupa latawai chi maramik kø? Ley Proverbios 19:11, yu leinuk pinaku paíkwan waminchap:

• Ñun mukøpen chikøpen tap kømøtiik maren, ¿tap køtrømisrtrap chi marøpsruku?

Kanmaype nam katøkanelan pursrkuamtelø tainapik køn, ¿treek pupen nampe chi maramik kø? VIDEUN asay, yu videu asinuk pinaku paíkwan waminchap:

• ¿Tap køtrømisrtrap nuchakpe chi marik kø?

 ¿CHI KUSREKU?

Mayelan untak kenamaren incha ulø paymø pesannapene, kungrekasiun umpu kanpalatø tap pøntramik køntrun.

Kusreikwan katøle isuntrap

• ¿Katøkanelø pekmayelø kuinkucha chi maramik kø?

• ¿Kan nuchakpa kape kan nunekpa tap kømui pasrøwape ñipe chi marøpsruku?

• ¿Jeupa latawai katøkanelan ulø paymø pesannamik ñun kustantrauta? ¿Chincha?