KUSRENANIK 57
¿Ñi trømpøik kalø maren chi puraintrera?
Ñi Jeupawan mantraukutri untarainkucha kanmaype kalø martrun. Inchentø kalø marilø møiløpe mas latrø trømpøilø køn (1 Corintios 6:9, 10). Latrø trømpøik marinkucha, Jeupape ñun katøkucha untarantrun, kakentø nøpe kalø marikwan pesannawa purukuntraptøwai wan.
1. ¿Chi maramik kera namui kalø marilan Jeupa ulø paymø pesannantraimpe?
Kan Jeupawan untarapik trømpøik kalø marikwan nepua asha, nøtøwai trupa isui inchun. Inchentø mentra isui inchimøntrai Jeupape trenchipik køn: “Ñimui kalø mariløpe latrø pikelø kuinkucha, pulø wañi latawai latrø puløchelø køtrømisrtrun [cha]” (Isaías 1:18). Nam mantraukutri isua mørene, Jeupape newan ulø paymø pesannantrun. ¿Kalø marikwan isua mørikpe maik kera? Katrenkucha kalø marøpraitamap isup, kalø marikwan yantø marmup, Jeupawan purukutra cha miap, truik køn. Trømpøik isuilan yunømartrap inchip, kalø martrai isunkaruilan lelacha, Jeupa maik karuikwan martrap mur trantrøntrun (leu Isaías 55:6, 7).
2. Nam trømpøik kalø maren, ¿Jeupa kungrekasiunyu metrap pera aship pøntrapelan namun mantø purukuntrai martrera?
Trømpøik kalø marøpikwan, Jeupape ik tap wammeran tranan: kungrekasiunyu “pera marøb pønrrabelan wamø [cha]” (leu Santiago 5:14, 15). Tru møkelan espíritu santotøka wesrua pønsrailø køn, incha Jeupawanpa nui upishachelanpa untarapelø kuikkutri katøle Jeupawai tap linchipelø køntrai purukuntraptøwai pøntran (Gálatas 6:1).
¿Kungrekasiunyu metrap pera aship pøntrapeløpe nam trømpøik kalø maren mømay purukuntrera? Pailø kape pønelø misra purukuntrun trømpøik kalø marikwan nepua ashchai. Trektøwai tap wammera kettrun katøyu trømpøiløyu kepeñmøntrai. Inchen kan misak trømpøik kalø marikwan isua mørmuiksruantøpe, kungrekasiunyu metrap pera aship pøntrapeløpe, katøkanelø tap amøñipelan isua kungrekasiunyukutri tarømartrun.
MAS NEPUA KUSREU
Nam kalø maren Jeupa purukuntraptøwai wapik kui tørtø tøkaku, incha latrø nuway kui ash.
3. Nam trømpøik marilan eshkapen namtøwai tammisrtrai purukuntrun
Nam trømpøik kalø mariløpe Jeupa tap kømui wantrai martrun, inchakutri nam trømpøik marilan sørømøtø eshkamik køn. Ley Salmo 32:1-5, yu leinuk pinaku paíkwan waminchap:
-
¿Chincha tapik kø nam trømpøik kalø marilan Jeupawan sørømø eshkaikpe?
Namtøwai pishintø tap amøñintrappe, Jeupawanpa kungrekasiunyu metrap pera aship pøntrapelankucha nam kalø marilaimpurap wamintamik køn. VIDEUN asay, yu videu asinuk pinaku paíkwan waminchap:
-
Canon katøle Jeupawan kemallchai, ¿kungrekasiunyu metrap pera aship pøntrapeløpe mantø purukuik kø?
Latrø tapik køn kungrekasiunyu metrap pera aship pøntrapelan chikucha sørømø eshkamikpe, kakentø nømpe purukuntraptøwai pøntran. Ley Santiago 5:16, yu leinuk pinaku paílan waminchap:
-
¿Nam kungrekasiunyu metrap pera aship pøntrapelan chikucha sørømø waminchene nømpe namun chincha mas tap purukuntrera? ¿Ñipe chi isuku?
Ñui kalø marilan Jeupawanpa kungrekasiunyu metrap pera aship pøntrapelankucha chikucha sørømø eshkau, incha Jeupawai purukuikwan tap utø.
4. Jeupape kalø marøpelan lástima ashipik køn
Møikkøpen trømpøik kalø marøpik Jeupa maik taikwan martrap inchimupene, kungrekasiun umpu ka uñchaimpe maramkeik køn. Treekkutri kungrekasiunyukutri tarømarøpelø køn. Truyukutrimpunø nampe nøpa yantø trak lincha pøntrømumik køn. Ley 1 Corintios 5:6, 11, yu leinuk pinaku paílan waminchap:
-
Harinayu levaduran lamøtø pusriktø maya sømarikwan latrø nu pulin karupik kuikwan nepua ashape, ¿kungrekasiun umpuilan mintishipsru chintera isua mørmø trømpøik kalø marøpikpa linchene? ¿Chincha?
Kungrekasiunyu metrap pera aship pøntrapelø Jeupa latawai lástima ashipelø kuikkutri, kungrekasiunyukutri tarømarik amøñipelan lapelø køn purukuntrap. Yamelø kungrekasiunyu tarømarik amøñipelø katøle kemallipkøn, ¿chincha? Kakentø mur pøntrøntrai kusrenanikpe murik kuinkucha isua mørtrai purukupik køn (Salmo 141:5).
¿Jeupa kalø marøpelan tap asha marøpik kuikwan mantø kenamarøpik kø nø purø tap inchipik køp, lástima ashipik, untakik kui?
5. Nam isua mørene Jeupape ulø paymø pesannapik køn
Jesús kan kemesra wamintinuk nepua ashchai purukuik køn, Jeupa maik mørøraik inchipik kui kan kalø marøpik isua møren. Ley Lucas 15:1-7, yu leinuk pinaku paíkwan waminchap:
-
¿Ik kemesra wamintinuk Jeupawaimpurap chi kusrenana?
Ley Ezequiel 33:11, yu leinuk pinaku paíkwan waminchap:
-
¿Cierton isua møra pasraik kenamartrap chi maramik kø?
Jeupape upisha ashipik latawain køn, nui upishachelan latrø køtrø isupik køn.
MØILØPE TREEK ISUPELØ KØN: “Nan kørik køtan cha, kungrekasiunyu metrap pera aship pøntrapeløpa wamintamik, kakentø nan tarømartraitamap”.
-
Kan misak treek isupene, ¿ñipe manchipsruku?
¿CHI KUSREKU?
Trømpøik kalø marinkucha, nam cierton isua mørene incha katøyu kaløwan martrap inchimupene, Jeupape kalø marikwan ulø paymø pesannantrun.
Kusreikwan katøle isuntrap
-
¿Chincha tapik kø nam trømpøik kalø marilan Jeupawan sørømø eshkamikpe?
-
¿Chi maramik kera namui kalø marilan Jeupa ulø paymø pesannantraimpe?
-
Trømpøik kalø marape, ¿chincha kungrekasiunyu metrap pera aship pøntrapelan purukutra cha miamik kø?
MAS NEPUA ASH
Isaías 1:18 taimpala, Jeupa lastima asha ulø paymø pesannapik køn. Truik kan møkwan mantø purukuikwan ash.
¿Kungrekasiun yu metrap pera aship pøntrapelø mukøpen kalø maren purukuntrap chi marøpelø kø?
“¿Kalø marøpelaimpurap mantø untaktøka lástima ashipelø kø?” (Asha Eshkapik, agosto 2024wai)
Isua mørmelankucha untaktøka aship, lástima aship inchipelø køn. ¿Mømay marøpelø kø?
“Kungrekasiunyukutri wekutsilan mantø puruku” (Asha Eshkapik, agosto 2024wai)
Kan møk Jeupa katøle nuinukmay kemallchai intikwan mørøraik køn. “Jeupawan katø kemalamik palai mørik køn” pøriku leu.
“Tiuswai Wampe nømui øsik amønaikwan yunømartrai purukuik køn” (Asha Eshkapik, 1 abril 2012wai)
