Cierton Cristoi wentautø ampupeløpe Jeupawainkatø pøntrainuk, mukucha søtøpøntramisrmøntrai isua pøntrer. Ñikucha trektøwai isup pasraintrun, incha ñi tarømisrmø pasraikwan Jeupape tap kui asintrun (leu 1 Crónicas 28:9). ¿Ñi Jeupawainukkutri tarømisrtrai chimeratre murelø puntrera? ¿Incha metraptø yamik ñun chi purukuntrera?

1. ¿Namun Jeupawainukkutri tarømisrtrai katøkaneløpe chi marøpsruera?

Møiløpe misakmera namun Jeupawayelan marmøntrai inchipelø køn. ¿Mumera kera? Apóstatasmera køn, yantø Jeupawai urkanisasiunyukutri tarømisra pøntrapelø namui fewan pinishintrap isua isa waminchipelø. Trektøwai misakmera ciertonikwan nepua ashmøntrai religionesmerayu metrap pera pøntrapeløkucha isa waminchipelø køn. Inchawai Tiuswai misakmeran tsalø ashipelø pørilan lemøwai, internetyu pøntrapelan ashmøwai, nømpa tør køtrømisrtrap waminchimøwai intamik køn kakentø treek maramikpe tap kømøn. Jesús trupurap waminchippe trentaik køn: “Kagøbasay cha. Kaguen nømbe kabgailø katøgan kabgailandøwei srua ambubelø køn cha. Kan kabgaima katøgan kabgaigwan srua yabe, trabyu pailøba kegørrønrrun—cha” (Mateo 15:14).

¿Kan trak linchipik Jeupawainukkutri tarømisrtrap inchene chi puraintrera? Treek pupene, latrø køtrø isumtik køn. Inchippape, tru Jeupawayelan yantø mas marmø tarømisrøpikpe trenchintrun: “¿Nainkatø pasramisrtrap kape Jeupawainkatø pasramisrtrapte cha?”. Inchen namun chi tainkucha Jeupawainkatø pøntramisramik køn, nømpa waminchimøwai, chi lincha marmøwai (Mateo 10:37). Nam treek marene, Jeupa karuikwan møra martrun (leu 1 Corintios 5:11).

2. ¿Namui øsik amønainuk chiwan isua maramik kø Jeupawainukkutri tarømisrmøntrap?

Jeupawan untarapelø kuikkutri, tru religión ciertonikwan kusrennanmeløyupe pøntrømer. Inchawai religionesmera ciertonikwan kusrenanmeløpape trak linchimøwai purukumøwai truilai kuallmøwai intamik køn. Treekkutri Jeupa trenchipik køn, tru Babilonia Purø Nuikukutrimpe “webambay cha” (Apocalipsis 18:2, 4).

 MAS NEPUA KUSREU

3. Ciertonikwan kusrenanmeløpa ashiptø kuy

¿Jeupawai urkanisasiunwaimpurap kalø waminchip køpen chi maramik kø? Ley Proverbios 14:15, yu leinuk pinaku paíkwan waminchap:

• ¿Chincha ashiptø melamik kø katøkanelø maik chipen chishtø køremøntrappe?

Ley 2 Juan 10, yu leinuk pinaku paílan waminchap:

• ¿Jeupawainukkutri tarømisra isa waminchipeløpa chi maramik kø?

• Jeupawainukkutri tarømisra isa waminchipeløpa waminchimuinkucha, ¿nøm isa wamintilan mørtrai chi marøpelø kø?

• Nøm Jeupawaimpurap nui urkanisasiunwaimpurap kalø waminchen kørep pøntraisruantøpe, ¿Jeupape maik mørøraik inchipsruera?

4. Kan nunek kape kan nuchak trømpøik kalø marinkucha Jeupawainkatø pasramisr

Kungrekasiun umpu møikkøpen trømpøik kalø marøp pasraik ashape, ¿nampe chi maramik kø? Metrap Israelsrø Tius chi martrai karuikwan Moisés pørikukutri kusrenanikwan ash. Ley Levítico 5:1.

Ik versículo eshkaimpala, møikkøpen trømpøik kalø marikwan nepua ashape, kungrekasiunyu metrap pera aship pøntrapelan eshkamik køn. Inchentø nømpa waminchaptø, nun untak kenamartrap kalø mara pasrapikwanmetrik waminchun, tru nø chi marikwan kungrekasiunyu metrap pera aship pøntrapelan eshkantrai. Nøaship waminchap inchimupene, Jeupawan untarainukkutri kungrekasiunyu metrap pera aship pøntrapelan namaship wamintamik køn ¿Øyeek marikpe chincha kenamara...

• ... Jeupawan untarapelø kui incha nuinkatø pøntramisrik?

• ... tru kalø marøpikwan untarapelø kui?

• ... kungrekasiunyu tap amøñipelan untarapelø kui?

5. Babilonia Purø Nuiknukkutri nøørø tarømisra uñchap inchi

 ¿CHI KUSREKU?

Jeupawainkatø pøntramisrtrappe nun wentøpasrøpeløpa linchimøwai, religión ciertonikwan kusrenanmeløyukutri newan tarømisrøp intamik køn.

Kusreikwan katøle isuntrap

• ¿Kungrekasiunyukutri tarømisra pøntrapelai isa wamintilan chinchakutri lemøwai, ashmøwai, mørmøwai intamik kø?

• ¿ Kan kungrekasiunyuik Jeupawainukkutri tarømisrtrap inchene chi maramik kø?

• Religión ciertonikwan kusrenanmeløyukutri newan tarømisrtrai karuikwan møra martrap, ¿nampe chi maramik kø?