1.  ¿Babilonia Purø Nuikpe mu kø?

2.  ¿Mesíaspe mana kenamisrtrapik kuik kø?

3.  Kan kuantrø tsupikwan doctormerape anintøka tamartrap isupen

4.  Ka mentamisriktø køpen

5.  Fiestasmera marøp køpen

6.  Nentraptø kuantrømera tøkakuape

7.  Penap yanøp ampinuk kape mas murelø pupen cabildopa aship puraampamik køn

 1. ¿Babilonia Purø Nuikpe mu kø?

¿Religionesmera ciertonikwan kusrenanmelan chinchatre wamapelø kø Babilonia Purø Nuik køn chape? (Apocalipsis 17:5). Pønkatøwan ashchap.

• Babilonia Purø Nuikpe Pirø mupa kuimpurap pasran. Bibliape nuimpurap trenchipik køn, tru “misaamera purø nørrø” pøntrapelaim pala wamisra wap, trektøwai “pirau reymeran nø merrarrawa karumburab karub tøga pasrabig” køn cha (Apocalipsis 17:15, 18).

• Pena yanøpelø kømøwai, nøtrø aship karupelø putrapelø kømøwain køn. Biblia taimpala Babilonia Purø Nuikwan pinishipen “pirau reymera[pa]”, pena yanøpeløpape katøkucha øsik pøntrøntrun (Apocalipsis 18:9, 15).

• Babilonia Purø Nuik Tiuswai munchin mintishipik køn. “Nui asrwan møguelan anwei yanøb” ishuk køn cha waman, kakentø yu Pirau metrap aship karup pøntrapeløpa kanpalatø purukuyap pøntran, tru an kape chikøpen utapelø kuik kuikkutri (Apocalipsis 17:1, 2). Yu Pirau misakmeran katøkucha kekøtrøsrkøp pasran, incha nø mariløtøka latrø nu misakmeran kuechip pøntran (Apocalipsis 18:23, 24).

Katø kusrenanik 13yumay punto 6srø

 2. ¿Mesíaspe mana kenamisrtrapik kuik kø?

Bibliape chap eshkaik køn, tru Mesías pumuatø 69 trunemera puraintrapik kuik køn cha (leu Daniel 9:25).

• ¿69 trunemerape mana pølpasrik kø? 455 pilayu Jesucristo mukapatøsrø pølpasrik køn. Tru pilayu, Jerusalén ciudawan mintisaik pasraikwan, metrap pera aship pasrapik, Nehemíaspe, katøle tamartrap puik køn (Daniel 9:25; Nehemías 2:1, 5-8).

• ¿69 trunemerape maya yana kuik kø? Bibliayu møilø chap eshkailøpe, kan kualøm kan pila kui lataik køn (Números 14:34; Ezequiel 4:6). Treekkutri, kan trunepe siete pilamera køn. Treekkutri 69 trunemera 483 pilamera køn (69 multiplicado por 7).

• ¿69 trunemerape mana patsik kø? 455 Jesucristo mukapatøsrønkutri 29 Jesucristo uninukkatik munchen, 483 pilamera køn. a Tru pilatøwai Jesúspe piu umpu ulsra Mesías misrik køn (Lucas 3:1, 2, 21, 22).

Katø kusrenanik 15yumay punto 5srø

 3. Kan kuantrø tsupikwan doctormerape anintøka tamartrap isupen

Kanmaype doctormerape namui anintøkatøwai kuantrømeran tamartrap inchipelø køn, inchentø Cristoi wentautø uñipikpe møilane utømøntrun. Por ejemplo, namui aniwan donamøwai, namui aniwan operantraptø wesrua, yantø chap operawa katøle usramikwane utømelø ker (Deuteronomio 15:23).

Katøkanpurappe, doctormera namui anintøkatøwai mø marilan kanmaype ka utamtik køn. Por ejemplo, aniwan exámen martrap wesruikwan, hemodiálisiswan, hemodiluciónwan kape máquina de recuperación de sangre, kape máquina de circulación extracorpórea (kape bomba de derivación cardiopulmonarwan) b. Cristoi wentautø ampupeløpe nøm kan kan isua martrun kan operaciónyu lata, exámenyu lata, kan tratamientoyu lata, doctormera ñui anintøkatøwai martrap inchen. Doctormerape ilan pekmaytø asha martrun, inchawai Cristoi wentautø ampupeløpe kan operaciónwan, kan exámenwan, kan tratamienton utøntraptø tru doctorwan payamik køn nai anintøka chi martrap isup waikwan. Ilan paya mørtrik:

• Namui asryukutri aniwan pekpurap øra katøyu punkarupen, ¿nai isuinukpe ik animpe katøkucha nain kø chintera? ¿Kape yantø nain kømui isua pirau lushchap kø chinta? (Deuteronomio 12:23, 24).

• Doctor namun kan tratamiento marøp køpen, namui aniwan wesrua chish mara katøle namui asru usren kape kan tratamiento lataik namui asru srølen, ¿na Biblia kusreimpala øyeek marikpe kalø køntrauta kape ka utøntrap kø?

Katø kusrenanik 39yumay punto 3srø

 4. Ka mentamisriktø køpen

Bibliape kasharawarmeran mentamisrtraimpe eshkamøn inchentø tør eshkapik køn mentamisrape katøkanpa kasharamumikwan (1 Corintios 7:10, 11). Treek kuintøkucha, møiløpe Cristoi wentautø ampupelø ik pønkatø puraampup kuinuk ka mentamisrtrap isupelø køn.

• Nui nakchakuilan chi palapikwan tranøk kømui inchen: kekpe nui yampuelan nømun chi palapelan tranøk kømui intikkutri (1 Timoteo 5:8).

• Trømpøik kutra kuchiptik køpen: Øyeek trømpøik marikpe srawan kape kekwan kuantrøtø tratrin kui kape mentra køtrinchiptø kuamiksrønkatik punkarupsruintrun (Gálatas 5:19-21).

• Jeupapa tap lincha pasraikwan yantø mintishintraptik pupen: Srai kape kek søtøpasramisren Jeupawayelan marpashmøwai kape nun møra marmøntrai inchun (Hechos 5:29).

Katø kusrenanik 42yumay punto 3srø

  5. Fiestasmera marøp køpen

Cristoi wentautø ampupeløpe tru fiestasmeran Jeupa tsalø kui asilane marmelø ker. Inchen chiyupe kan kan isua maramik køn Bibliayukutri ciertonelan kuentatøka. Por ejemplo iløyu:

• Kasraktø puraamtrikay chipen. Trenchipene “unkua” taiktø tsapø køn. Chincha marmelø kuikwan payen, ñi chincha marmíik kuikwan eshkamtik køntrun.

• Ñui srai kape ñui kek, Jeupawaiwan waminchimíik køpen, nui yaweløpa chi fiestasmera køpen marinuk “mantrap ashi” chipen. Tap isua ka lincha yamtik køpene, amtraptø tør eshkawa pasramik køn, tru fiestayu Jeupa tsalø asikwan maren, “nape treelane marmumøntrun cha”.

• Ñui lutø mariksrø kan fiesta utømerayu, ñun pagarainuk mas nemara trantrap inchen. ¿Utamik kalø køntrauta? Inchippape kalø kømøntrun. ¿Øyeek nemara tranikpe fiestakutri trana chintera? ¿Kape ñi tap marikkutri trana chintera?

• Fiesta kualømmera utu mukøpen chikøpen kettrap inchen. Inchippape ñun trenchintrun: “Ik fiesta ñi marmíik kuinkucha, ka kettrap isur cha”. Inchentø tap nepua asamik køn, ñi chinchipik køtashchap ketik kui kape ka ketiktø kui. Utøntraptø ñitøwai tap isumik køn. Pesannamøta chikøpen martraptø tap isua maramik køn, Jeupapa tap pasrøntrap incha ñi isuintik køtrømisrmøntrap (Hechos 23:1).

Katø kusrenanik 44yumay punto 1srø

 6. Nentraptø kuantrømera tøkakuape

Misakmeran untarapelø kuikkutri, nam nentraptø kuantrømera tøkar kuape kape nentraptø kuantrø tøkar kuitamap isua, kanelan nemøntrap ashiptø melapelø ker. Kakentø ik karuikwan møra martrap isua: “Ñui mendaigwan ñiasiitø lataitøwei undaaramig køn cha” (Romanos 13:8-10).

¿Ikwan mantø møra martrap? Mukøpen nentraptø kuantrø tøkakuape katøkanelan muchamøwai, irømøwai, tasik tranmøwai intamik køn. Incha mukøpen nui yawelaimpurap isua, nui yamay namun alømupen namik mørmumik køn. Piu umpu ulsrøntraptø, katøkanelan kuantrøwan nemøntrap kungrekasiunyu metrap pera aship pøntrapelai coordinadorpa wamintamik køn, “nentraptø kuantrø tøkaik kur cha”. Kasharantrap isup wawape, nentraptø kuantrø tøkaik kømøtashchap aniwan wesrankarua asamik køn. Treek marape, namuimpurapikwantø “tab kønrrai marøb kebammøtø, katøganelayasikkucha tab kønrrai” isua martrun (Filipenses 2:4).

Katø kusrenanik 56yumay punto 2srø

 7. Penap yanøp ampinuk kape mas murelø pupen cabildopa aship puraampamik køn

Penap yaninuk chi marintøkucha misakmerapa, kungrekasiunyu nuchaløpakucha acuerdon maramikwan pøra køtrømarikpe tør køtrømisrtrun (Jeremías 32:9-12). Treek marintøkucha, Cristoi wentautø ampupeløken penap yaninuk tap kømøteløpe puntrun. Inchentø treelø pupen, namtø putramisra tammay tamaramik køn.

Latrø may isa an wesrupen kape chikutrimpunø wam kusrup inchen, ¿mantø tamaramik kø? (Leu Mateo 18:15-17). Jesúspe trentaik køn ik pønkatøwan maramik køn cha.

1. Namtø putramisra tamarøp katøkaneløpa kømø (versículo 15n ash).

2. Namtø tamaramkeik køpene, kungrekasiunyuikwan kantø kui kape pakatø kui linchai eshkamik køn (versículo 16wan ash).

3. Treek maren tamaramkeik køpene, truyupe sí kungrekasiunyu metrap pera aship pøntrapeløpa wamintamik køn (versículo 17n ash).

Treeløyu, Jeupawai munchin chillikinchimøntrai kungrekasiunwankucha tap køtrømisrtrai, namui nuchalan juezmeraisrønkatik puraammøntrai marmøntrun (1 Corintios 6:1-8). Inchentø iløyupe sí cabildopa kape juezmerapa wamintamik køn: kilka mara tarømisramik køpen, urekwan mu pera køtrømisramikwan, urekmerai chi palapikwan an purørøk kømui inchen, accidente tøkakua pagaramik køpen, penap yanikpe chishtø patsøpen, kuamuatø chi køpikwan pøra tamara tratren. Kan Cristoi wentautø uñipik treeløyupe legalmente tammaytø tamartrap isupene, Biblia maik taikwan møra marøp pasrøntrun.

Treektøwai martrun, mukøpen trømpøik kalø mara pasrapikwan, por ejemplo, munkøpen kemøra trømpøik maren, urekmerai asrwan kemøra mintishipen, trømpøik kuayapen, nilikwan kape kuetchiptikwan, treekwan cabildon eshkawape Biblia maik taikwan møra marøp pasrøntrun.

Katø kusrenanik 56yumay punto 3srø