KUSRENANIK 04
¿Mu kø Tiuspe?
Srøtøkutri, misakmerape pek pek tiusmeran adorapelø kuik køn. Inchentø Bibliape eshkapik køn, kantø Tius nø “purap nuik køn pek pek tiusmera lataken kømø” (2 Crónicas 2:5). ¿Truikpe mu kø? ¿Misakmera pek tiusmeran adorailø lataken kømø nøpe chincha purap nuik kø? Ik kusrenaninuk, Tius nuimpurø ñi chiwan nepua ashchai intikwan kusreu.
1. ¿Tiuspe chi munchi kø, incha nø nui munchin nepua ashchai inchipik kuikwan mantø asha kø?
Bibliayu Tiuspe nøasiktøwai mu kuikwan eshkapik køn. Nø trenchipik køn: “Na Jeupa kur. Truik nai munchi køn” (leu Isaías 42:5, 8). Nøpe nui muchin wamøntrai isupik køn øyamay nui linchipelø køntrai. Jeupawai munchipe, “Nø martrap isuikwan marøpik køn” cha, nøtrø kusrepelø nepua asha eshkaik køn (Éxodo 3:15). Jeupape nam nui munchin nepua ashchai intan, ¿mantø asha køpra? Kakentø nui munchin Bibliayu 7.000 lutau pørinkaruik køn. a “Srømpalasrø yu Piraukucha ciertonik Tiuspe”, Jeupa munchi køn (Deuteronomio 4:39).
2. ¿Jeupawaimpurap Bibliape chi eshkapik kø?
Misakmera yam tiusmeran adorapelø kuinkucha, Bibliape eshkapik køn Jeupatø ciertonik Tius kui. Chincha kuikwan ashkun. Jeupa purap karupik kui “latrø nuik køn Mayelaim Pala Pasrapik køn yu Piraukucha” (leu Salmo 83:18). Nø “Newan Maramburab Marøbig” kuik køppe, chi martrap isuilane marøpik køn. Trektøwai nø Ellmarøpik køn, kakentø “chiwandøgucha kerrigu”: Pirø pøtøkatan, srømpalasrø wepampamkasrø køpiksrønkatik, nø marik kua (Apocalipsis 4:8, 11). Jeupa manasrønkutri manasrønkatik wapik manaken patsømíik køn (Salmo 90:2).
MAS NEPUA KUSREU
Tiuswan nui munchitøka chintimpa wamamik kuikwan ashchap, trektøwai nui munchin namun mantø nepua asønkarupikwan kusrentrap. Tiuspe nam nui munchin nepua ashchai chintimpatre isupik kuikwan ashkun.
3. Tiuswan “Señor” kape “Tius” cha wamapelø kuinkucha, nøpe kan muchi tøkaik køn
¿Kan misakwan nui munchitøka wamamik kø chinta? Ikwan løtøntrap, VIDEUN asay, yu videu asinuk pinaku paíkwan waminchap:
-
¿Tiuswan “Señor” kape nui munchitøka wamøpene trektøwai kø chintera?
Bibliape eshkapik køn misakmera tiusmeran, karup putrapelanpa adorapelø køncha. Ley Salmo 136:1-3, yu leinuk pinaku paíkwan waminchap:
-
¿“Maya tiusmeraim pala Nø Tiuspe” mu kø? ¿“Maya misakwan aship pøntrapelaim pala Nø aship karup pasrapik” mu kø?
4. Jeupape ñi nui munchin nepua asha tru munchitøka wamøntrai inchipik køn
Jeupa ñi nui munchin nepua ashchai isun, ¿mantø nepua asha kø? VIDEUN asay, yu videu asinuk pinaku paíkwan waminchap:
-
¿Jeupa nui munchin mayelan nepua ashchai intikwan, ñi chincha treek kui isupik kuku?
Jeupape misakmera nui munchitøka wamøntrai isupik køn. Ley Romanos 10:13, yu leinuk pinaku paílan waminchap:
-
¿Tiuswai munchi Jeupa kuik køpene chinchatre tru munchin wamamik kø?
-
¿Ñui munchitøka wamøpen ñune maik mørørapik kø?
-
¿Jeupawan ñi nui munchitøka wamøpen nø maik mørørai inchipik kera?
5. Jeupa ñi nui linchipik køntrai isupik køn
Kan ishuk Camboyasrik Soten taik trentaik køn: “Tiuswai munchin nepua kusreikpe nan purø tap kuik køn” cha. VIDEUN asay, yu videu asinuk pinaku paíkwan waminchap:
-
Videuyu asimpala, Sotenwan Tiuswai munchin nepua ashen, ¿mantø isunkaruik kø?
Kan misakwai linchipik køntrappe nui munchinmetrik nepua asamik køn. Ley Santiago 4:8a, yu leinuk pinaku paílan waminchap:
-
¿Jeupape ñi chi martrai isupik kera?
-
¿Ñi Tiuswai munchin nepua asha truiktøka wamøpen nun mas kemalamik purukuntraptik kø chintera? ¿Chincha?
MØILØPE TREEK ISUPELØ KØN: “Kan Tiustø kuik køppe mømay køpen wamamtik køn” cha.
-
Tiuswai munchi Jeupa kui, ¿ñikan kørepik køtitru?
-
¿Ñipe katøkanelan mantø eshkapsruku Tius nui munchitøka wamøntrai isupik kuikwan?
¿CHI KUSREKU?
Kantø ciertonik Tiuswai munchi Jeupa køn. Nøpe nui muchin wamøntrai isupik køn øyamay nui linchipelø køntrai.
Kusreikwan katøle isuntrap
-
¿Tiusmeran adoreiløpa chincha pekmay kø Jeupape?
-
¿Nam chinchakutri Tiuswan nui munchitøka wamamik kø?
-
¿Jeupa ñi nui linchipik køntrai isupik kø chinta? ¿Ñi mantø nepua ashku?
MAS NEPUA ASH
Tius cierton existipik kuikwan trattrøkatikwan nepua ash.
Manasrønkutri Tius existipik kui chincha køremtik kuikwan nepua ash.
Metrapsrø Tiuswan mømay wamapelø kui ashmuinkucha, møi nui munchitøka chincha wamamik kuikwan nepua ash.
¿Tiuswan mømay køpen wamantik kø chintera? Tius kantø munchi tøkaik chincha trenchipelø kuikwan ash.
a La Biblia. Traducción del Nuevo Mundo ikyu Apéndice A4yu Tiuswai munchi chi kuikwan, mø Bibliasmerainukkutri chincha ketrapelø kuikwan nepua ashchun.
