KUSRENANIK 07

¿Jeupape maik kø?

REPRODUCIR EN

¿Jeupape maik kø?

Jeupawan ñi isupene, ¿maik kuitamap isupik kuku? Ñui isuinukpe, ¿galaxiasmera latawai yap pasraik isupik kuku? Ñui isuinuk, ¿nø kan latrø mur sre pupik lataik kuitamap isupik køtitru? ¿Nø maik kø? Bibliayu eshkapik køn, nø maik kuikwan incha ñuimpurap tap køntrai isupik kuikwan.

1. ¿Nampe Tiuswan chincha ashchap kaima?

“Tiusbe Espíritu [køn]” (Juan 4:24). Namui asr lataikpe kømøn. Nø espíritu køn srømpalasrø wapik, srømpalasrø maik kuikwan ashchap kaimer.

2. ¿Jeupape chi tapeløtø tøkaik kø?

Namui kaptøka Jeupawan ashmuinkucha, nø latrø tapelø tøkaik kui nepua asikkutrimpe latrø nu untarapelø ker. Bibliayu trenchipik køn: “Jeupa tapikwan sølwan untarapik køn nun untarapelane lelachimíik køn” (Salmo 37:28). Jeupape “lastima ashib, trurrigu tammay purugub inchibig køn”, mas isui kiship amøñipelan (Santiago 5:11). “Jeupa latrø isuin pusrkuai amøñipelaim pulu pasran; latrø nu kullaraik putrøpen truyukutri wesrupik køn” (Salmo 34:18). Nam chikøpen marinuk, Jeupawan kasraktø wantrai kape isuintik wantrai marinapelø ker (Salmo 78:40, 41). Kan misak kalø marene Jeupa isuintik wapik køn, inchen kan misak tap marene latrø kasrak wapik køn (leu Proverbios 27:11).

3. ¿Jeupa mantø kenamara namun untakik kui?

Jeupape purø tapelø tøkakuinkucha tru mas nuikpe untak køn. Tru, “Tiuspe untakik køn” (1 Juan 4:8, TNM). Jeupape untakwan kenamaran Bibliatøka trukutri nø chi mara pønsrailøtøka srømpala lata yu Pirau lata (leu Hechos 14:17). Por ejemplo, ñiken isu Jeupa namun mantø marikwan: latrø yam coloresmera asilø, kasrak miirailan møra kasraktø puraampilø, pek pek mamikmeran mailø, nø nam øsik amønainuk kasraktø amøñintrai marik køn.

MAS NEPUA KUSREU

Jeupa marampurap marilan latrø tapchik mantø marikwan ashkun incha mantø kenamarøpik kui nui tapik tøkakuiløtøka.

4. Tiuspe chikøpen martrappe nui marampurap mariktøka marøpik køn, ik marampurap marik nui espíritu santo køn

Nampe kualinuk tasiktøka kuallipelø ker inchen Jeupape espíritu santotøka. Biblia espíritu santo misak køn chimíik køn, masken eshkapik køn Tiuspe chikøpen martrappe nui marampurap mariktøka marøpik køn, ik marampurap marik nui espíritu santo kui. Ley Lucas 11:13 incha Hechos 2:17, yu leinuk pinaku paílan waminchap:

Espíritu santo trantra cha miapene Tiuspe trantraptøwai wapik køn. Trupe, ¿espíritu santo misak kø chintera kape Tiuswai marampurapik marøpik kø chinta? ¿Chincha treek isupik kuku?

Jeupape nui espíritu santotøka latrø tapchik marøpik køn. Ley Salmo 33:6 incha 2 Pedro 1:20, 21, yu leinuk pinaku paíkwan waminchap:

¿Jeupa nui espíritu santotøka chitø maramtelan marøpik kø?

5. Jeupa tapelø tøkaikkutri nam nuimay kemallchap inchipelø ker

Moisés Tiuswan tarømisrmø mekapik kuakucha, nun mas tap nepua ashik kui intik køn. Inchawai Moisés Tiuswan trentaik køn: “Ñui maywan kusrenantra øyamay na mas tap nepua ashchap” (Éxodo 33:13). Jeupa Moiséswan løtik køn mu kuikwan kenamarøp. Ley Éxodo 34:4-6, yu leinuk pinaku paílan waminchap:

¿Jeupa nuimpurapikwan Moiséswan chi eshkaik kø?
¿Jeupa tapik tøkakuikwan ñipe mas tapik ashku?

6. Jeupa misakmeraimpurap tap køntrai isupik køn

Metrapsrø hebreosmera, Tiuswai misakmera, nømpe Egiptosrø karuintik melapelø kuik køn. Jeupa nui misakmeran kiship amøñipen, ¿mantø mørørai intik kø? BIBLIAYUKUTRI GRABAIKWAN møray kape Bibliayu ley Éxodo 3:1-10. Yu leinuk pinaku paílan waminchap:

AUDIO: Jeupape nui misakmera latrø køtrø isuintelø pøntraik asha pusrkuai intik køn (2:45)

¿Ik kenamarinuk ñune chi kusrenana misakmera isuintelø putraikwan, Jeupa mantø mørørai intikwan? (Versículosmeran ash 7 incha 8).
¿Ñui isuinukpe Jeupa misakmeran cierton purukuntrap pasra chintera? ¿Cierton martrap kui ñikan køretitru? ¿Chincha øyeek isuku?