KUSRENANIK 09

Ñune Tiuspa wamintikpe mas pulu pumik purukuntrun

REPRODUCIR EN

¿Ñui øsik uninuk mu purukuntrapik palai pasrøtitru? ¿Ñikan chi paílø løtimelø tøkakøtitru? ¿Ñunkan tap kui mørtrai purukumik palai pasrøtitru? ¿Ñunkan Jeupawaim pulu mas trak kementa pasramik kustantrauta? Tiuspa wamintikpe chishtø purukuntrun. Inchentø, ¿Tiuspa mømay wamintamik kø? ¿Tiuspe mayelan mørøpik kø chinta? ¿Ñipe Tiuswan mørtraimpe mantø wamintamik kø? Ashkun.

1. ¿Tiuspa wamintinuk mun miap wamintamik kø? ¿Nam Tiuspa wamintinuk chipuraptø wamintamik kø?

Jesús kusrenanik køn namui Møskai srømpalasrø wapikwantø wamap miantrai. Jesúsma treek marik køn. Nø trenchipik køn: “Ñimbe Tiusba waminchib pønrrappe, øyah chinrrigay: Namui Møskai srømbalasrø wabig...” (Mateo 6:9). Nam Jeupawan waminchene nun mas trak pøntraik mørørar.

Nam Jeupapa wamintinuk chikøpen miamtik køn. Jeupa namun løtøntraimpe nø tap kømui asikwane miamumik køn. Bibliape eshkan: “Nam nun chigøben miappe, nø maig kønrrain køben nam trumay miabene, nøbe namune mørøbig [køn]” (1 Juan 5:14). Jesúspe eshkaik køn chiwantø Tiuswan miamtik kui (leu Mateo 6:9-13). Tiuspa wamintinuk namuimpuraptø miantrap kømø, pesannamumik køn, Tius namuimpurø tapik marikwan unkua chintrap, trektøwai katøkanelan purukuntrai miakun.

2. ¿Nampe mantø Tiuspa waminchap?

Bibliayu eshkapik køn: “Ñimui mantrø umpu chine tøkakuilan [Tiuswan] eshkantrikay” (Salmo 62:8). Trupe, nam Tiuspa waminchippe mantraukutri sørømø wamintamik køn. Tiuspa wamintinuk chu urastøkucha, chukøpen uñatøkucha, namui isupiku niløchiktø waminchip, tømpasra lata, putramisra lata, mømaytøkucha kørikpala waminchene nøpe mørøpik køn.

3. ¿Tiuspe mantø løtapik kø?

Nam chi paílan Bibliatøka løtapik køn. Tiuswai Wamwan nepua ashape kan “nepua ashmíikwan kusrepik køntrai” purukupik køn (Salmo 19:7; leu Santiago 1:5). Nam isuintelø putrøpen, nam mentra trømpøik isumøntrai purukupik køn. Trektøwai, nun kørikpala pøntrapelan katøkanelø isuintelø pøntrapelan purukuntrai isunanøpik køn.

MAS NEPUA KUSREU

Møimpe ashkun ñipe Tiuspa mantø wamintamikwan nø utøntraimpe. Trektøwai Tiuspa waminchene ñune mantø purukupik kui ashchun.

4. Nampe Tiuspa waminchen nø tap utøntraimpe chi maramikwan nepua ashkun

¿Tiuspa wamintinuk nampe chi maramik kø nø mørtraimpe? VIDEUN asay.

VIDEU: ¿Tiuswan misakmera waminchen nøpe mayelan mørøpik kø chintera? (pititø wesruik) (2:42)

Jeupape nuntø neesha miantrai intan. Ley Salmo 65:2, yu leinuk pinaku paílan waminchap:

Tius “mørøpik køn misakmeran nun waminchen”, ¿nøpe ñun mørøk kui wa chintera? ¿Chincha øyeek isuku?

Nøpa wamintinuk mørtraimpe nø maik taikwan møra maramik køn. Ley Miqueas 3:4 incha 1 Pedro 3:12, yu leinuk pinaku paíkwan waminchap:

¿Nam waminchen Tius mørtraimpe chi maramik kø?

Tru pa ejércitosmera kuayaikwan kanantrap Tiuswan miapelø køn. ¿Inchentø Tius pailan mørøpik kø chintera?

5. Tiuspa waminchappe mantraukutri wamintamik køn

Møiløpe tru Tiuspa wamintinuk ke trununtø trununtø miap waminchip kusrewar køn. Inchentø, ¿treekwan Tiuspe møra chintera? Ley Mateo 6:7, yu leinuk pinaku paíkwan waminchap:

¿Nam chi maramik kø Tiuspa wamintinuk trununtø trununtø waminchimøntrappe?

Kualømmørik isu chi tapik tranikwan incha Jeupawan unkua unkua chi. Treek marene, trune patsinuk trununtø trununtø waminchimøntrun.

Kan tap møskaima nui nusrkai mantraukutri chishtø sørømø eshkantrai muniran. Øyamaytøwai, Jeupa nam mantraukutri chishtø sørømø eshkantrai isupik køn.

6. Tiuspa wamintikpe latrø tapchik keta tranik køn

¿Tiuspa wamintinuk mantø mur pøntrøntrai purukuntrera nam isuintelø putrainuk? VIDEUN asay.

VIDEU: Tiuspa wamintikpe metraptø amtrai purukupik køn (1:32)

Bibliape martrap misrik køn, Tiuspa wamintikpe namun mentra trømpøik isumøntrai purupik køn. Ley Filipenses 4:6, 7, yu leinuk pinaku paílan waminchap:

Tiuspa wamintinuk chishtø tamarmuintøkucha ¿mantø purukupik kø?
¿Ñune Tiuspa wamintinuk chipuraptø wamintamik kustantrauta?

¿Nepua asha køtitru?

Amén taikpe “treek køntrun” chipik køn. Biblian pørøp uraskutri Tiuspa wamintinuk srape patsøkøntrap “amén” chipelø køn (1 Crónicas 16:36).

7. Tiuspa waminchap utø wesru

Kanmaype mentra chikøpen maramik køptø Tiuspa wamintamik pesannainapelø ker. ¿Jesúspe Tiuspa wamintikwan mantø ashipik kuik kø? Ley Mateo 14:23 trukutri Marcos 1:35, yu leinuk pinaku paílan waminchap: