KUSRENANIK 11

¿Biblia ñun purukuntraimpe ñipe chi martrap?

REPRODUCIR EN

¿Ñi kanmaywan latrø nuik lutø tøkakua kaimamtik kuitamap møra køtitru? Tru lutøwan murik kømøntrai lamø lamø marintre, øyamaytøwain køn Biblian leinuk. Inchentø ñi: “¿Mømay pølpasramera?” cha, paya mørintre. Ik kusrenanikyupe, ñi Biblian chull møra lentrai mømay maramikwan kusrenanøpik køn.

1. ¿Biblian kualømmørik lemik chintimpatre tapik kø?

Kualømmørik kan misak “maik maramikwan martrai Jeupawai pørilan” lepene, kasraktø uñip trektøwai nø chikøpen mariløyu tap intrun (leu Salmo 1:1-3). Biblian ñi lep pølpasrinuk lamø lamø kualømmørik rato leu. Ñi treek marape, mas tap nepua asha ñun mas latrø tap lemtik køntrun.

2. ¿Biblian leinuk ñun purukuntraimpe ñipe chi martrap?

Biblia namun purukuntraimpe leiktø kømøtø, masken utø wesrua “tsøntatø tap nepua asha isumik køn” (Josué 1:8). Lep yainuk ñiasiktø paya mør: “¿Ik versículosmera Jeupawaimpurø chi kusrenanøpik kø? ¿Ik versículo taimpala nai øsik uninuk mømay maramera? ¿Ik leinukkutri katøkanelan mantø purukumera?”.

3. ¿Ñi Biblian lep pølpasrappe mantø utø wesrantrap?

¿Biblian lentrap utø wesrumik mur køpik kuita? Yam misakmeran trektøwai puraya køn. “Chigøben tabig maramdiig pubene, treegwan ka purainrraindø ashatø” pasrømøta ñiken (Efesios 5:16). Kualømmørik utø wesrua Biblian nepua lemtik køn. Møiløpe løtsøtø kutra lepelø køn. Kape rato isra putrøwa kui kape kip waramisrtrappe lepelø køn. ¿Ñune møik mas tap køntraptik kø trunun nepua maramik?

MAS NEPUA KUSREU

Biblian leinuk mas tap køntrai chi maramtik kuikwan ashkun. Trektøwai ik kusrenanikyupe, Biblian kusrep pølpasrtraptø chitø marøp pølpasramikwan nepua ashchap.

Chi mamikmerantøkucha chull møra may lataik køn, nam Biblian lep pølpasrinukkutri chull møra lemik.

4. Biblian kualømmørik lewape chull møra mas lep køntrun

Kanmaywane Biblian lemik murik kuintre, trektøwain køn ñima mamik mamuikwan nepua mapen, ñi maik køpene ñi mas maintre. Øyamay marene ñune Bibliane mas lek køntrun. Ley 1 Pedro 2:2, yu leinuk pinaku paíkwan waminchap:

¿Kualømmørik Biblian ñi lep yainuk katøkuchi mas lemik kustantrauta?

VIDEUN asay, yu ashchap urektelø kualømmørik Biblian lemikwan mantø chull møra leikwan. Yu videu asinuk pinaku paílan waminchap:

VIDEU: Tiuswai Wamwan untarantrap urektelø chi maramikwan (5:33)

Videuyu urektelø wepamtrupelø, ¿Biblian kualømmørik lep pølpasren chi søtøpøntramisrik kø?
¿Kanmaywan Biblian lemik murik lataik køp mentøpen elachimø lentrai, nømune chi purukuik kø?
¿Chull møra Biblian kualømmørik tap lep amtrai nømpe chi marik kø?

Pølpasrtraptø chi maramikwan:

Kan Biblia lau ñi tørkantø lemik, kusremtik køntrai. Ñui trikmay Traducción del Nuevo Mundo pørik pasrøpene trunun leu, kape katøkan trikmay kuinkucha tap entendemtik køpene lawa leu.
Bibliayuikwan ñun mas kustailan lep pølpasr. Tru mas eshkapik nøørø tarømariku wetøtrantrun “Biblian mantø lep pølpasramikwan”.
Ñi lep yaikwan pøra køtrømarøp intrø. Tru mas eshkapik nøørø tarømariku “Na Biblian lep yaikwan pøra pønsrailø” yu, ik pørin kilkayutøwai pasrapiku.
JW Library^®aplicaciónwan køtrøra. Ñui celularyu, computadoryu, kape tabletyu køtrørape, Biblian leikwan møramtik køntrun chu uñatøkucha.
Traducción del Nuevo Mundo yu apéndicen lau. Truyupe mapasmera, mas eshkapik nøørø tarømariløkucha pøntran, trektøwai ñi tør nepua ashmuilan tør nepua asamteløkucha, ilø køn ñi Biblian chull møra lentrayasik purukuntrapelø.

5. Biblian kusrep pølpasrtraptø ñimetrik nepua ash

Ley Salmo 119:34, yu leinuk pinaku paíkwan waminchap:

¿Biblian lentraptø kape Biblian kusrep pølpasrtraptø ñipe chincha Tiuspa wamintamik kø?

Jeupawaiwan waminchipikpa trune mørik kusreinuk ñun latrø nu purukuntraimpe, ¿ñipe chi maramik kø? Ik pørin kilkawan tør nepua aship wawa, pinaku chi taikwan mar:

Pølpasrøyukutri kusrenanik kilkayuikwan kutike párrafosmeran leu.
Bibliayu pørik pøntrapelan lawa leu. Trukutrimpe, ñiken isu truyu ilan chincha pørik pøntrai.
Tru paílan løtikwane markawa pash. Treek marape, Jeupawaiwan waminchipikpa kusrep putramisren ñun mas tap nepua ashchai purukuntrun.

¿Nepua asha køtitru?

Jeupawaiwan waminchipeløpe yam Bibliasmeran lewa ker. Inchentø Traducción del Nuevo Mundo, ikwan mas tapik kui ashipelø ker, kakentø tørkantik søl eshkapik køn, incha Tiuswai munchin kenamarøpik køn (jw.org yu pørikwan ash: “¿Jeupawaiwan waminchipelø nømuyasiktø Biblia tøkar kø chintera?”).

MØILØPE TREEK ISUPELØ KØN: “Biblian wamisra kusrentrap kaimapik kur, kakentø chine marøptø muraraiktø uñipik kur” cha.

¿Ñipe manchipsruku?

¿CHI KUSREKU?

Bibliayuikwan kusrentrappe kualømmørik utø wesrua lentrap inchi, trektøwai Tiuswan miau truyu kusreikwan tørkantø nepua asamtik køntrain cha, incha kusrep pølpasrtraptø ñimetrik tap nepua ash.