Jeupa namui Ellmarøp Møskai mara pasrøppe nun tarømisrmøntrai marik køn; kakentø namun purap kusrepik. Nø namun untarap tap køntrai isupik køn (Jeremías 10:23). Urekmerape møskalø kusrenanøp putrøntrai palailø køn, trektøwai misakmerakucha nøtø pera intrai palailø ker (Isaías 48:17, 18). Bibliayukutri ciertoneløpe Tiuswainukkutri keta tranilø lataik køn. Leu 2 Timoteo 3:16.

Jeupawai karuiløpa, Bibiliayukutri ciertoneløpa namui øsik amønaninuk tap amtrai, wentøsrø latrø tapelan maik utamikwan purukupik køn. Nøtøwai mara pønsraik køppe, nun møra maramik køn. Leu Romanos 15:4; Apocalipsis 4:11.

Bibliayukutri latrø nuik ciertoneløpe namun chiyukøpentø chi maramikwan martrai purukuntrapik køn. Katøkanpurappe, karuiløpe kan kan chi maramiku purukupik køn (Deuteronomio 22:8). Nam nepua asha Bibliayukutri ciertonelø chiyukøpen mantø purukutashchap tsøntatø tsøntatø isumik køn (Proverbios 2:10-12). Por ejemplo, Bibliape kusrenanøpik køn, nam øsik amønaikpe Tius Nø ketik kui. Ik namun purukuntrun, namui kualinuk, namui nakchak umpu, nam chu ampiksrønkucha, kakentø tørtø kenamaran namui øsik amønaikwan katøkanelaiwankucha trupishimøntrap, tap isua pøntramik køn. Leu Hechos 17:28.

Jesúspe pakatø pønsraik køn Bibliayukutri latrø nuik ciertonelø. Kanyupe, kenamaran chincha øsik waraik kui: Tiuswan nepua asamik, untaramik, nuntø møramik. Nam øsik amønainuk ilan  chu urastøkucha isumik køn (Proverbios 3:6). Truikwan marøpeløpe Tiuswai trak linchipelø køntrun, kasrak manakatik øsik warøntrun. Leu Mateo 22:36-38.

Payupe, katøkaneløpa tap pøntrøntrai purukupik køn (1 Corintios 13:4-7). Øsik amønainuk ikwan marikpe, Tius misakwan nø maik marøpik kuinuk, namkucha trektøwai maramik køn. Leu Mateo 7:12; 22:39, 40.

Bibliayukutri latrø nuik ciertonelø nakchak umpu untaktøka kanpalatø putrøntrai purukun (Colosenses 3:12-14). Ikpe nakchakuilan purømisrøpik køn, kakentø kasherawar pøntraikpe manakatikwai kui kusrenanan. Leu Génesis 2:24.

Namui kualinuk kape kualamik lap uniksrø, Bibliayukutri ciertonelan møra marikpe purukupik køn. Biblia kusrenanøpik køn, nam kualinuk isa waminchip pøntrømumik, masken tap kuallipelø kømik. Treek marene, kualamikwan tøkakøntrun, kakentø kualinuk metrap aship pøntrapelø øyelan lapelø køn (Proverbios 10:4, 26; Hebreos 13:18). Yawanpa, kewa pøntraikwanpa, mamikwanpa tøkakuikkutrimpe kasraktø amønamtik kui, Tius wampe kusrenanøpik køn. Leu Mateo 6:24, 25, 33; 1 Timoteo 6:8-10.

Bibliayukutri latrø nuik ciertoneløpe tap amønamik purukupik køn (Proverbios 14:30; 22:24, 25). Bibliape mutsikelø kømøntrai karupik køn, ikwan møra marikpe kuamikyukutri, kuantrøyukutri purømisrøpik køn (Proverbios 23:20). Namui isupikwan trupisansrønkatik marmuisruantø, Jeupape mutsikwane merømíik køn (Salmo 104:15; 1 Corintios 6:10). Bibliayukutri ciertonelø namui øsik amønainuk, namui isuinuk maik køtashchap purukupik køn (Salmo 119:97-100). Nam Cristoi wentautø ampupelø Bibliayu kusreilan møra mara tap pøntramikwaintø kømø; masken namui Møskai Jeupa srømpalasrø wapikwan tap kui ashchai, marøpelø ker. Leu Mateo 5:14-16.