Jesúspe misakmera lataik kømøn, yu Pirau kal-lamuatø srømpalasrø kan ángel kuik køn (Juan 8:23). Jeupape srøtø marøppe Jesúswan metrik marik kua, nøpa chimerantøkucha mara pønsramik purukuik køn. Bibliape Jesúswan Tiuswai kantø Nusrkai cha waman, kakentø Tius nøtø muken purukuimíik marik kua (Juan 1:14). Trektøwai, “Wampe” cha waman, kakentø Møskawai wamwan srua intrapik køpen. Leu Hebreos 1:2; Colosenses 1:15, 16.

Tius nui Nusrkawan yu Piraumay ørik køn. Treek attraimpe, Judásrik kan srusrø Maria taikwan, Jesúswai øsik unikwan nui patsø umpu pasra unø misra kal-lantrai marik køn. Inchakutri, Jesús kan møkwai nusrkain kømøn (Lucas 1:30-35). Yu Pirau Jesús atruppe pønpurap martrap atrik køn: 1) Tiuswaimpurap cierton mu kuikwan kusrenantrap, 2) nø maik mariløtrawa chi puintøkucha Tius martrap isuikwan martrap, inchen 3) misakmeran kaikyukutrimpa kuamikyukutrimpa wesrantrai nui sølkantø øsik unikwan trantrap. Leu Mateo 20:28.

Kaikyukutri kuamikyukutri wesruikpe kan misakwan kuetchimøntrai latrø nu an purø-pakarap lataitøwain køn (Éxodo 21:29, 30). Pølpasrøyutø Tius namun marøppe, kuamøntrai kølliramøntrai isumuik køn. Treek kui asha pøntrer, kakentø Tiuspe Adánwan isuptø køntrai wamintik køn tru Tius maik taikwan mørmua kaik marene kuantrap køn cha. Tiuswan  mørik kuimpe manaken kuamikpe nepumupsruik kuintrun (Génesis 2:16, 17; 5:5). Biblia maik eshkainuk, Adánkutrintø tru kuamikpe maya misakwan puraatrup atrik køn. Adánwainukkutri amtrua pøntrapelan kaik marikwan purørik kua kuamik nepun, trukutrimpe kaikyukutrimpa kuamikyukutrimpa wesraik kømik palailø ker. Leu Romanos 5:12; 6:23.

Trupe, ¿namun kaikyukutrimpa kuamikyukutrimpa mu wesrantraptik kuik kera? Nam sølkantelø kømuik køppe, mukucha kanelai kaik mariløkutri wesrantrap kaimaik køn, inchakutri nam kuapen namui kalø marilaimpuraptø pakarapelø ker. Leu Romanos 3:23.

Jesús nam lataik kømøn, nø sølkantik kuik køppe manaken kaløpe marmuik køn. Nø kalø marøpik kuikkutri kuamøn masken katøkanelai kalø marimpurø ulø paimøntrai kuaik køn. Tiuspe namuimpurø kuantrai nui Nusrkawan ørikpe, misakmeran latrø nu untarapik kui kenamarik køn. Øyektøwai, Jesús namun kaikyukutri kuamikyukutri wesrantrai nui øsik unikwan tranape, nui Møskawan møra marikpe namun untakik kui kenamaran. Leu Juan 3:16; Romanos 5:18, 19.

Videun ash ¿Chincha kuaik kø Jesúspe?

Jesús yu Pirau uñip uras kuantrelan tamarøp, kuapelan kusrup, kiship amøñipelan purukup, wentøsrø Tiuswai misakmeraimpurø tapik martrap kui kenamarik køn (Mateo 15:30, 31; Juan 5:28). Jesús kuapen Tiuspe srømpalasrø katøle espíritu køntrai øsiranik køn (1 Pedro 3:18). Trukutri, yu Pirau misakmeran aship karup wantrai wesrua pasramne, nui Møskawai kusrmay wamisrik køn (Hebreos 10:12, 13). Møyampe srømpalasrø Jesús yantø aship karup wan, øyeekkutri nui kusrenanøp pera unilø, Pirø mupa kuimpurap, ik tap wammørøsraikwan eshkap amønan. Leu Apocalipsis 11:15; Mateo 24:14.

Tius Jesúswan chiwantøkucha mu mantamkeik martrai tranikkutri, latrø tap karupik misra, pestø kaik marøpelan pinishintrun, chishtø kiship waramikwan patsøkøntrun. Latrø tap Pirøchik misren Jesúswan kørewa møra marøpeløpe kasraktø warøntrun. Leu Mateo 5:5.