Tius chishtø mara pønsraik køn. Manasrønkutri manasrønkatik wapik, manaken patsømíik køn (1 Timoteo 1:17). Bibliayu tap wammørøsrailø Tiuswainukkutri atrupik køn (1 Timoteo 1:11). Nøkutri øsik amøner, inchawai nuntø adorap, nuyelan maramik køn. Leu Apocalipsis 4:11.

Tiuspe espíritu kuikkutri nune muken ashmøn, namui asr lataken kømø, nøpe purø nuik køn (Juan 1:18; 4:24). Tius maik kuikwan nepua ashchappe, nø chishtø mara pønsraikwan asamik køn. Nam nepua asinukma pek pek yam mamik nika tusrmeran, umeran, marøp intikkutri Tiuspe namun latrø nu untakik kui, purø tap isua marøpik kui nepua aser. Trektøwai, Pirø pøtøkatan srømpalasrø wepampamkasrø chishtø køpikpe, nø Marampurap Marøpik kui kenamaran. Leu Romanos 1:20.

Katøkanpurappe, Tius mu kuikwan nam tap nepua ashchappe Biblian lemik køn. Nun chi tap kui asikwan kape chi tap kømui ashipikwanpa, katø nam kalø maren kape tapikwan maren nø maik isuikwan, trupurø namun mantø marikwan eshkan, Bibliayu. Leu Santiago 4:6; 1 Juan 4:8.

Jesúspe trentaik køn: “Namui Møskai srømbalasrø wabig, ñui munchibe tabigweindø tarømara, newan tab indig kønrrun” cha (Mateo 6:9). Møiløpe Tiuswan “Señor” kape “Tius” cha, wamapelø kuinkucha nøpe kan munchi tøkaik køn. Pek wammay waminchipelaimpe, Tiuswai munchiwan nømui wamintinuk maik møramtik køpen, treek wamapelø køn. Namui wammaype Jeupa køn, inchentø pulø wammaype Jehová wamapelø køn. Leu Génesis 4:26.

Biblia pek pek wammay pøra wesruiløyu, Tiuswai munchin ketrawa “Tius” kape “Señor” cha, lliska pøra pønsra køn.  Srøtøchitø Biblia pørinuk, Tiuswai munchipe 7.000 lutau pørilø kenamisrøpik kuik køn. Jesúspe misakmeran Tiuswaimpurø kusrenanøppe, Jeupawai munchin katøle katøle eshkapik kuik køn. Leu Juan 17:26.

Videun ash ¿Tius kan munchi tøkaik kuita?

Jeupape namune untarapik køpene, ¿chinchatre kiship amønamik namun pupasa? Namun tap kømui kiship amønamik pupen, møiløpe trentan tru Tius nam chinchipelø køtashchap maran cha, Tiuspe treekpe marmíik køn. Leu Santiago 1:13.

Nam øsik amønaiku, nam isua martrai Jeupape namune elatsik køn, inchentø mas tap isua maramikpe Tiuswayelan maratøwain køn (Josué 24:15). Inchen, latrø nu misakmera kaikwan marøpelø kuikkutri kiship amønamik pun. Tru søl kømíikwan maren Jeupawan pusrkuananøpik køn. Leu Génesis 6:5, 6.

Jeupa namun untarapik kuik køppe kasrak amøñintrai isupik køn. Treekkutri namun pusrkuankarupelan, kaik marøpelan, yana palømøn patsøkailø kømik. Inchen, møimpatøpe øyeek ka puraipasinkarun kakentø nøpe chi maramikwan isua tøkakøn, 8yu kusreinuk trupurø mas tør eshkantrun. Leu Romanos 2:6-8; 2 Pedro 3:7, 13.

Nuimay kemallchai Jeupa namun kan yaskapwan kura pasrik køn, truikpe nøpa wamintik køn. Jeupa mayelan kan kanuimpurø tap køntrai isua martrap wapik køn (1 Juan 5:14). Jeupawaimpurap kutike martrap kaimainkucha, nøpe isuatøka pasraikkutri, namui kalø marilan pesanantraptøwai wan. Inchawai, sølkantelø kømuinkucha nui linchipelø køntrun. Leu 1 Juan 1:9; Santiago 4:8.

Tius namun øsik amønaikwan tranik køppe, nune mas latrø nuken untaramik køn, katønelan lataik kømø (Marcos 12:30). Tius maik karuilan møra marene, nun nepua ashene, untarapelø kui kenamartrun. Nam treek marene, nøpa traktø lincha pøntrøntrun. Leu 1 Timoteo 2:4; 1 Juan 5:3.