KUSRENANIK 10
¿Religión cierton kusrenanøp pasrapikwan mantø wetøtrantrap?
1. ¿Religión ciertonikwan kusrennøpik kantø kø chinta?
“Tab asha kuy, chibig køn, ‘Tius maig karuigwan eshkabelø ker’ chibelø isa waminchibelan” (MATEO 7:15).
Jesús nui kusrenanøp pera unilan kan religióntø kui kusrennik køn, truikpe cierton kusrenanøp pasrapiktø køn. Nø kemesra wamintiktøka trentaik køn: “Trag mayba managuen patsømø øsig purramsrømay pera ibiibe, [...] trunun wetørrabeløbe mamdø køn chibig køn” (Mateo 7:14). Tiuswan adorantrap Biblia maik taikwan møra marøpelantø, Tiuspe kashmíik køn. Biblia maik taikwan møra adorapeløpe, nømui isuikwan Tiuswainuktø pasra tøkakuikpe kantø køn. Leu Juan 4:23, 24; 14:6; Efesios 4:4, 5.
Videun ash ¿Religionesmera kutikelan Tius tap kui asha utapik kø chintera?
2. ¿Nui wentautø ampupelan Jesúspe chincha ashiptø køntrikay cha, eshkaik kø?
“Tiuswei mayu amøñibelø ker chibendø, nømui chigøben marøb amønaitøgabe chi ashmeelø kui lataitøweih marøbelø køn” (TITO 1:16).
Jesúspe nui wentautø ampupelan, møiløpe misakmeran isatø kusrennøpelø køntrun cha, taik køn. Møin kualømmerawan nepua asamtik køn, religionesmera Tiuswaimpurø cierton kusrennøpelø ker chipentø, pekmay pekmay kusrennøpelø, nøm ampumay imay nømuimpuraptø amøñipelø køn. Cierton religiónyutø Cristoi wentautø ampupeløtø nøm isuinuk tapelø tøkakuikwanpa, tap marilanpa kenamarøpelø kuikkutri katøkan misakmera nepua ashipelø køn. Leu Mateo 7:13-23.
3. ¿Cristoi wentautø ampupelø ciertonelø kui mantø nepua ashku?
Cierton Cristoi wentautø ampupelø trattrøkatø marilan ashkun:
-
Biblian Tiuswai wam kui køripala kørepelø køn. Cierton Cristoi wentautø ampupelø, nøm øsik amønainuk Bibliayu maik taikwan møra martrap trantrapelø køn. Cierton religiónpe møkelai isuilane kusrenmelø køn (Mateo 15:7-9). Incha, nøm maik kusreikwan treek marøpelø køn. Leu Juan 17:17; 2 Timoteo 3:16, 17.
-
Tiuswai munchin køripala pøntrapelø køn, truikpe Jeupa køn. Jesúspe nui Møskawai munchin køripala pasrapik kua, katøkan misakmeran tru munchin nepua asønkaruntrap kusrenanik køn. Jesúspe misakmeran Jeupawaimpurø wamintikpe, tru Tiuswai munchin chishik køntrai cha miantrai kusrenanik køn (Mateo 6:9). Ñi øsik tsuinuk, ¿Tiuswai munchin mumera nepua ashchai kusrenanøpelø kø? Leu Juan 17:26; Romanos 10:13, 14.
-
Tius Nø Aship Karup Waikwan kusrenanøp ampan. Jesúswan yu Piraumay ørik køn Tius Nø Aship Karup Waikwan kusrenantrai; truiktø køn Pirau purep pasrapikwan tamartrapikpe. Tiuswaiwan nø kuam kualøm pumnekatik kusrenanik køn (Lucas 4:43; 8:1; 23:42, 43). Nui kusrenanøp pera unilø Tius Nø Aship Karup Waikwan kusrenantrun cha, taik køn. Mukøpen ñun Tius Nø Aship Karup Waikwane kusrenanøp pupen, ¿chi religiónkutri atrik tamaku? Leu Mateo 24:14.
-
Nøm ik Pirauelø kømøn. Cristoi wentautø ampupeløpe políticasyu purukumelø, alekiyap pøntrainuk amøñimelø køn (Juan 17:16; 18:36). Yu Pirau latrø trømpøik martrain isunanønkarupelane marmelø køn. Leu Santiago 4:4.
-
Cierton Cristoi wentautø ampupeløpe ampumay imay untak kenamariyapelø køn. Tiuswai wampe nømun chi misakmerantøkucha køripalar køntrai kusrenanøpik køn. Religionesmera ciertonikwan kusrenanmeløpe pek misakmerape katøkan pek misakmerapa kuayailøyu, nøm purukup amøñipelø køn, inchen cierton Cristoi wentautø ampupeløpe treekwan marmelø køn (Miqueas 4:1-3). Masken, nøm purukuilan katøpurø trantrai kømøtø, nømui utøwan, chitø tøkakuilan, misakmeran purukup tap kui mørtrai inchipelø køn. Leu Juan 13:34, 35; 1 Juan 4:20.
4. ¿Cierton religión møik kuikwan nepua ashipsruku?
¿Chi religióntre Bibliayuilan kutike kusrenanøpelø kø? ¿Chi religióntre Tiuswai munchin køripala pøntrapelø kø? ¿Chi religióntre eshkapik kø, Tius Nø Aship Karup Waiktø yu Pirau trømpøik purep pasrapikwan tamartrap kui? ¿Mumera kø cierton untak kenamariyapelø? ¿Mumera kø kuayailøyu purukup amøñipeløpe? ¿Ñipe manchipsruku? Leu 1 Juan 3:10-12.
