KUSRENANIK 8
¿Tius chinchatre namun kaik pupasa kiship waramik?
1. ¿Kaik marilø mantø kenamisrik kera?
Metrapkutri møyankatik, tørtø kenamaran Pirau trømpøik purep pasraikwan misakmera pera aship pøntrapelø patsønkøntrap kaima kui
Srøtø Satanás isa waminchikkutri kaik marilø kenamisrik køn. Nøpe kan tap ángel sølkantik inchentø “managuen tru newan ciertonigube pasramisra marmíig køn” (Juan 8:44). Nunkucha adorantrai isup mentik køn inchentø Tiuswantø adoramik køn. Isa wamincha Evan kepenøsrkaik køn, Tiuswan kømø nun møra martrai. Adánkucha nui srawainkatø pasramisra, Tiuswan møra marmuik køn. Nøm treek isua marikkutri kiship waramik pup, kuamik pup, nepuim pasran. Leu Génesis 3:1-6, 19.
Satanáspe Evan mørmøntrai eshkawa, Tiuswaimpurø søtøpasrøp mentik køn. Kuaimantsikpe trentaik køn: “Jeupa tap aship karup wantrap kaik køn” cha. Latrø nu misakmera Tius aship karup waikwan kaasha kuaimantsikwainkatø pøntramisrik køn. Inchakutri, Satanás “yu pirauigwane kerrigu mayamba [...,] nø ashib karub pasran”. Leu Juan 14:30; 1 Juan 5:19.
2. ¿Tius mariløyupe chiwankøpen sølkantik marmuik kø chinta?
Jeupa kutike marikpe sølkantik køn. Adán, Evapa, ángelesmerapa, Tiuswan møra martraptelø kuik køn (Deuteronomio 32:4, 5). Nøpe namun marøppe, kaikwan, sølwan, nam isua martrai marik køn. Nam Jeupawayelan marøppe untaktøka martrai intan. Leu Santiago 1:13-15; 1 Juan 5:3.
3. ¿Tius chinchatre namun kiship waramik pupasa?
Jeupa nun søtøpasramisrøpelan pestø patsøkøntrun. ¿Chi munirap pasra? Yu Pirau aship karup putrapeløpe, Jeupa purukuikwan chikarkutri, misakmeran tap asha martrap kaima kui kenamaran (Eclesiastés 7:29; 8:9). Metrapkutri purep pasraikpe tørtø kenamaran, yu Pirau pera aship pøntrapelø søl marmuilan, kalø marilan, pek misakmerape katøkan pek misakmerapa kuayailan, ni kuantrømeranken patsønkøntrap kaima kui. Leu Jeremías 10:23; Romanos 9:17.
Tius Nø Aship Karup Waikwan manchipen møra marape, tapelan utøntrun (Isaías 48:17, 18). Maya yanayutø, Jeupape yu Pirau aship karup putrapelan pinishintrun. Tius Nø Aship Karup Waimpurø purukupeløtø, yu Pirau øsik warøntrun (Isaías 11:9). Leu 1 Corintios 15:24; Apocalipsis 11:15.
Videun ash ¿Tius chinchatre namun kiship waramik pupasa?
4. Tius tammaytø muniraikkutri, ¿namun chi yaskawan kura pasrik kø?
Nuimpurap marøppe, Tius tapelø tranøpik kuikkutri møra marøpelø kui, Satanás trentaik køn. Tius tammaytø munirap waikkutri, namui øsik amønaiku kuaimantsik isaptik kui kenamaramtik køn, trektøwai møkelai karup putraikwan kømø, Tius Nø Aship Karup Waikwan purukup pøntrer. Leu Job 1:8-12; Proverbios 27:11.
5. ¿Tiuswainkatø mantø pøntramisrtrap?
Tius namun aship karup pasrøntrai isupelø kui nam isua marinuk kenamaramtik køn
Tiuswan tap nepua asamik køn nø maik adorantrai isupikwan. Religión ciertonik Bibliatøka kusrenanøpikpa ampamik køn (Juan 4:23). Jesús tap kenamarikwan wentautø ampape políticasyu, kuayailø purukumelø ker, treek marape, Satanás karup pasraikwan kaasik kenamartrun. Leu Juan 17:14.
Kuaimantsik misakmeran isunkarun trømpøilan martrai. Trømpøilan marmøntrap inchen, namui yawelø kape trak linchipelø intsa ashchun, nømpa tap amønapkaik køntrun (1 Pedro 4:3, 4). Treek puraipene, ¿Tiuspa tap linchipeløpa amønamik kø chintera? ¿Untaraik Tius maik taikwan møra marøpelø køpra chintera? Kuaimantsikpe trentaik køn: “Isuintelø pupen, Tius maik taikwan mørmelø køn” cha. Treek kømøtø, Tius maik taikwan møra marape kenamartrun, kuaimantsikpe isaptik kui. Leu 1 Corintios 6:9, 10; 15:33.
Tius namun untakik kuikkutri tørtø kenamaran, ik Pirau kiship waramikwanpa kaløwanpa patsøkøntrap kui. Fetøka Tiuswainkatø pøntrapeløpe manakatik øsik warøntrun. Leu Juan 3:16.
