¿Tius Nø Aship Karup Waikwan chincha palai pøntrapra?
Srøtø pølpasrøpyutø Jeupa namui Ellmarøpik, Nøtø asha karup incha untaktøka asha karupik kuik køn. Incha kan latrø tap Pirøchik marøp misakmera truyu warøntrai, mamikmera latrø nu tøkaik, Edén taiksrø. Incha nømune kasraktø kuallip maramelø tøkakøntrai tranik køn (Génesis 1:28, 29; 2:8, 15). Misakmera Tiuswan møra marik kuimpe, møinkatik pishintø waramik køpsruik kuintrun.
Adánpa Evapape Tius aship karup waikwan kaasik køn.
Biblia eshkan, Satanás kan ángel mørmíik trentaikwan: “Mayelaim Pala Aship Karup Waikpe Jeupawain kømøn” cha. Tius namun asha karumupene mas kasraktø køntrap kui treek taik køn. Inchentø Adánpa Evapa Satanáswainkatø pøntramisra yantø Tiuswan mørmuik køn (Génesis 3:1-6; Apocalipsis 12:9).
Adánpa Evapa Jeupa aship karup waikwan wentøpasrikkutri, nømune latrø tap Pirøchikukutri wepusrik køn incha kuantrø misra kuamik nepuik køn (Génesis 3:17-19). Trømpøik marinukkutri nømuntø nepumøtø, nømun urekmerankucha kaløpe nepuik køn. Biblia trenchipik køn “kaig mariima kan møkkurrindø [Adán] yu pirau kebarruben, kwamibe tru kaig marikkurri arrig [køn]” (Romanos 5:12). Kaik marikkutri katøkan trømpik pui pasran: “Misakmeratø ampukutri ikutri aship karup pøntraikkutri muntøkucha trømpøik pupik køn” (Eclesiastés 8:9). Treekwain køn, misakmeratø karup pøntraikkutri chukøpen trømpøik pup pasran.
MISAKMERA NØMASIKTØ KARUP PØLPASRIK KØN
Nemrod Tiuswai karuikwan søtøpasra misrik køn.
Bibliape Nemrod karup pølpasrik kui eshkan, nøpe Tiuswai karuikwan søtøpasra misrik køn. Tru urasrønkutri katøkanelan trømpøik marøpelø køn karupelø køp chiptø. Treekkutri karupik Salomónpe 3.000 pilamera wentausrø treek pørik køn: “Na ashipik kur kiship amøñipelan, nømun tap kui mørtraimpe muken purukumelø køn. Masken kiship amøñintrai marøpeløpe nøm køncha metrap aship karup putrapelø” (Eclesiastés 4:1).
Møin kualøm trektøwai purep pasran. 2009 pilasrø Naciones Unidas wammørøsraik køn misakmera treek isupelø kui “trømpøik purep pasrapikpe metrap aship karup putrapelø kalø marikkutri kui”.
YANTØ YUNØMARAMIK URA PUN
Kan mas tap aship karup waikwan tap sruantrapelø tøkaik, namun treek palan. Namui Ellmarøpikpe treekwan trantrap køtrømisrik køn.
Møi kualømpe tap aship karup putrapeløken Pirøwan misakmeran latrø trømpøik pup pasrapikwan tamartrap kaima køn.
Tius Nø Aship Karup Waikpe yu Pirau aship karup putrapelan yunømartrun incha “Tius nø aship karup waiktø manakatikwai køntrun” (Daniel 2:44). Ik Aship Karup Waikpe latrø nu misakmera padrenuestroyu miak truik køn (Mateo 6:9, 10). Inchen Aship Karup Wantrapikpe Tius kømøn, masken Nøpe yu Pirau kan møk lataik uñipikwan lawa wesruik køn. ¿Mun lawa wesruik kø?
