Kalø marilan pesannamikpe pusrkwantø wammera taikwane namui matraukutri pesannawa chikucha esekamumik køn, pero katøkanpurappe chi purayailane puraimuik lataik martrap kømø.

BIBLIA CHI TAIKWAN: “Kanikkurri kanikkurri chigúingucha lata inchimumigwan køben, møikkøben ‘øig øyeeg inndan’ chib pønrramig tøgaguabe, kanikkurri kanikkurri chi ulø paymø, pesannab inchibelø kømigwan købengue” (Colosenses 3:13).

“Nam muntøpen untarawape kailantø nepua ashmumik køn treek kømø, nø tap kømelø tøkaik kua yunømartrap mur trantrilan aser” (Aaron).

Kalø marilan pesannamø esekailø kalø pupik køn kuantrøken misrtrun, chikøpentø tap kømui isup, trektøwai kasherawa pøntraikwan mintisan puntrun.

“Kan piji nai kek pusrkwantø wammera taikwan tiusmanta pesannatruntrik chitan. Kalø marilan pesannamikpe mur kuik køn, pero nape pesannaik køn, nane mas pusrkuaptø nø kalø marilan pesannatruntrik chipen chu urastø marmuilan køtrø isutan. Nam kasherawa pøntrainuk øyasrønkatik køtrø inchimupsruintrun” (Julia).

ÑITØWAI PAYA MØR

Ñui srai kek chikøpen mara pusrkuantelø maren treek martrap isua uñip lataik kui ashmøta.

• ¿Ñipe purø kullaptik køtitru?

• ¿Ñipe kalø marilan tiusmanta cha pesannatruntrik chintrai isupik køtitru kape ñitøwai pestø pesannapik køtitru?

PAILØ MISRA WAMINTAY

• ¿Mayayanayu pailøpa kalø marilan pesannapelø køke?

• ¿Chi martrap kalø marilan mas mayachitø pesannantrap?

IKWAN MARTRAP ISU

• Ñui srai kek chikøpen mara pusrkuantelø maren treek martrap isua uñip lataik kui ashmøta.

• Ñui srawan ñui kekwan nepua asha tap intay, “kaguende nambe mayeeløba chiyugøben kalø marøb pellibelø ker” (Santiago 3:2).

“Pailøpa kalø marilø køpene chi mur kømíik køn kalø marilan pesannamik, pero mur køpik køn kantø tap kømíik marene. Kalø marilan pesannantrappe køtrømayelø kømik køn” (Kimberly).

BIBLIA CHI TAIKWAN: “Møikkøben ñun kejawa, juezweimay merranene, tru kejabiiba mayu ib pasrappatø, tammay kørrømisrkun cha, petø wamindam lau” (Mateo 5:25).