Srøilø marameløpe ka piaktø kømíik køn, treektø kømøtø ñun mariløyu chikøpen puraintrai maramik køn. Ilan martrappe utøchik palapik køn, mantø pølpasramikwan, chitø maramikwan ashchap trektøwai ilan maramikpe mur køpik køn.

Srøilø marøp pølpasramikpe lamøtik pititik yapik palapik køn, ilan maramikpe kan trune, pøl, pila puraipik køn. Ilan kan yanayu martrappe lamø lamø pølpasra marøp yamik køn.

Srøilan martrap pølpasra patsøkape ñiasiktøwai tapik kui aship mur pasrøntrun ñui linchipeløpa mas trak kementap pasrøntrun, ñitøwai kasrak uñchun.

Ñiasiktøwai tapik kui aship mur pasrøntrun. Srøilø lantøtøle martrap pølpasra patsøkape trektøwai mas nøtrelø martrap pølpastrun. Trektøwai kualømmørik chikøpentø tap kømeløtø pupen trupømøtø tamartrun. Kan ejemplo pasrinuk linchipelø mømay køpentø sruaintraimpe marmøntrun.

Ñui linchipeløpa mas trak kementap pasrøntrun. Misakmerape mukøpen chumay yamikwan chi maramikwan tørtø srua pasrapikwan mas linchipeløpe. Trutø kømøtø trupe truilan martrap mur trantrapelan. Katøkanpurappe linchipelø tøkakuinuk, mas trak lincha pøntrøntrappe kualinuk ampukutri ikkutri lata lata kualilø yukutri køpik køn, mas srøilø martrap pølpasrinuk mara pønsramik.

Ñitøwai kasrak uñchun. Srøilø martrap pølpasra nepuinkatikpe ñitøwai latrø kasrak pasrøntrun.

“Nane køtrø kustapik køn srøilø maramelø tøkakømikpe kakentø tøkakuinukpe kualømmørik chichitøken maramik utøchik køpik køn. Treeløyu marinuk metraptø mas marøp intrap maramikwan nu purukupik køn. Srøilan martrap pølpasra patsø køpene wentømay keesha asha asinuk cierton patsøka kasrarapik kur” (Christopher).

BIBLIA CHI TAIKWAN: “Isik ichipikwantø aship pasrapikpe ellwamøntrun, wañimerantø aship pasrapikpe chikucha tulishimøntrun” (Eclesiastés 11:4).

Srøilan mara pønsrøntrappe ilan asha mar.

Srøilø maramelan martrap isu. Chikøpen martrap isuilan pøra pønsrø, trukutri kan kan chu maramikwan isu incha truilan nepuntrap mar.

Mantø maramikwan martrap isu. Srøilø pølpasrtraintilan ik pørilan kan kan asha mar:

• Kan fecha pasra patsøkøntrap mar.

• Chi maramelan pøra pønsrø.

• Chikøpentø tap kømelø pupene metraptø intrap isu.

Møimpesi martrap pasramisr. Ke chishtø tamarilø pøntrømuinkucha trukutri pølpasramikwan marøp pølpasr, treek marape patsøkøntrap metraptø intrø. Lamøtik martrap pølpasra patsøkape, ñitøwai nepua isu mantø marilan.

BIBLIA CHI TAIKWAN: “Cierton kuallip misakwaimpe martrap isuiløyu tapelø marilø kenamistrun” (Proverbios 21:5).