Tapelø kenamariløpe nam øsik amønainuk maik kusrenanilan trektøwai kenamarøp pøntramik køn. Møskaimpe chu urastøkucha nui unek sølwan eshkantraimpe muniramøta, yaskapyu wamap pupen, ñi møskai ya wapentø mukaken chip wesruantøpe unekpe truikwan mørtrun.

“Misakmerape trenchipelø køn, na eshkailan martrap na marilan kømø pero ikpe urekpape treek pumik køn. Kan esponja latailø køn chi chipen chi maren purø maya kemørøpelø, pek kusrenana pektø marene urekpe asha namune trenchintrun” (David).

BIBLIA CHI TAIKWAN: “Ñi katøganelanguen kusrenanøbig købendø […] ‘Nilamig kømøn’ chib, ñi eshkab kusrenanendø, ¿ñigan niløtirru?” (Romanos 2:21).

Misakmera ñim møskalø ñim mailø kuinuk urekmerape truilan mas ashipelø køn, kan kusrep yau linchipelø latailøken kømø, trekkutri ñimken møskalø ñimui urekwan tap maywan amtrai kusrenanøp pøntrøntrapeløpe, pero ñimken øsik amønainuk tapelø kenamarøp pøntrøntrapelø.

“Chikøpentø namui urekwan llisrkøp llisrkøp cien piejes eshkapen, møra mørmø chintik tap ashmøntrun, nam chikøpen martrap tailan mørmupene, ñima treek kømøtitru chipelø køn malauke, nam chi maren aship pøntrapelø køn, treek kømup lataik inchentø” (Nicole).

BIBLIA CHI TAIKWAN: “Tru kusrebig kømig Tiusweinukkurri arrub, […] ka treeg kønmab ashchaindø kømø, maig maramigwan marøbig kømig, treeg køn” (Santiago 3:17).

Ñiasiktøwai paya mør: ¿Mantø wamapik køpra nai srawan kekwan urekwanpa? ¿Televisiónyu chimeratø ashipik køpra?¿Namui linchipelø mailø kera?¿Katøkanelaimpurap isupik køprachinta?¿Nune gustantrauta ñui urekmera ñi lataik køntrai chu uras køpen?

“Nai kek lata na lata tap wammera kusrenanilan, namken marmupentø urekmeran respetawa martrai karumelø ker” (Christine).

Kalø marikwan pesannatruntrik cha miaik. Urekmerape ashipeløpe møskaløpe sølkantelø kømui. Treekkutri ñi chikøpentø kalø marape pesannatruntrik cha waminchi ñimui urekwan, srawan kape kekwan, ñi treek marape tapelø kusrenantrun, køtrømayelø kømikwan chiyutøkucha sølwan martrai.

“Nam tsalø marape kalø marilan pesannatruntrik tammik køn, treek marmuinkatikpe namui urekmerakucha treek maramikwan kusremøntrun” (Robin).