Unøkutri naturalezan latrø nu kustapik kuik køn. Jyväskylä Finlandiasrø tru ciuda pøtøkatan tusr pøntrapelan, pisumerankucha nai yaweløpa ashchap wepampupelø kuik køn. Nane ushamerankucha latrø nu kustapik køn. Unø kua werameran, mishmeran, irøntrap sulu ashipik kuik køn. Nurap ya ushameran trømpøik marøpelø kuikwan ashen, tap kømui mørøp mentik køn. Treekkutri, kan urkanisasiun ushameran purømisrøp pøntrapelainuk kementik køn. Truyupe misakmera na latawai purukuntrap isupelø kuik køn.

Ushameran øyeek trømpøik marmøntrai waminchap wepampupelø kuik køn. Ushamerai kalusmeran yanøpelaimpurap, tru laboratoriosmeraimpurap, yantø treek marmøntrai protestantrap, manifestantrap, wepampupelø kuik køn. Trektøwai, trupurap waminchipelø kilkamera piriship. Trenchip køptø, kan urkanisasiun ushameran purømisrtrapik nepua marik køn. Tru urkanisasiunwan nepua ashchai marikpe murtelø kuikkutri, aship pøntrapeløpa tap kømøteelø puraampik køn. Kanmaywane keerik yau kekuchip, chincha øyeek marøp pasraikwan wamintøsrkøpelø kuik køn.

Katøkanpurappe, treelø latawai iløyu tap kømui ashipik kuikkutri ik urkanisasiunesmerasrø kementik køn, Amistía Internacional, Greenpeace yu, nai tøkakuiløtrawa newan truyu purukuik køn. Katøkanpurappe, purømisrøpik kuik køn waachameraimpurø.

Treek marintøkucha, yu Pirau tap kømøteelan pekmay køntrai, tamaramkaik kui cuenta penik køn, kakentø ik urkanisasiunesmera møilantø tamarik kuinkucha møilane tamartrap kaimaik kuik køn inchen kanmaywane tamartrap isup kømnetø søl kømøtikpe mas nemisrik køn. Yu Pirau kaik nemisrøp pasramne treekwane muken ashmup lataik inchen. Nape chikucha martrap kaimaik køn.

Chiken martrap kaimaikkutri Tiuswainuk, nui Wamyupa isup mentik køn. Metrap Jeupawaiwan waminchipeløpa Biblian kusreik køpik køn. Nøm nan tammayelø kuinkucha tru urassrømpe nai øsik unikwan yunømartrappe pasrømuik køn. Pero møimpe sí, treek kømuik køn.

Treekkutri, nai Biblian lawa, lep mentøpen, isuintik wamøntrai purukuik køn. Yam textosmeran leik køn Bibliayu ushameran tap srua kømikwaimpurap. Por ejemplo, Proverbios 12:10 ma trenchipik køn: “Sølwan marøpikpe ushameran tap srua køpik køn” cha. Incha yu Pirau trømpøik purep pasraikpe Tiuswainukkutri atrumíik kui wetøasik køn. Latrø nu misakmera Jeupawan møra marøp kømuikkutri, mas isuintelø amønamik puipasan. Jeupa namun latrø untakik, latrø tammay munirapik kui nepua ashen latrø tap mørøraik køn (Salmo 103:8-14).

Tru urassrø, ¿Qué enseña realmente la Biblia? pørin kilkayu kan cupón wetøtraik køn. Tru cupónwan chap netsøkana, correoyu ørik køn incha yana kømuatø, Jeupawaiwan waminchipeløpe Bibliayukutri nepua asamikwan purukutrumøn cha eshkapen, nape øntøwai taik køn. Trektøwai, nømui tuluntsunik yausrømay pølpasra ip mentøpenkucha. Tsøntatø tsøntatø Jeupa kusrenaniløpe mantrau puik køn.

Biblia purukuiktrawa nai øsik uninuk kaløteelan yunømarik køn. Køntsø mutsamikwan, kørapik mutsamikwan elatsik køn. Trukutri nai asr tamisrøp, nai wamintiku tamisrøp, trektøwai metrap pera pøntrapelan mas køripala aship mentik køn (Romanos 13:1). Trømpøikwan marmøntrap nai isuikwan yunømarik køn.

Urkanisasiunesmeran, ushameran, misakmeran, purømisrøpelainukkutri mentamisramik trupe sí mur kuik køn. Tru urastøpe, mentamisrmuppe lliwan kekuchip pasrap lataik kenamarmøntrap, inchentø wetøpenik køn Tius Nø Aship Karup Waiktøwai misakmeran purukuntrapik kui. Trukutrimpunøpe, mur isua pasramisrik køn nai øsik unikwan Jeupawaiwan kusrenantrap katøkanelan (Mateo 6:33).

Trømpøik purep pasraikwan tamartrap isup urassrø, nain kapyupe pa søtømera lataitø ashipik kuik køn, tapeløpa kailøpatø lataikke, chu urastøkucha kailan søtøpasrøpik kuik køn. Møimpe Biblian nepua asinkutrimpe misakmeran tsalø ashmøntrap purukutan, mayelan untaktøka ashchap inchipik kur (Mateo 5:44). Misakmeran untak kenamarøpik kur Tiuswai wamwan kusrenanøp yainuk. Pishintø warøntrai, kasraktø warøntrai, tapikwantø munirantrai, øyeek kusrenanilø nømun purukuik ashippe nane latrø tap køpik køn.

Chikøpen trupa isuptøka pasraikwan Jeupawai taskutø pasrikkutrimpe chi isumø unamik purukutan. Tør nepua asha pasrar namui Ellmarøpik misakmeran ushameranpa trømpøik marmøntrai inchap kui, trektøwai namui Pirøwan mintiship pasrmøntrai inchap kui. Yanayutø Tius Nø Aship Karup Waikpe møkelø mintisaikwan tamartrun (Isaías 11:1-9). Latrø kasrak uñar ciertonikwan nepua kusreikpe, katøkanelan nepua ashchai purukuikpe. Treekkutri yantø Pirøwan tamartrappe yantø isumur.