República Democrática Alemana (RDA) køp urassrik kur, Sajoniasrø kal-lawai kur. Nai yaweløpe latrø tammayelø køp, nai møskalø nan tap uñchai tap wammera ketøpelø kuik køn. Tru urassrømpe comunistasmera kuikkutri Sajoniasreelø møiløpe Tiuswainuk køremelø kuik køn. Nakucha treek kuik køn. Unøkutri 18 nemisramnekatikpe ateísmo, comunismoyu kørepik kuik køn.

Inchentø, ¿comunismoyu chincha kørepik kuik kø? Kakentø mayelan lata ashchai isupik kuikkutri. Katøkanpurappe, nape isuppe puarmeran, waachameranpa lata ashchaimpe, anwane mayelø misra pirisamtik kui ashipik kuik køn. Inchawai kan urkanisasiun comunista matsørelø aship pøntraiku purukuntrap kementik køn. Catorcetik køpen kilka reciclap yana marøp atrikkutri, Aue srø aship karup putrapeløpe na treek marøp pasraikkutri, unkua chintrap kan keta tranik køn. Matsinøtik kuinkucha políticosmera latrø asilan, nai kaptrawa nepua asik køn. Tap marøp pasraitamap isuik køn, chikøpen tapelø utøntrurmapke.

Inchentø nai øsik uninukpe pekmaytø puik køn. 1989srø muro de Berlínwan petitsik køn. Bloque comunista de Europa del Estekucha patsik køn. Nøm søl kømøteelø marilan cuenta peñippe nape latrø tap kømui køtrømisrik køn. Por ejemplo, comunistasmerai katø pøntrømelane tsalø kui ashipelø kuik køn. “Mayelan lata ashipelø ker” chipentø, trupe, ¿ka isa wamintik kø chinta? Nape treek paya mørik køn. ¿Chincha øyeek marøp kuikwan? Inchakutri tap kømui uñipik kuik køn.

Yantø treelan marmø pek marøp kepiaik køn. Chikøpen pisamiku, músican kustap lataik inchen. Kan kusrenanik yau músican mas kusrentrap kepiaik køn. Treelan newan maramik nai isuik kuik køn. Nai møskalø tap kusrenanilan nøørø mara, nan chull isuilantø marøp kepiaik køn. Mu ishumpurmerapa køpenpa kepik mentik køn. Chi marintøkucha chi isumø wamikwan purukumuik køn, hasta nai pisimerayuken trupa isuik unikwan kenamarik køn. Treekkutri paya mørik køn: “Trupe ¿wentøsrøwaimpe maik køntrera?” cha, “¿Chincha øsik tsupra?” cha.

Maik løtapik kuikwan wetøpuppe nape køremkaik kui asik køn. Kan pieje kusrek yau lincha putrapelø wentøsrøwaimpurø waminchip køpen, manchitashchap pulu puik køn. Tru søtøyupe, Mandy * kan Jeupawaiwan waminchipik wawa, kan tap wam ketik køn. Nan trentaik køn: “Andreas, wentøsrøwaimpurap ñui øsik unikwaimpurø paya mørilan wetøtrantrappe Bibliayu wetøtrantrun” cha.

Nai paya mørilan Bibliayu wetøtrantraitamappe køremuinkucha, Mandy, Daniel kapítulo 2wan kenamaren køremkaik kuik køn tru metrapsrønkutri møyasrønkatik potencias mundialeswaimpurø eshkapikwan kenamaren. Mandy wentøsrø chi puraintrapikwan Bibliayukutri mas kenamarik køn. Møimpe sí nai paya mørilan wetøtraik mørik køn. Pero, “¿Bibliayukutri chap eshkailan mu pørik kui? ¿metrapsrønkutri katøkucha puraimuatø eshkapikpe treekpe mu kui? Trupe, treek køpene ¿kan Tius existipik kø chinta?” cha paya mørik køn.

Trukutri Mandype, kan kasheraikwan Horst Angelikanpa, na ashchai pera atrik køn, nømpe Jeupawaiwan waminchipelø kuik køn. Nøm Biblian tap nepua ashchai purukupen, wetøasik køn Jeupawaiwan waminchipeløtøtre Tiuswai munchin wamap, kusrenanøpelø kui (Salmo 83:18; Mateo 6:9). Jeupa mayelan tap Pirøchiku warøntrai isupik kuikwan kusreik køn. Salmo 37:9 trenchipik køppe: “Jeupawainuktø munirap pøntrapelane Pirøwan ketik utøntrap køncha”. Treekwan lewape latrø tap kui mørik køn kakentø kan yaskap kuri pasraik lataik køn, møitøkucha Jeupawan møra marøpeløpe tap Pirøchiku waramik kepamtrap kui.

Nai øsik uninuk Jeupawan møra maramik murik kuik køn. Músico wa, pisilaimpurø nøtrø marik kua, natø tapik kurmap isupik kuikkutri køtrømay køntrap kusrem puik køn. Trømpøik marilan lelatchap fácil kømuik køn. Inchentø nane latrø tap køtan nuyelan martrap trantrapelan, Jeupa trutriku tammaytø munirapik kuikwan ashen.

Unøkutri 18 nemisramnekatikpe ateísmo, comunismoyu kørepik kuik køn. Pero trukutrimpunø Biblian kusrep menta nai øsik unikwan yunømartrai purukuik køn. Trutø kømø, wentøsrø chi puraintrapiku mentra isumøntrai purukuik køn. 1993srø piu umpu ulsraik køn incha 2000srø Tabithapa kasharaik køn, Tiuswai wamwan latrø kasrak waminchip uñipikpa. Møimpe pailø misra namui utøchikpape Tiuswaimpurap katøkanelan mas kusrenanøp amøñipelø ker. Misakmerape møiløpe metrap na latawai ateísmo, comunismoyu kørepelø køn, treekkutri misakmeran Jeupawan nepua ashchai purukuikpe latrø tap køtan.

Jeupawaiwan waminchipeløpa Biblian kusrep mentøpen, nai møskalø tap kømui asinkucha yanayupe nan tap uñchai purukuik asik køn. Kasrak war kakentø nai møskaløkucha Biblian kusrep pølpasren incha tuluntsunik yamay amtrup køpen.

Tabithapa latrø kasrak warapelø ker kakentø kasherawarmerai tap wammera Biblia ketikwan møra marøpelø kuikkutri. Por ejemplo, itølulmumikwaimpurø møra marikpe tap waramik latrø nu purukupik køn (Hebreos 13:4).

Wentøsrø chi puraintrapiku, nai øsik uninuk, yantø mentra isumik kur. Møimpe Pirø mupa kuimpurap Jeupawaiwan waminchipeløpa pasraikpe latrø kasrak køtan kakentø kanpalatø pishintø tap warapelø ker, yupe mutøkucha latailø ker. Metrapsrønkutri kan øyeeku pasrøntrap isupik kuik køn.