¿Tap inchipelø køntrai Bibliape namun purukuntrauta?
“Katøkanelan tap inchipelø køpene pishintø waramik purukuntrun” (Declaración de Principios sobre la Tolerancia de la Unesco, 1995).
Tap inchipelø kømuikpe mayelan kørikpala ashmø, tsalø ashipik kømik marøpik køn. Chu urastøkucha tsalø aship namik kui mørørankarupik køn.
Yam misakmera tap inchipik kømikwaimpurap pekmaytø isupelø køn. Møiløpe øyamay isupelø køn, kalø marinkucha kape tru søl marinkucha tru tap inchipik kømik taikpe treekwan tap kui asamik køncha. Inchentø, møiløpe Biblia maik kusrenanikwan isupelø køn: yu Pirau misakmera chi marilan kørikpala ashipik køn nø treek martrap isumíik kuinkucha.
¿Møya Biblia purukuntrauta tap inchipelø kømik?
Bibliape tap inchipik kømikwaimpurap waminchipik køn
Bibliape tap inchipelø køntrai øyeekwan nepua martrai purukupik køn. Bibliape trenchipik køn: “Ñimbe truba tab inchibelø kuigwane mayeelø nebua asig kønrrai inday” (Filipenses 4:5). Øyamay køntrai purukupik køn tammay kømik, kørikpala ashipelø kømik, sølwan martrap isupelø kømik kanelaimpurap. Inchakutri, Biblia maik taikwan møra marøpeløpe kanelan nøm maik isuikwan martrai karumelø køn.
Bibliape tørtø kusrenanøpik køn, Tiuspe yu Pirau misakmeran chinetø martrai karua pønsraikwan. Truyu trenchipik køn: “Au møkpe, Tiuspe ñun tapik kuikwan eshkaik køn” (Miqueas 6:8). Tiuspe Bibliayukutri eshkapik køn kasraktø warøntrap chi maramikwan (Isaías 48:17, 18).
Katøkanpurappe, Tiuspe namune tranmuik køn katøkanelaimpurap nam isua martraimpe. Bibliape trenchipik køn: “Tius nøtø køn tru maig maramigwan martrai pøriilan tranøb, katø nøtøwei maig maramigwan sølgandø asha marøb inchibiibe […]. ¿Ñibe chigugu, katøganun ‘øyeeg søl marmíig køn’ chib marøb pasrønrrappe?” (Santiago 4:12). Tiuspe namun kan kan nam chi maramikwan isua martrai tranik køn, inchentø nam isuikwan maren kalø pupen, tap pupen lata namuin pala køntrun (Deuteronomio 30:19).
Bibliape kørikpala pasramikwaimpurap waminchun
“Mundøgucha maig købash [inchimøtø], tab […] intay” (1 Pedro 2:17). Biblia maik taikwan møra marøpeløpe maya misakmeran kørikpala ashipelø køn, nøm maik warapelø o maik isupelø kuinkucha (Lucas 6:31). Inchentø, nøm chinetø yam kørewa marilan trupurappe nømpe marmelø ker. Inchakutri, nøm chikøpenyu kalø marene trupurap waminchap ashmøwai kape purukumøwai inchipelø køn. Inchentø, Jesús maik kenamarikwan kenamarøpelø køn kørikpala aship.
Kan piejima, Jesúsma kan ishukwan nepua asik køn, tru nø køreikwan køremíik kui. Incha, nui linchaikpa tsuikpe nui kek kømui. Jesúspe treek waraikwan tap ashmuintøkucha. Ik ishukwan kørikpala wamintik køn (Juan 4:9, 17-24).
Inchawai, Jesús latawai Cristoi wentautø ampupeløpe nøm køreilan kanelan waminchippe, “nømune maig købash inchimøtø,” tammay waminchipelø køn (1 Pedro 3:15). Inchakutri, Biblia øyamay martrai karupik køn, Cristoi wentautø pøntrapelan ke nøm maik køreikwan treekwan martrai inchimøtø; “kakentø Señorweiwan marøb megabiibe kwayam laptiik kømøtø, masken mayeelan latrø tap inchipik køn”, pekmay isupelø kuinkucha (2 Timoteo 2:24).
Bibliape tsalø asikwaimpurap waminchipik køn
Bibliape trenchipik køn: “Ñimbe maya misaameraba ambugurri igurri lata tab kømigwan” lamik køn cha (Hebreos 12:14). Kan misak pishintø tsuntrap isupikpe tsalø asamikwan tap kui ashmíik køn. Inchakutri, mur trantrapik køn katøkan misakmerapa pishintø tsuntrap nø køreilan itøpunømøtø (Mateo 5:9). Treekkutri, Cristoi wentautø pøntrapelan Bibliape purukupik køn nømun tsalø ashipelanken untaramik køn cha. Tru nømun tap kømøtik inchenken (Mateo 5:44).
Bibliape tørtø trenchipik køn Proverbios 6:16-19yu Tiuspe “tsalø aship”, tap kømui ashipik køn cha tap kømøtelø, pusrkuantraptelø maren kanelan. Inchentø, Bibliape Tius tsalø asilan chippe ikpurap waminchap trentan tru Tiuspe køsik køncha: tapik kømíik marilan. Inchentø Bibliape trenchipik køn, nøm kalø marilan isua møra nun møra martrap inchene Tiuspe ulø paymø pesannapik køn cha (Isaías 55:7).
Bibliayukutri wamintilø tapik inchipik kømikwaimpurappa kørikpala pøntramikwaimpurappa
Tito 3:2: “Maig købash inchimø, mu misaamerandøgucha tabig marøbelø kønrraimba” chipik køn.
Kan misak tap inchipikpe tsøntatø munirapik køn kanelø pekmay isua wamintinkucha. Truyu kørikpala pasraikwan kenamarøpik.
Mateo 7:12: “Ñimma katøganelø ñimuyasig tabig [maramikwan] palai inchibeløbe, ñimgucha katøganelan treetøwei maray”.
Møikwantøkucha nam maik isuikwan maik mørørai pøntrøpen kuenta tøkakøntrai isupelø ker. Ikpurap Jesús kusrenanikwan mas tørtø nepua ashchappe, pørikwan ash: “¿Qué es la regla de oro?”.
Josué 24:15: “Møikwan møra martrap kuikwan isuy”.
Pishintø pøntrøntrap isua marøpelø ker, kanelø nøm maik isuikwan marinkucha.
Hechos 10:34: “Tiusbe møilane ørømara katøganelandø tab inchimøtø lata isubig [køn]”.
Tiuspe møik culturasmerankucha nøørømarmíik køn. Møk kuinkucha, ishuk kuinkucha, chukutri atruaik kuinkucha, yalik kui lata pulik kui lata o kape metrapsrø nøm øsik amønaiku chikøpen marilø kuinkucha. Tius maik køpen treek køntrap isupeløpe yu Pirau mayelan kørikpala ashipelø køn.
Habacuc 1:12, 13: “[Tiuspe] kalø marilan tap kui ashchap kaimapik køn”.
Tiuspe tap inchipik kuinkucha kutikepape tap ashmíik køn. Manasrønkatik kaløwan marøp køntraimpe tap ashatø wamøntrun. Ikpurap mas nepua ashchappe, ik videun asay “¿Tius chinchatre namun kiship waramik pupasa?”
Romanos 12:19: “Kaig marimburø ñimashib treetøwei pagaranrrab inchimøtø, Tiuswei namig købigwan nømuim pala arrubasay. Kaguende Tiuswei wamyube øyeeg chibig pørig pasran: ‘Kaig marimburø pagaramibe nain køn cha. [Trupurappe] na asha maramig køn,’ cha [Jeupa] trendan”. a
Jeupape tru namun kaik marimpurø namaship pakaramikpe utø tranmuik køn. Nøpe mantø maramikwan tamaraken wan. Mas nepua ashchappe, ik pørikwan ash: “¿Alguna vez se hará justicia en el mundo?”.
a Jeupape Tiuswai munchi køn cha (Salmo 83:18). Ik pørikwan ash: “¿Jeupa mu kø?”.
Trektøwai ash
NAMUIWAN
Ñun yaukatik ashchap puntraimpe eshkau
Bibliaimpurap kan paíkwan nepua kusreu, kape Jeupawaiwan waminchipelaimpurap mas nepua kusreu.
