¿Bibliape manchipik kø Pirø ørøpa pi kølap atrupikwaimpurap?
Mayeløpa øsik amønamik chish pi palai pøntrer. Inchentø ONU yu secretario general António Guterres trentaik køn: “Latrø nu misak piwan tøkakøntrap kaima køn. Inchawai pi kølap atrup pasraikkutri murik puntrap køncha”. Pirø mupa kuimpurap latrø nu misakmera, pi tøkakøntrap latrø mur kui pøntrapelø køn.
Strdel/AFP via Getty Images
¿Manakøpen mayeløpa pi tøkakømtik køntrauta? ¿Kape chu urastøkucha misakmerape piwan palain køntrauta? ¿Bibliape manchipik kø?
Piwaimpurap Bibliape chi tap wammera eshkapik kø
Wentøsrø pi kølapikwan patsøkøntrap kui eshkan. Incha latrø chish pi uñcha køntrun cha.
“Pøs mu misak waraimøsrømpe pimera latrø tapchik tøkaik misrtrun. Pøsr patikkutri pirø pur misrinukpe pimalmerayu tusr kal-lantrun, pirømera pi chikaanukpe latrø chish pimera kal-lantrun” (Isaías 35:6, 7).
¿Bibliayu ik martrap misrikwan chincha kørentrap? Pirøwan mantø mara pasrik kuikwan Biblia chi kenamarøpik kuikwan ashkun.
Pirøpurap ciclo del aguaimpurap Bibliape chi eshkapik kø
“Tius [...] Pirøwan [mara pasrøppe] manakatikwai mara pasrik køn, kaakatø kømø, misakmera truyu warøntrai” (Isaías 45:18).
Tius Pirøwan marøppe chitøkucha øsik køntrai marikkutri manaken patsøntrapkeik, Pirøtøwai latrø chish pi kal-lantrai marik køn.
“Nø piwan palapunø nepinkarup; yu Pirau sre pupen katøle nakish misra katø kutrøn karupik køn; tru wañimpe piwan lelachipik køn misakwaim pala” (Job 36:27, 28).
Trenchippe, ik versículosmera kenamaran, tru piwan marøppe chish køntrai mana patsøntrapkeik marik kui. Latrø mur pøsr pachen, nøtrø pimerape nakish misra kutrøpen, katø sre misra køtraatrupik køn, øyamay misakmerayasik ushamerayasik pi palømøntrai (Eclesiastés 1:7; Amós 5:8).
“Ñim sre palain køpen puntrai maramøntrun, inchen Pirøpe latrø nøtrø mamik tøkakøntrun, trektøwai tusrmera mamikmera nitrun” (Levítico 26:4).
Metrapsrø Tiuspe israelitasmeran martrap misrik køn, tru latrø nu mamikmera tulishintrun cha, pimera palømø tøkakuikkutri. Tiuspe nepua ashipik køn, mamikmera tulisamikpe chu uras sre puntrap kuikwan asamik kui.
Metrap Israelsrø Tius øyeek marikpe, wentøsrø Pirø mupa kuimpurap trektøwai martrun (Isaías 30:23). Yu Pirau trurø pi kaakøp atrun, trektøwai sre pumø pasran. ¿Pi kaakøp atrikkutri mantø tamartrap kuikwan Bibliape chitø eshkapik kø?
Pi kølap atrupikwan mantø tamartrera
Bibliape eshkan, Tius Nø Aship Karup Waikpe pi uñcha tøkakøntrai martrap kui, trektøwai Pirøwan tamartrap kui (Mateo 6:9, 10). Tius Nø Aship Karup Waikpe Pirø mupa kuimpurap nø aship karup pasrøntrun (Daniel 2:44; Apocalipsis 11:15). Yu Pirau aship karupelø manaken marmuikwan, Tius Nø Aship Karup Waikpe Pirøwan tamartrun, pi uñcha tøkakøntrai.
Chi purep pasraik: Mur pøsr patikkutri latrø mur sre puikkutri, ciclo del aguan mintisan treekkutri pirø latrø pur misran, kape latrø mur sre puikkutri latrø nøtrø pimera nuraikkutri, pi pula chiwankøpen mintishipik køn.
Mantø tamarik køntrapik: Tius Nø Aship Karup Waikpe pøsr patikwan, sre pupikwan, tap tamartrun namui Pirau chi køpikwan tap puntrai. “‘Nabe chiwangurrimbunø srøitø maramønrrun’ cha” (Apocalipsis 21:5, Tius Namun Waminchip, Wycliffe Inc.). Pirømera latrø pur pøntrapyu pi kal-laikkutri chitøkucha øsik køntrai martrun (Isaías 41:17-20). Jesús wentøsrø nø aship karup wawa, Pirøwan, mur isik ichipikwan, pøsrwan, piwan tap pøntrøntrai tamartrun.
Jesús yu Pirau uña, pi welarmeran latøkuship atrupikwan kønømøntrai wasrønchik marik køn. Ikpe kenamarik køn tru Tius marampurap marikwan tranik kui (Marcos 4:39, 41). Jesús yu Pirau nø aship karup pasramisren, Pirøtøwai trømpøik mintishipelan patsøkøntrun, misakmerape pishintø chi isumø latrø tap warøntrun.
Chi purep pasraik: Misakmera chiken isumeløpa, empresasmera an tulishintraptø isupeløpa, pi luløpelan, lagunasmeran, pi tulisailan chillikinchipelø køn.
Mantø tamarik køntrapik: Tiuspe Pirøwanpa, pimerampa chish martrun. Pirøwan latrø tapchik køntrai martrun. Biblia trenchipik køn: ”Misak mu waraimøsrø pirømera latrø pur kuikpe latrø kasrak kui mørtrun, inchen misak mu waraimøsrø pirømerape azafrán latawai umera tøkaik misrtun” (Isaías 35:1).
¿Pirøwan mintishipelanpa misakmeran latrø isuin putrøntrai marøpelanpa chi puraintrera? Tru “pirøwan mindishib” pinishipelan pinisailø køntrun (Apocalipsis 11:18; Proverbios 2:21, 22).
Chi purep pasraik: Piwan tap katøramuikkutri latrø nu mermap atrun, kakentø Pirøtøwai chish pi tøkakømik utø palaikkutri.
Mantø tamarik køntrapik: Tius Nø Aship Karup Waikpe, yu Pirau nø “maig maramdiig køben” treek martrun, misakmera martrap kaimaikwan (Mateo 6:9, 10). Tius Nø Aship Karup Waikpe maya misakmeran latrø nuikwan kusrenantrun. Isaías 11:9 a trenchipik køn: “Pirø mupa kuimpurap Jeupawaimpurap misakmerape latrø nu nepua ashipelø køntrun”. Jeupawaimpurap nepua asiktøka, nunpa, nø mara pønsrailanpa, untaktøka kuikkutri Pirøwan latrø chish kantø tøkakøntrun.
Tius Nø Aship Karup Waikwaimpurap mas nepua ashchappe, pørikwan ash “¿Tius Nø Aship Karup Waikpe chi martrera?”.
Bibliayu Isaías kapítulo 35n ash, yu lewape ñitøwai kuenta peñchun, Pirøpe mantø tapchik katøle tamarik køntrap kuikwan.
Tius Pirøwaimpurap misakmeraimpurap chi martrap kuikwan nepua ashchappe, videuwan ash, “¿Tiuspe Pirøwan chincha mara pasrik kø?”.
a Tiuswai munchipe Jeupa køn (Salmos 83:18). Pørinuk ash “¿Jeupa mu kø?”.
Trektøwai ash
ENSEÑANZAS IMPORTANTES DE LA BIBLIA
¿Tius Nø Aship Karup Waikpe chi kø?
Jesús yu Pirau uña, Tius Nø Aship Karup Waimpurap mas waminchip kusrenanik køn. Metrapsrønkutri, Cristoi wentautø ampupeløpe Tius Nø Aship Karup Waik yu Pirau trektøwai martrap amø cha miapelø køn.
NAMUIWAN
Ñun yaukatik ashchap puntraimpe eshkau
Bibliaimpurap kan paíkwan nepua kusreu, kape Jeupawaiwan waminchipelaimpurap mas nepua kusreu.
