¿Parø attrapikwaimpurap Bibliape manchipik kø?
“Parøpe kaantrun”. Pirø ørøpa aship karup putrapelø ikwan tamartrap intan. a Maya misakmeran mamik tøkakøntrai trantrap intan, ¿pero cierton nepua martrauta? ¿Trupurap Biblia manchipik kø?
Bibliape parø attrapikwaimpurap chap eshkaik køn
Bibliape trenchipik køn namui kualømmerayu parø attrun cha, srape kualømmerayu tainuk (2 Timoteo 3:1). Trømpøik parø atrupikpe Tiuswainukkutri atrumøn inchentø Tius eshkaik køn chi puraintrapikwan (Santiago 1:13). Ashkun Biblia chi taikwan ikpurap.
Pirø mupa kuimpurap chukøpentø parø attrun (Mateo 24:7). Bibliape tru uretø parø attrap køn taik køn. Treekkutri Pirø mupa kuimpurap mamik mayan kuikwan ashipelø trupurap trenchipelø køn: “Tap mamikwan mamik parøwan patsøkøntrap inchipeløpe wentømayken ampan”. b Pirø mupa kuimpurap latrø yam misakmera mamik newan tøkakøntrap kaiman treekkutri latrø yamelø kuapkøn.
“Inchen na ashene, kan yalø kaulli pasraptinchibig køn. Inchen truyu itøgwana wabiibe tasigube palansa sruaig købig køn” (Apocalipsis 6:5). Bibiayu yalø kaulli pala wapikpe tru srape kualøm parø attrapikwan kemesra wamintik køn. c Trunun tasku palansa srua kuikpe mamikwan unaasamik køn, ik yalik kaulli chap punap yainkatikpe mamikmerape latrø nuway misrtrun incha mamikmeran tap asha esekantrai eshkapik køn (Apocalipsis 6:6). Ikpe tør kenamaran møya parø atrupikwan tru misakmera penantrap incha tap mamik wetøtrantrap kaiman kuikkutri.
¿Tius chi martrera parø atrupikwan patsøkøntrap?
Nøtrø kusrepeløpe trenchipelø køn yu Pirø ørøpa mamik misrøpikpe mayelø asin nepuntrapik køn cha. Trupe, ¿chintimpatre parø atru? Inchen, ¿Bibliape manchipik kø parø atrupikwan Jeupa d mantø patsøkøntrap kuikwan?
Chi purep pasraik: Yu Pirau aship karup pøntrapeløpe parø atrupikwan lata, anwan lata, mayelø lata tøkakøntrai treek martrap kaima køn.
Mantø tamarik køntrapik: Yu Pirau aship karup putrapelø sølkantelø kømelan katøkan tap aship karupik sølkantikpa yunømartrap køn Tius Nø Aship Karup Waikpa (Daniel 2:44; Mateo 6:10). Møin kualøm, waacha misakmerape mamikwan nepua penantrap kaima køn inchentø Tius Nø Aship Karup Waikpape si treek kømøntrun. Biblia trenchipik køn Tius Nø Aship Karup Wainuk aship karup wantrapik Jesucristoimpurap: “Nøpe waachameran purukutra cha miapelan purukuntrun kakentø […] yu Pirau latrø nøtrø yellmera tøkakøntrun, tunpalawankucha latrø nøtrø ellmarilø tøkakøntrun” (Salmo 72:12, 16).
Chi purep pasraik: Misakmera ampukutri ikutri kuayailøpe trømpøik mintiship, an lamikwan mas murik køntrai marøp incha mamik penamikwan mas nuway maran.
Mantø tamarik køntrapik: “Pirø mupa kuimpurap kuayailan [Jeupa] patsøkøntrap marøpik køn. Arcon lanchip lanzan pitis marøpik køn, tsurelai amønaik karrumerankucha patsøkøpik køn” (Salmo 46:9). Tiuspe kuayailan patsøkøp kuayantrap isupelankucha patsøkøp inchun, treek chap pinøpene mamik lamik treek mur kømøntrun, treek chap pinøpene si mamik lamik mur kømøntrun. Bibliayu treek martrap køtrømisran: “Tru sølkantø marøpeløpe usrøtrap lataik inchun incha yantø pishintø waramtik køntrun”. (Salmo 72:7).
Chi purep pasraik: Mentra warap incha mentra treek pupikpe mamik kuailan piniship incha ushamerakucha kuetchip intan.
Mantø tamarik køntrapik: Tiuspe mentra warapikwan mentra treek pupikwan incha chi nø mintishipikwan tamartrun tap ellmaramik køntrai asik. Bibliape trenchipik køn: “[Jeupa] mørik isik ichipikwan maryu pi welarmeran kønapikwankucha wasrønchik køtrømisrtrai marøpik køn. Mur pasrik pirø køsraksrø pimera kal-lantrun pur pirømerayupe pi kal-lantrun parø puraampup warapelan truyu tap warøntrai martrun, Pirøwan ellwap uvas ellmartrun ka uñchatø tulisamik køn”. (Salmo 107:29, 35-37).
Chi purep pasraik: Misakmera latrø parelø nilapkøn ampupelø mamik tapik køpikwan yanøp kape mamik tru tranamikwan tranmøwai inchipelø køn.
Mantø tamarik køntrapik: Tius Nø Aship Karup Waikpe kaik misakmera nilelan patsøkøntrun (Salmo 37:10, 11; Isaías 61:8). Bibliayu taimpala Jeupape søl køntrai marøpik køn tan incha parø puraampup warapelan mamik tranøp inchip (Salmo 146:7).
Chi purep pasraik: Pilamørik kan nu papalø mamikmera minchipik køn tap asha katøramuikkutri.
Mantø tamarik køntrapik: Tius Nø Aship Karup Wainukpe mamikwane tap katørawa tap pirisaik køntrun. Jesús yu Pirau uñip urasma mamikwan latrø asha katøraik køn. Kaakøp unchintrai kømø. Kan piejema tru Jeupa marampurap marik traniktrawa 5000katik misakmeran mamik srøtrik køn. Inchen yanayupe ”nui kusrenanøb pera uniilan trenchibig køn: —Pitis unchibelane pirau ka petig warømønrrai, pitiswane tulisay— cha” (Juan 6:5-13).
Tru Tius Nø Aship Karup Waik yu Pirau parø atrupikwan patsøkøpene Pirø ørøpa mayelø mamik latrø tapik unchatø tøkakøntrun (Isaías 25:6). Tius Nø Aship Karup Waik mana øyeekwan martrap kuikwan nepua ashchappe ik pørikwan leu: ¿Yu Pirau Tius Nø Aship Karup Waik mana pølpasrtrera?
a La Agenda 2030 para el Desarrollo Sostenible, adoptada por todos los Estados Miembros de las Naciones Unidas en 2015wai.
b Wammørøsraik Organización de las Naciones Unidas para la Agricultura y la Alimentación, el Fondo Internacional de Desarrollo Agrícola, el Fondo de las Naciones Unidas para la Infancia, el Programa Mundial de Alimentos de las Naciones Unidas y la Organización Mundial de la Salud.
c Apocalipsisyu pipkatø kaulli pala itøwana amtrupelaimpurap mas nepua aschappe ik pørikwan leu: “¿Qué representan los jinetes del Apocalipsis?”
d Tiuswai munchipe Jeupa køn (Salmo 83:18). Ik pørikwan leu: “¿Jeupa mu kø?”
Trektøwai ash
ENSEÑANZAS IMPORTANTES DE LA BIBLIA
¿Tius Nø Aship Karup Waikpe chi kø?
Jesús yu Pirau uña, Tius Nø Aship Karup Waimpurap mas waminchip kusrenanik køn. Metrapsrønkutri, Cristoi wentautø ampupeløpe Tius Nø Aship Karup Waik yu Pirau trektøwai martrap amø cha miapelø køn.
