“Yamam me dene sɛba n wan pa’ale ne.” (Heb. 5:12) Makɛ bisɛ! Yehowa​—Pa’alekatɛ daana la n gani za’a la​—beem to mɛ ti to pa’alɛ nɛreba en yɛla! Tuunɛ n de ho pa’alɛ ho deodoma, tansugere bii na’am mɔɔlegɔ poan Yehowa​—yɛla la dela yɔ’ɔ kãtɛ paa. Ho wan eŋɛ la wani ta’an tum dɛ?

To wan nyɛ lebesego la gɔnseko ti tuntuna Paul yuun gulesɛ ta bo Timoti la: “Kaala Yenɛ gɔŋɔ la bɔ’ɔra nɛreba, kan’ana ba ge pa’ala ba.” Paul le yeti: “Ho han eta bala ho wan fan ho mɛŋa ge le fan sɛba n kelehe ho la bahɛ.” (1 Tim. 4:13, 16) Ho tari la vom yelesum ti la nara ti ho tɔɣɛ bo nɛreba. Bala, la yele pakɛ mɛ ti to tiregɛ nyɛta nɛŋa tɔlega to kaalegɔ la to pa’alegɔ poan. Ba maalɛ gɔnlɛmlɛm wa mɛ ti la soŋɛ hɔ ti ho ta’an eŋɛ bala. Geele yelese’a n boi gɔŋɔ wa poan bisɛ.

Yehowa n de “Pa’alekatɛ daana.” (Isa. 30:20 NW) La nɔɔ boi bini ti gɔnlɛmlɛm wa wan soŋɛ hɔ ti ho mina kaalegɔ la pa’alegɔ soŋa soŋa ge da tamɛ ti Yehowa n Sɔi yetɔɣum la ge me tara nɛreba la kena na. (Yon 6:44) Bala la, zusa en ti a bo ho zilam vo’osum la. Tara Naayinɛ Yetɔɣum la tuna tuuma saŋa woo. Basɛ ti nɛreba la puti’irɛ bɔna Yehowa poan ge daɣɛ homea. Tiregɛ la ho soŋɛ sɛba n keleseri ho la ti ba nɔŋɛ Naayinɛ ba suuren.

Ho nyɛ la yɔ’ɔ ti ho pa’alɛ nɛreba yelesonɛ paa ti ba dekɛ bo asaaleba. To tari sakerɛ ti ho san dekɛ homea delum “paŋsɛka te Na’ayenɛ bo ho la,” ho wan nyɛ nɛŋa tɔlega.​—1 Pet. 4:11.

Ya pa’alegɔ tadaandoma,

Yehowa Sɛɛradoma Tigere Zuo Bisegadoma