La dela ho eŋɛ ania ta’an tara zɔ. Hon kɔ’ɔn kpeŋera homea ti ho dɛna Naayinɛ zɔ la kan basɛ yoo. Yezu yun yele sɛba n sakɛ bo en la ti: “Yelemɛgɛrɛ la . . . wan fan’ ya bahɛ.” (Yon 8:32) La vɔɔrɛ dela bem?

Ho ta’an bɔna fai nananawa. Ho wan ta’an bɔna fai la pumpɔreŋɔ pa’alegɔ ti Sitaana tara yɛregɛra ze’a woo la. Ho wan nyaŋɛ le bɔna fai yese nɛreba tustusa n boe teŋgɔŋɔ wa zuo ge ka mina Yehowa la. (Arom 8:22) Hali Naayinɛ zɔdoma kanle zɔta “dabeem la ba han ki.”—Hebru 2:14, 15.

Ho ta’an bɔna fai Naayinɛ teŋpaalega la poan. Bisɛ la n de yele nyalema se’em ti ho beere bɔna fai! Zaberɛ, bã’ãsi, la be’em kan ta bɔna Paradiisi la poan. Nɔŋɔ la kom wan keŋɛ fɔw. Kuregerɛ la kum kanle bɔna. To wan bɔna fai ti dabeem, mɛlesegɔ, la ŋmɛlema tuuma kan bɔna. Baabule la poan Naayinɛ yeti: “Hom tɛɛn la ho nuo. Hon tegehɛ sɛla woo n bote sɛla.”—Yooma 145:16.

 Naayinɛ zɔdoma wan vɔna daarewoo. Daarewoo nyɔvɔrɛ dela tuulum bɔ’a ti Naayinɛ wan dekɛ bo sɛba n eere en ti ba nyɔɣɛ zɔtɔ la. (Arom 6:23) Yeen tɛ’ɛsɛ bisɛ vom n ka tare ba’asegɔ n wan ana se’em bo ho!

Ho wan nyɛ yɔ’ɔ tun sɛla woo ti ho bɔta. Daanse’ere ho wan bɔta ti ho kelesa yuuma n kɛ̃’ɛ̃ri suure. Ho wan bɔta ti ho zamesɛ bɔrenbɔresi ŋme’a bii ho dɛna kampinta. Ho me wan kelum bɔta ti ho zamesɛ baŋɛ dusi la tiisi yɛla. Daanse’ere ho wan bɔta ti ho ɛ baŋɛ tisi la nɛreba zo’e zo’e. Daarewoo nyɔvɔre to wan tara la wan basɛ ti to nyɛ yele ana za’a!

Ho wan nyɛ nɛŋa nyɔɣɛ zɔdoma zo’e zo’e. To wan vɔna daarewoo la wan basɛ ti to baŋɛ Naayinɛ zɔdoma zo’e zo’e. Ho wan ta baŋɛ ban nkuresi yelese’a poan ge nyɔɣɛ ba zɔtɔ. Ho wan nɔŋɛ ba ti ba mɛ nɔŋɛ ho. (1 Korint 13:8) Hon tare vom n ka tare ba’asegɔ la, wan bo ho sarɔɔ ti ho nyɔɣɛ zɔtɔ la nɛra woo! Sɛla n gane za’a dela, hon la Yehowa zɔtɔ nyɔka la kan tara ba’asegɔ. Kɔ’ɔn dɛna Naayinɛ zɔ daarewoo!