Sitaana la a kolkpabɛ’ɛsi la ka boti ho pu’usa Naayinɛ. Ba boti ba daregɛ nɛra woo putɛ’ɛrɛ yese Naayinɛ ze’a. Ba iti la wani? Sarɔɔ kuyima ti ba dɔla dela pumpɔreŋɔ pu’usegɔ. (2 Korint 11:13-15) Pumpɔreŋɔ pu’usegɔ dela pu’usegɔ woo n ka pa’alɛ yelemɛŋɛrɛ la n boe Baabule la poan. Pumpɔreŋɔ pu’usegɔ ane wuu gele n pɔ̃ɛ—ho san bisɛ en a ane wuu gele sonɛ ge a poan sa’am mɛ. De ta’an daam ho.

Yehowa, yelemɛŋɛrɛ Naayinɛ la, puurɛ kan malum pee la pumpɔreŋɔ pu’usegɔ. Yezu n yun bo teŋa wa zuo la, pu’usegɔ kuyima nɛreba n yun boti ba ku en. Ba yun tɛ’ɛse ti bamam pu’usegɔ la n de tontɔɔ sore. Ba yun yeti: “[Naayinɛ] meŋa n de tomam Sɔ.” Yezu yun sakɛ bala? Aayi! A yun yele ba yeti: “Ya sɔ dela Sagona la.” (Yon 8:41, 44) Zina beere wa, nɛreba zo’e zo’e tɛ’ɛse ti ba pu’usɛ la Naayinɛ ge ba tuɣum na’asa la Sitaana la a kolkpabɛ’ɛsi!—1 Korint 10:20.

 Maɣese wuu tia n ka ane soŋa n wɔne wɔla be’ero la, pumpɔreŋɔ pu’usegɔ me basɛ ti nɛreba tuna la tuunbe’ero. Teŋa wa zuo pirɛ mɛ la daaŋɔ, sɛla n sɔe la nɛreba tune la tuunbe’ero. To nyɛti yalumtuuma, zaberɛ, nayigum, mɛlesegɔ, nɛreba kua la pɔɣesi zɛa. Sɛba n tune tum ana wa tare ba pu’usegɔ mɛ ge ba pu’usegɔ la ka pa’alɛ ba ti ba tuna tuunsoma. Ba san ka dekɛ ba tuunbe’ero la basɛ ba kan ta’an dɛna Naayinɛ zɔdoma.—Matu 7:17, 18.

Pumpɔreŋɔ pu’usegɔ pa’alɛ nɛreba ti ba pu’usa bɔ’ɔra baɣa. Naayinɛ yeti to da pu’usa bii kaabera baɣa. Dena wa dela yelemɛnɛrɛ. Ho wan bɔta ti nɛra tɔɣera bɔ’ɔra ho foote ge daɣɛ homɛa? Nɛra eŋa wan ta’an dɛna ho zɔ? Aayi, a kan ta’an dɛna. Yehowa bɔti nɛreba tɔɣera bɔ’ɔra la eŋa, ge daɣɛ sɛla ti ba yaɣum bii foote n ka tare vom.—Yɛhega 20:4, 5.

Pumpɔreŋɔ pu’usegɔ pa’alɛ ti zaberɛ san ta isige to ta’an kuura taaba. Yezu yun yeti Naayinɛ zɔdoma nari ti ba nɔŋɛ taaba. Ti ka kuuri nɛresɛba ti to nɔŋɛ. (Yon 13:35) Hali la ka nari ti to ku sɛba n tune tuunbe’ero. Yezu dimadoma n yun nyɔkɛ en la, a yun ka basɛ ti a podɔleba la zabɛ faaɛ en.—Matu 26:51, 52.

Pumpɔreŋɔ pu’usegɔ pa’alɛ ti ba wan sa’am tuunbe’erodoma teŋmɔlga. Ge Baabule la pa’alɛ ti be’em yɔɔrɔ dela kum. (Arom 6:23) Yehowa dela nɔŋerɛ Naayinɛ. A wan sakɛ nyɔ nɛreba bugum? A kan sakɛ eŋɛ bala! Pu’usegɔ sɛko ti Yehowa bɔta la ma’a n wan ta bɔna Paradiisi teŋa la poan. (Liligere 15:4) Pu’usegɔ woo n doli Sitaana pumpɔreŋɔ sarɔɔ la kan ta bɔna.