Ho ta’an baŋɛ Yehowa doose la Baabule zamesɛgɔ poan. Deemin sa Naayinɛ yun loe la nɛreba ba sɛba ti ba gulesɛ a putɛ’ɛrɛ yela biŋɛ. Gulesegɔ ana wa n de Baabule la. Zina beere wa, ti kaalɛ la Baabule la zamesa baŋera Naayinɛ. Baabule la dela Naayinɛ gɔŋɔ sɛla n sɔi la a tare la Yehowa Yetɔɣum. Yehowa ka pareni dene zuo ti ta’an tara sakerɛ la Baabule la. “Na’ayenɛ n yele se’em la dagɛ ponpɔrɔŋɔ.” (Hebru 6:18) Naayinɛ Yetɔɣum la dela la yelemɛŋɛrɛ.—Yon 17:17.

Baabule la dela tuulum lɔkɔ ti Naayinɛ dekɛ bo to. A ane mɛ wuu sɔ n nɔŋɛ a kɔma ge gulesɛ gɔŋɔ bo ba. A tɔɣere pa’ala to la Naayinɛ n pu’ulum biŋɛ ti a tee teŋgɔŋɔ la ti ka dɛna teŋpaaliga—paradiisi. Baabule la tɔɣere pa’ala la sɛla ti Naayinɛ tabelɛ eŋɛ deemin sa, ita nananawa ge wan eŋɛ beere bo nɛresɛba n tare sakerɛ la. Kɔ le soŋera to ti to maala to yeledaaŋɔ ge nyɛta pupeelum.—2 Timoti 3:16, 17.

 Yehowa Sɛɛradoma dela Naayinɛ zɔdoma, ba wan soŋɛ ho ti ho bɔkɛ Baabule la n pa’ale se’em. Yeen yele ba ti ho boti ho zamesɛ la Baabule la. Ba kan to’e ligire ge zamese ho. (Matu 10:8) Ho ta’an le keŋɛ ba pu’usegɔ ze’a la ta kelese. Ba yi’ire pu’usegɔ ze’ese wa la Na’am Pu’usegɔ Deto. Ho san kena ba pu’usegɔ wa ho wan baŋɛ Naayinɛ yela zo’e zo’e kalam.

Ho ta’an zamesɛ baŋɛ Naayinɛ doose la lɔgɔse’a ti a naam. Makerɛ n wana, Baabule la yeti: “[Naayinɛ] naam la saazuo la teŋparɛ wa.” (Pin’ileŋɔ 1:1) Yehowa n yun naam “saazuo la” ti a naam yentule. Wana wa pa’alɛ ti Naayinɛ dela ane? La pa’alɛ ti Yehowa tare la paŋa n ka tare makerɛ. Eŋa ma’a n nyaŋɛ naam sɛla n tare paŋa wuu yentule la. La le pa’ala to ti Yehowa tare la yɛm. A dekɛ la yɛm naam yentule la, ti a bɔ’ɔra peelum la tuulega en ka tare ba’asegɔ.

Yehowa naaŋɔ lɔgɔrɔ la pa’alɛ ti a nɔŋɛ to mɛ. Tɛ’ɛsɛ bisɛ tiwɔla n boe tɔka tɔka teŋgɔŋɔ wa zuo se’em. Yehowa yun ta’an kɔ’ɔn naam ni tiwɔla ayina ma’a bo to—bii a puɣum kan naani. Ge Yehowa bo to la tiwɔla buri buri n ka tare makerɛ. Wana wa pa’alɛ ti Yehowa dela Naayinɛ mina n tare nɔŋerɛ, bɔ’ɔra yɛri yɛri ge tara putɛsonɛ la itisoŋɔ.—Yooma 104:24.