Nɛra san ki a ka vɔe. Kum ani wuu nɛra n gã gisa la. (Yon 11:11-14) Sɛba n ki la ka wune, ba ka nyɛti, ba kan nyaŋɛ tɔɣɛ bii tɛ’ɛsɛ sɛla. (Pa’ala 9:5, 10) Pumpɔreŋɔ pu’usegɔ pa’alɛ ti nɛra san ki, a ni keŋɛ la ki’inteŋa ta naa la a yaabedoma bɔna. Baabule la ka pa’alɛ bala.

Sɛba n ki la kan ta’an soŋɛ to, ba mi kan nyaŋɛ eŋɛ to sɛsɛla. Nɛreba tare putɛ’ɛrɛ ti kum san ku, la nari ti ba eŋɛ malema ge kaabɛ, la wan eŋɛ se’em ti sɛba n ki la puurɛ pee. Itikuna wa dela pumpɔreŋɔ n yese Sitaana ze’a na, la mɛ nyiire la Naayinɛ sunsɔa. Sɛba n ki ka mina sɛsɛla wa puurɛ kan ta’an pee. La ka nari ti to zɔta ki’indoma bii na’asa ba. La dela to na’asa Naayinɛ ma’a.—Matu 4:10.

Sɛba n ki la wan lebɛ nyɛ vom. Yehowa wan niɛ ba kum poan ti ba isige vɔna paradiisi teŋa wa zuo. Tɛm bumɔ nan ka paa. (Yon 5:28, 29; Tooma 24:15) Naayinɛ wan ta’an isige nɛresɛba n ki la wuu ho wan nyaŋɛ niɛ nɛra gɔɔm poan se’em la.—Mark 5:22, 23, 41, 42.

Sitaana, Kolkpabe’a la, parum ti nɛra san ki a sea ni kelum ɛɛra mɛ. Sitaana la a kolkpabɛ’ɛsi la pa’alɛ ti nɛra san ki a sea vɔe mɛ ge wan ta’an tare bã’ãsi la yeletooro wa’an to zuo na. Sitaana ta’an doose zaaseŋɔ poan pã’ãsɛ nɛreba. Yehowa kisi se’em woo n tɔɣeri la ki’indoma.—Tɛɛnhegɔ 18:10-12.