Yehowa kan basɛ ti nɛrebɛ’ɛsi saɣum Paradiisi teŋa la. A zɔdoma la ma’a n wa ta kɛ̃’ɛ̃ra bim. Beni n wan eŋɛ nɛrebɛ’ɛsi la? Ho san bɔta ti ho baŋɛ, kããlɛ yele se’erɛ n yun eŋɛ Noah saŋa la. Noah n yun boe se’em ma’a la ta pae zina wa dela yun tusa n tole. A yun dela nɛresoŋɔ ge ita ania tuna Yehowa putɛ’ɛrɛ n boti se’em. Nɛreba basɛba me yun tunɛ la be’em tuuma teŋgɔŋɔ wa zuo. Bala ti Yehowa yun yele Noah yeti, a wan dekɛ kokemɔ di nɛrebɛ’ɛsi la woo. A yun yele Noah ti a kpa daka deo ti eŋa la a yidoma da ki Kokemɔ la poan.—Pin’ileŋɔ 6:9-18.

Noah la a yidoma kpa daka deo. Noah yun tɔɣɛ kaɣɛ nɛreba la ti, Kokemɔ la yemɛ na ge ba ka kelese en. Ba yun kelum bɔna la ba be’em tuuma la poan. Noah n yun kpa daka deo la ba’asɛ la, eŋa la a yidoma la dusi kɛ̃ bim. Ti Yehowa basɛ sabeo kãte vuke, ti saa ni dabesa 40, daarewoo ka mam gɔ’ɔra. Ti ko’om uke pi teŋparɛ la za’a waabi.—Pin’ileŋɔ 7:7-12.

 Nɛrebɛ’ɛse la yun ki mɛ ge Noah la a yidoma yun nyɛ la faarɛ. Yehowa yun te’ele ba mɛ Kokemɔ la poan ti ba nyaa yese na bɔna ti putotuuma ka le bɔna. (Pin’ileŋɔ 7:22, 23) Baabule la yeti dabeserɛ kene na ti Yehowa wan saɣum sɛba n zaɣesɛ ti ba kan ita sɛla n ane soŋa la. Nɛresondoma la kan nyɛ sa’aŋɔ. Ba wan bɔna Paradiisi teŋgɔŋɔ la poan daarewoo.—2 Peter 2:5, 6, 9.

Zina beere wa nɛreba zo’e zo’e tune la be’em tuuma. Yele daaŋɔ n kɔ’ɔn bɔna teŋgɔŋɔ wa zuo. Yehowa tune a Sɛɛradoma la ti ba ka’ana nɛreba, ge ba zo’e zo’e ka boti ba kelesa Yehowa yetɔɣum la. Ba ka boti ba tee ba itigɔ la. Ba me ka boti ba kelese Naayinɛ nɔɔrɛ baŋɛ be’em la som. Ben n wan eŋɛ nɛrebana wa? Ba wan tee? Ba zo’e zo’e kan malum tee. Dabeserɛ kene na ti nɛrebɛ’ɛsi wan nyɛ sa’aŋɔ ge kanle bɔna yɛ’ɛsa.—Yooma 92:7.

Teŋgɔŋɔ la kan sa’am; la wan tee dɛna paradiisi. Sɛba n de Naayinɛ zɔdoma la n wan bɔna daarewoo Paradiisi teŋgɔŋɔ la poan.—Yooma 37:29.