Yelebeseto n tune teŋa wa zuo se’em la pa’alɛ ti Paradiisi pɔ̃rɛ mɛ. Baabule la yeti to wan nyɛ wungerɛ ge to Paradiisi nyaa wa’ana. To bo la saŋkaŋa poan wa! Baabule la tɔɣɛ pa’alɛ ti yele ana n wan ita:

Zabekãra. “Teŋa kayema wan ihege zabɛ la teŋa kayema, te sɔ’ɔlom me deyema wan ihege zabɛ la sɔ’ɔlom deyema.” (Matu 24:7) Yetɔɣbiŋerɛ wa sirin tum mɛ. Yun 1914 poan la, zabekãra ayi la zabebibise n gbirige teŋgɔŋɔ wa za’a. Nɛreba tustusa n yun ki zaba wa poan.

Bã’ãse wan yeregɛ ze’a woo. La wa sirin tun “ge te nɛreba wan nyɛ ban’se’ehe n koore nɛreba zen’en woo.” (Luke 21:11) La sirin eŋɛ bala? Ɛ̃ɛ. Mi’isa, sunsɔa ba’a, kɔsekɛka, maleriya bii bundɔ’ɔrum, AIDS, la bã’ãse ase’a n ku nɛreba tustusa.

Kom wan bɔna. Teŋgɔŋɔ wa za’a waabi poan nɛreba bo mɛ ka tara dia n wan di. Nɛreba tustusa yuunɛ woo kiire mɛ la kom. Dena wa dela sɛla n le daalɛ pa’alɛ ti Paradiisi pɔ̃ri mɛ. Baabule la yeti: “Kom wan bɔna teŋhe sese’ehe.”—Mark 13:8.

 Teŋmiiŋɔ. “Teŋmiiŋɔ wan bɔna teŋhe sese’ehe.” (Matu 24:7) Yele dena wa me sirin iti mɛ tomam tɛm wa poan. Yun 1914 nɛreba n zo’e gaŋɛ tustusa ki mɛ teŋmiiŋɔ poan.

Potɔpa. Nɛreba wan “nɔŋɛ la ba mɛhe la ligiri ma’an.” Ba wan “nɔŋɛ la ba pɛngera ba mɛhe gana ba nɔŋɛ [Naayinɛ].” Kɔma kan “nana ba dɔgɔreba.” (2 Timoti 3:1-5) Ho ka sakɛ ti nɛrebana taaba wa mɛa boe zina beere wa? Ba ka tare gilema bɔ’ɔra Naayinɛ ge le daana sɛba n mɔɔre ti ba zamesɛ baŋɛ Naayinɛ la.

Be’em tuuma. Nɛreba wa le tara “pototooma pa’ahegɔ.” (Matu 24:12) Ho ka sakɛ ti be’em zina beere wa gane yun se’a n tole la? Nɛreba boe la dɛŋa poan ze’a woo, faa, kinkisum la pɔɣeluŋɔ zuo.

Yele ana wa za’a waabi pa’alɛ ti Naayinɛ Na’am la pɔ̃ri mɛ. Baabule la yeti: “Ya han ta nyɛ te yele ana wa ete, ya wan mina te Na’ayenɛ yete a sɔna behera la pɔnre me n bala.” (Luke 21:31) Naayinɛ Na’am la dela bem? La dela Naayinɛ gɔmɛt n wan tare Paradiisi wa’am teŋgɔŋɔ wa zuo na. Naayinɛ Na’am wan tee soe nɛresaaleba gɔmetdoma teŋa wa zuo.—Daniel 2:44.