Ho zɔ san dɛna tontɔɔ nɛra bii birikina ho ne ka ziɣira ti ho mɛ ana ba la? La dela yelemɛŋɛrɛ. Baabule la yeti “Na’ayenɛ ane soŋa, ge me dɛna tontɔɔ.” (Yooma 25:8) Ho san bɔta ti ho dɛna Naayinɛ zɔ, la nari ti ho tuna tuunsoma. Baabule la yeti: “Yan diŋɛ dɛna [Naayinɛ] kɔma sɛba te a nɔŋɛ la, la sontii ya ana wo enŋa n an se’em la. Ya tara nɔŋerɛ.” (Epesus 5:1, 2) Yelese’a ti ho wan eŋɛ n wana:

Ita nɛra woo soŋa. “Bahɛ ya te to eta nɛra woo soŋa.”—Galatia 6:10.

Nɔŋɛ tuuma. “Se’em n daa zuunre a bahɛ zunwa ge tona. A han tuna bala, a wan diiha a mɛŋa ge me soŋora sɛba n [nari] ba soŋɛ ba.”—Epesus 4:28.

Darigɛ homɛa yese inganɛ la sarɔŋɔ poan dɛɣerɔ. “Bala, n zɔ’sonɔ wa, Na’ayenɛ biŋe a nɔɔrɛ yele ana wa woo boe la tomam. Dene poan, bahɛ ya te to yehe ya to mɛhe yelese’ere woo n wan bahɛ te to iŋhe la to potɛn’ya eta sɛla n de dɛngerɔ.”—2 Korint 7:1.

 Tara nɔŋerɛ la gilema bɔ’ɔra ho yidoma. “Ge dena wa, dekere bɔ’ɔra la yamam mɛ te sera woo nɔŋɛ a pɔga wo n nɔŋɛ a mɛŋa se’em la. Te pɔka woo mɛ na’ahe ka sera. . . . Kɔma me, nana ya dɔgɔreba.”—Epesus 5:33–6:1.

Tara nɔŋerɛ bɔ’ɔra nɛreba. “Bahɛ ya te to nɔŋɛ ya taaba. Se’ere n sɔe la, nɔŋerɛ ze’ele la [Naayinɛ] zen’en na.”—1 Yon 4:7.

Nana teŋa wa zuodoma kisa la. “Nɛra woo wom te a nana a teŋa zuodoma [gɔmɛt] nɔɔrɛ. . . . Yɔ ya ba sɛla te ya tara la ba. Koberɛ sɛbo taaba ti ba yeti ya tare la, ya yɔ ba.”—Arom 13:1, 7.