Ho wan nyaŋɛ pa’alɛ Na’am sebo ti to tɔɣera bo yele wa?​— Ɛɛ, la dela Naayinɛ Na’am la, Na’am buna n wan basɛ ti teŋa wa dɛna paradiisi. Ho wan bɔta ti ho zamesɛ baŋɛ Na’am wa yele pa’asɛ?​—

Na’am woo tari naba mɛ. Naba la n de se’em n biseri nɛreba la n boi teŋa la poan. Ge ho mi mina n wan dɛna Naba Naayinɛ Na’am la poan?​— La dela Yezu Krista. A boi la saazuo sa. La kan yue eŋa n wan dɛna Naba bisa nɛra woo teŋgɔŋɔ wa zuo! Hon bisɛ la to puurɛ wan pee, Yezu san ta dɛna Naba bisa teŋgɔŋɔ wa za’a?​—

To puurɛ wan pee mɛ! Paradiisi teŋa poan, nɛreba kan le zabera. Nɛreba wan tara nɔŋerɛ bɔ’ɔra taaba. Nɛnɛra kan le bɛ̃ bii ki. Fɔɔsi nini wan le nyɛta, ti wasi wuna ti sɛba n de kɔɔrenɔ me nama wan tiɛ ti ba ɛɣera kisa. Dia wan buge zɛ’an woo. Nɛreba la duusi wan naɛ taaba bɔna ti daaŋɔ kan bɔna. Sɛba n ki wan le vo’e. Buraasi la pɔɣesi zo’e zo’e la ti ho zamesɛ ba yele gɔnlɛmlɛm wa poan la  wuu Arebeka, Arahab, David la Eliya me wan le vo’e! Ho wan bɔta ti ho nyɛ ba, ba san le vo’e?​—

Yehowa nɔŋɛ ho mɛ ge me bɔta ti ho tara pupeelum. Ho san kelum zamesa Yehowa yɛla ge nana en, ho wan ta vɔna wuusa paradiisi poan! Hon boti bala?​—